HEBREOS 3

Jesusqa, Moisesmanta astawan atiyniyoj

1Ajllasqa hermanos, janaj pacha wajyaymanta chayaqeyojkuna, qhawaychej apostolta, feninchejmanta jatun sacerdoteta, Jesusta. 2Payqa tukuy imapi junt'arqa churajnimpaj; imaynatachus Moisespis junt'arqa tukuy imata Diospa wasimpi. 3Jesusqa, Moisesmanta nisqaqa astawan kuraj, allin sutiyojtaj; imaraykuchus astawan allin sutiyojpuni wasita sayachejqa, wasinmanta nisqaqa. 4Sapa waseqa runaj wasichasqampuni; tukuy imata ruwajrí, Dios. 5Moisesqa, cheqamanta junt'aj karqa Diospa wasimpi kamachi jina, willanampaj imachus nisqa kanan karqa chaymanta. 6Cristoqa, Churi jina wasimpi churasqa; chay wasirí noqanchej kanchej, sitajchus tukukuykama creesunchej, suyaspa kusikuynintataj sinch'ita jap'isunchej, chayqa.

Creejkunaj samakuynin

7-9Chayrayku, ajinallatataj Santo Espiritupis nin: Kunan p'unchaychus parlasqanta uyariwajchej chayqa; ama sonqoykichejta rumiyachiychejchu, chay ch'ajwa oqharikuypi jina, chay tentación p'unchaypi, ch'in pampapi jinaqa, maypichus ñaupa tatasniykichej rejsinayawaspa tentawarqanku, rikorqankutaj ruwasqasniyta, tawa chunka wata junt'ata. 10Chayrayku, chay runaj miraynimpaj phiñakorqani, nerqanitaj: Sonqonkupi pantashanku; manataj ñankunasniytapis rejserqankuchu. 11Chayrayku, anchata phiñakuspa jurarqani: Mana samakuyniyman yaykonqankuchu.

12Hermanos, ama qankunamanta pipis mana creej, sajra sonqoyoj kachunchu, kausaj Diosmanta ama t'aqasqa kanampaj. 13Astawanqa, sapa p'unchay purajmanta kallpachanakuychej, p'unchay kashajtin, ama mayqenniykichejpis juchaj ch'aukiyaynimpi rumiyanampaj. 14Cristowan chayaqeyoj kanchej; sichus creesqanchejta, qallariymanta tukukuykama sinch'ita jap'isunchej chayqa.

15Escrituraj nisqanman jina: Kunan p'unchaychus parlasqanta uyariwajchej chayqa, ama sonqoykichejta rumiyachiychejchu, chay ch'ajwa oqharikuypi jina. 16Pikunataj karqanku, uyarispