SAN MARCOS 7

Imataj runata ch'ichichan?

(Mt 15.1-20)

1Fariseos Jesusman tantakamorqanku, leymanta wakin yachachejkunawan, Jerusalenmanta jamojkunawan ima. 2Rikorqankutaj Jesuspa wakin yachachisqasninta, ch'ichi makiswan mana mayllakuspalla mikhushajta. 3Fariseosqa, tukuy judiospis, manaraj allinta makisninkuta mayllakushaspaqa, mana mikhunkuchu, ñaupa tatasninkoj yachachisqankuta qhatispa. 4Plazamanta kutimuspapis, mana ñaupajta llimphuchakuspaqa, mana mikhunkuchu. Ajinallatataj waj ñaupa usustapis qhatinku. Chayrayku mayllanku ujyana vasosta, mankasta, metal yurustapis. Camastapis t'ajsanku. 5Chayrayku fariseos, leymanta yachachejkunawan Jesusta taporqanku: Imaraykutaj yachachisqasniyki mana ruwankuchu ñaupa tataspa yachachisqasninkuta? Paykunaqa t'antata mikhushanku makisninkuta mana mayllakuspalla.

6Jesustaj paykunaman kuticherqa: Puraj uyas, allintapuni qankunamanta Isaiasqa sut'incharqa kay jinata escribispa: Kay runasqa simillankuwan yupaychawanku; sonqonkurí noqamanta karupi kashan.

7Qhasi mana kajta paykuna yupaychawanku; runaspa kamachisqasnillanta yachachispa. 8Jesús nillarqataj: Qankunaqa Diospa kamachisqanta saqerpayaspa, runaspa yachachisqanta qhatinkichej.

9Nillarqataj: Diospa kamachisqanta qhesachallankichejtaj, ñaupa tatasniykichejpa yachachisqankuta ruwanaykichejpaj. 10Moisesqa kay jinata nerqa: Tataykita, mamaykitapis respetanki; pichus tatampaj sajrata rimanman chayqa, wañuchun. 11Qankunaqa ninkichej: Pillapis tatanman, chayrí mamanman ninman: Qankunata yanapanay kajqa, Corbán; kay niyta munan: Diosman ofrenda, nispa. 12Ajinamanta chay runata mana saqenkichejchu mana imawan tatanta nitaj mamanta yanapajta. 13Diospa palabranta qhesachashankichej, tatasniykichejpa kamachisqankuta ruwaspa; ashkha imastataj kaykunaman rijch'akojkunata ruwankichej.

Runata ch'ichichajkuna

14Ujtawan runasta wajyaspa, Jesús nerqa: tukuyniykichej uyariwaychej, entiendeychejtaj. 15Mana imapis jawamanta runaman yaykojqa ch'ichichanchu; sonqomanta llojsimojmá runataqa ch'ichichan. 16[Pichus ningriyojqa uyarichun.]

17Runasmanta karunchaspataj Jesús yaykorqa wasi uqhuman; chaypitaj yachachisqasnin taporqanku chay rijch'anachina ima niytachus munasqanta. 18Jesustaj paykunaman nerqa: Qankunapis mana yuyayniyojllatajchu kankichej? Manachu yachankichej, tukuy ima jawamanta runaman yaykojqa, mana ch'ichichasqanta? 19Mana runaj sonqonmanchu yaykun, manachayqa wijsanman; chaymantataj llojsipun.

Chaywan niyta munarqa tukuy mikhuna llimphu kasqanta. 20Nillarqataj: Imachá runaj sonqonmanta llojsimun, chaymá runataqa ch'ichichan. 21-22Runaspa sonqonkumanta llojsimunku: Sajra yuyaykuna, qhenchachakuykuna, tantalla puriykuna, runa wañuchiykuna, suwaykuna, wajpa kapuyninta munapayaykuna, sajra ruwaykuna, ch'aukiyaykuna, aychaj munayninta ruwaykuna, sajra rimaykuna, runaykachaykuna, mana yuyayniyoj kaykuna ima. 23Kay tukuy sajra ruwaykunamá, ukhumanta llojsimuspa runataqa ch'ichichanku.

Sirofenicia warmej fenin

(Mt 15.21-28)

24Chay qhepata Jesús rerqa Tiro jallp'aman; uj wasiman yaykuspataj mana munarqachu ni pipis paymanta yachananta, nitaj pakukuyta aterqachu. 25Uj warmitaj uyarerqa Jesús chaypi kasqanta. Paypa warmi wawantaj millay supayniyoj karqa; jamuytawantaj Jesuspa ñaupaqenman qonqoriykukorqa. 26Kay warmeqa griego parlayniyoj karqa, Sirofenicia llajtamanta. Jesusmantataj maytapuni mañakusharqa, wawanmanta supayta qharqonanta. 27Jesustaj warmiman nerqa: Ñaupajtaqa wawasraj mikhunanku tiyan, sajsakunankukama; mana allinchu wawaspa t'antanta qhechuspa alqetusman qaranaqa.

28Warmitaj kuticherqa: Arí, Señor, alqetuspis mesa urapi, wawaspa t'anta t'unasninta mikhunkupuni.

29Chantá warmiman nerqa: Kayta nisqaykirayku, ripullayña, wawaykimanta supay llojsinña.

30Warmitaj wasinman chayaspa, tariparqa wawanta camapi sirikushajta; supayqa paymanta llojsisqaña.

Jesús thañichin opa joq'arata

31Tiro jallp'amanta llojsispataj Jesús rerqa Sidonnejta, Decápolis llajtas chaupinta Galilea qochaman. 32Chaymantaj uj lojt'u opa runata pusamorqanku; Jesusmantataj mayta mañakorqanku makinta payman churaykurinanta. 33Jesustaj runa chaupimanta wajnejman chay runata pusarqa; ningrisninman dedosninta sat'iykuspataj, thoqayninwan qallunta llujchiykorqa. 34Patata qhawarispataj, ayqhospa runaman nerqa: Efata! Kayqa niyta munan: Kicharikuy!

35Chay kikimpacha runaj ningrisnin kicharikorqanku, qallumpis phaskarakorqa, ch'uwatataj parlarerqa. 36Jesustaj paykunata kamacherqa ama pimampis willanankuta; ajinata kamachishajtimpis astawan willararqanku. 37Chayta uyarejkunataj maytapuni t'ukorqanku, nerqankutaj: Tukuy imata allinta ruwan. Lojt'usta uyarichin, opastapis parlarichin, nispa.

Currently Selected:

SAN MARCOS 7: QCHSB

Highlight

Copy

Compare