SAN MARCOS 6

Jesusqa Nazaretpi

(Mt 13.53-58; Lc 4.16-30)

1Chaymanta llojsispataj Jesusqa kutiriporqa llajtanman, yachachisqasnimpis paywan khuska rerqanku. 2Samakuna día chayamojtintaj, sinagogapi yachachiyta qallarerqa. Ashkha runa Jesuspa yachachisqanta uyarispa, t'ukuspataj nisharqanku: Kay runarí, maypitaj kay tukuy imata yachamorqa? Imaynamantataj kay yachayta jap'erqa? Imaynamantataj kay milagrostapis ruwanri? 3Manachu kayqa carpintero, maríaj wawan; manachu wauqesnimpis Santiago, José, Simón ima kanku? Manachu panasnimpis noqanchejwan kaypi kashanku?

Ajinata Jesustaqa qhesacharqanku. 4Jesustaj paykunaman nerqa: Profetaqa tukuynejpi munasqa. Kikin llajtampitaj, ayllusnimpi, wasimpipis qhesachasqa.

5Chayrayku, chaypeqa Jesús mana ni ima milagrota ruwayta aterqachu; wakin onqosqasllata thañicherqa makisninta churaykuspa. 6Jesustaj mayta t'ukorqa mana creesqankumanta; rerqataj chay muyuynintimpi llajtasman yachachispa evangeliota.

Jesús kachan yachachisqasninta

(Mt 10.5-15; Lc 9.1-6)

7Jesustaj chunka iskayniyoj yachachisqasninta wajyaspa, paykunata kacharqa iskay iskaymanta. Atiytataj qorqa millay espiritusta qharqonankupaj. 8Kamacherqataj ama ni imata ñampaj apanankuta, manachayqa tojnullata; ama wayaqatapis, ni qoqawitapis, nitaj qolqetapis qara chumpinkupi apanankuta. 9Kamachillarqataj ujut'asllata churakunankuta, uj p'achallawantaj kanankuta. 10Chantá nillarqataj: Mayllapipis uj wasiman wajyachikuspaqa, chay wasillapi kakuychej, llajtamanta ripunaykichejkama. 11Mayllapipis mana wajyarisunkichejmanchu, nitaj uyarisunkichejmanchu chayqa, ripuychej chaymanta, chakisniykichejmanta jallp'ata thalarakuspa; ajinamanta sajra ruwasqankuta yachanankupaj.

12Chaymantataj rerqanku runasman willaraspa: Sajra kausayniykichejta saqespa, Diosman kutirikuychej, nispa. 13Paykunataj ashkha supaykunata qharqorqanku; onqosqastataj aceitewan jawispa onqoyninkumanta thañicherqanku.

Juan Bautistaj wañuynin

(Mt 14.1-12; Lc 9.7-9)

14Rey Herodestaj kay imasta Jesusmanta uyarerqa, imaraykuchus Jesuspa ruwasqasnenqa tukuynejpiña yachakorqa, nerqataj: Juan Bautistachá kausarimpun. Chayrayku kay jina atiyniyojpuni pay kashan.

15Wajkunataj nisharqanku: Profeta Eliaschá, nispa.

Ujkunataj nerqanku: Payqa Diospa profetan, chay ñaupa profetas jina.

16Herodestaj, Jesuspa ruwasqasninmanta uyarispa nerqa: Kayqa Juan Bautistapuni. Noqa paypa umanta qholucherqani, kunanrí wañusqamanta kausarimpusqa.

17Chay ñaupajta kikin Herodesllataj Juanta jap'ichispa, wataykuchispataj wisq'aykucherqa. Kayta ruwacherqa Herodiasrayku. Payqa Felipe wauqempa warmin karqa. 18Chayrayku Juan Bautista, Herodesta k'amillarqapuni: Mana allinchu wauqeykej warminwan kanaykeqa, nispa.

19Herodiasqa Juanta wateqaj wañuchinampaj, manataj atejchu. 20Herodesqa, sumaj runapaj Juanta jap'erqa; chayrayku manchachikoj, Juanqa cheqan runa, allin kausayniyojtaj kasqanrayku; chaynejtataj sumajta waqaychachej. Herodesqa tukuy sonqo uyarillajpuni Juantaqa; sapa uyarispataj mayta t'ukoj. 21Uj p'unchay chayamorqa, Herodestaj diachakuspa sumaj mikhunasta wakichicherqa. Chaymantataj wajyacherqa kurajkunata, soldado kamachejkunata, Galilea jallp'api atiyniyojkunata ima. 22Herodiaspa ususintaj, yaykumuspa tusorqa. Herodestaj, diachakupi mikhojkuna ima mayta kusikorqanku; chayrayku herodesqa sipasman nerqa: Imatachus munasqaykita mañakuway, noqataj chayta qosqayki.

23Chantá, juraspa nillarqataj: Imatachá mañawasqaykita qosqayki, reinoypa khuskanninkamapis, nispa. 24Sipastaj llojsispa mamanta tapumorqa: Imatataj mañakuymanri?, nispa.

Mamantaj Juan Bautistaj umanta mañay, nerqa.

25Sipastaj usqhayta kutiykuspa, Herodesmanta mañarqa: Kunampacha qoway uj pampa chuwapi Juan Bautistaj umanta.

26Chayta uyarispataj, Herodesqa mayta phutikorqa, tukuy mikhojkuna rikusqankurayku jurasqanraykutaj, manaña sipasmanqa, mana, niyta aterqachu. 27Herodestaj chay kikimpacha uj soldadota kacharqa, Juampa umanta apamunampaj. 28Soldadotaj, carcelman rispa, Juampa umanta qholurparerqa; pampa chuwapi apamuspataj sipasman jaywarqa; sipastaj mamanman qorqa.

29Chayta yachaspataj Juampa yachachisqasnin, carcelman rispa ayata apakaporqanku, p'ampaykorqankutaj.

Jesús mikhuchin phishqa waranqa runasman

(Mt 14.13-21; Lc 9.10-17; Jn 6.1-14)

30Apostolesnintaj ujtawan Jesuswan tantakuspa, willarqanku tukuy ima ruwasqasninkuta, imaynatachus yachachisqankuta ima. 31Jesustaj paykunaman nerqa: Jamuychej ch'innejman, chaypitaj tumpallatapis samarikunkichej, nispa. Ashkha runa, rispa jamuspa, paykunata mana saqejchu kanku mikhojllatapis. 32Ajinamanta, paykunalla boteman yaykuspa, ch'innejman rerqanku. 33Ashkha paykunata rejta rikorqanku, rejserqankutaj. Chayrayku, llajtasmanta runas, usqhayllata chakipi kachaykukorqanku. Paykunamantapis astawan ñaupajtaraj chayarqanku; paymantaj qayllaykorqanku. 34Jesusqa botemanta llojsimuspa ashkha runata rikorqa, paykunatataj khuyakorqa; imaraykuchus mana michejniyoj ovejas jina karqanku; paykunamantaj tukuy imata yachachiyta qallarerqa. 35Inti chinkaykusharqaña, yachachisqasnintaj Jesusman qayllaykuspa, nerqanku: Ch'impi kanchej, ch'isiyaykushanñataj. 36Runasta kachapullayña, kay qayllapi chajrasman, ranchosman ima rispa mikhunata rantikamunankupaj, imaraykuchus mana mikhunanku kanchu.

37Jesustaj paykunaman kuticherqa: Qankuna mikhuchiychej. Paykunataj nerqanku: Iskay pachaj denario qolqewan t'antata rantimuspachu paykunaman mikhuchisqayku?

38Jesustaj taporqa: Mashkha t'antataj kapusunkichejri? Rispa qhawarimuychej.

Paykunataj mashkhachus kasqanta yachamuspa Jesusman willarqanku: Phishqa t'antalla, iskay challwaswan kapuwayku.

39Chaymanta Jesús kamacherqa, t'aqa t'aqalla runas tiyarakunankuta q'omer ch'iki pasto patapi. 40Paykunataj sinrulla tiyaykukorqanku, wakin t'aqapi pachaj, wakimpitaj phishqa chunka karqanku. 41Jesustaj, chay phishqa t'antata, iskay challwastawan makimpi jap'ispa, janaj pachata qhawarispataj graciasta qorqa. T'antata partispataj yachachisqasninman jaywarqa runasman qomunankupaj. Iskay challwastapis jaywallarqataj rak'iranankupaj tukuyninkuman. 42Tukuyninkutaj mikhorqanku sajsakunankukama. 43Yachachisqasnintaj oqharerqanku chunka iskayniyoj canastas junt'asta t'anta puchojta, challwa puchojtawan. 44Chay mikhojkunataj phishqa waranqa qharis karqanku.

Jesús yaku patata purin

(Mt 14.22-27; Jn 6.16-21)

45Chay kikimpachataj, Jesusqa yachachisqasninta boteman pusaykorqa paymanta ñaupashanankupaj, qocha chimpa Betsaida llajtaman. Chaykamataj Jesusqa runasta kachaporqa. 46Runasta kachapuytawantaj, orqoman wicharerqa Diosmanta mañakoj. 47Tutayamuyta, botepi rejkunaqa khuskan qochapiña karqanku. Jesustaj qocha cantopi sapallan kasharqa. 48Rikorqataj yachachisqasninta, ñak'ayllataña boteta ñaupajman wayt'achishajta, imaraykuchus ñaupaqenkumanta wayra manchayta wayramusharqa. Sut'iyarpayaytaña chay cheqanman Jesús jamorqa, yaku patata purispa, yachachisqasninmantataj ñaupaykuyta munasharqa. 49Paykunataj yaku patata purishajta rikuspa, alma kasqanta yuyaspa qhaparerqanku. 50Payta rikuspa, tukuyninku manchachikuywan kharkatisharqanku. Ujllata Jesusqa paykunata parlapayamorqa: Sonqochakuychej! Noqa kani! Ama manchariychejchu!, nispa.

51Jesús boteman wicharisqantawantaj, wayra thañerqa. Chayta rikuspataj yachachisqasnin mancharikuspa mayta t'ukorqanku. 52Manapuni unanchayllatapis aterqankuchu t'antata mikhusqankumanta; imaraykuchus paykunaj sonqonku rumiyasqa karqa.

Jesús thañichin onqosqasta Genesaretpi

(Mt 14.34-36)

53Jesusqa yachachisqasninwan qochanejta rispa Genesaret llajtaman chayarqa, chaypitaj boteta watarqanku. 54Botemanta llojsishajtinkutaj, Jesusta rejserqankupacha. 55Tukuynejman rispataj, maypichus Jesús kasqanta yachaspa, onqosqasta phullusninkupi apamuyta qallarerqanku. 56Maymanchá Jesús chayarqa chay ranchosman, llajtasman, chajrasman, qhatunasman, tukuy ñanman ima, onqosqasta apamusharqanku. Jesusmantataj mañakorqanku p'achampa cantollantapis onqosqas llankharinankuta. Tukuy llankhaykojkunataj onqoyninkumanta thañikaporqanku.

Currently Selected:

SAN MARCOS 6: QCHSB

Highlight

Copy

Compare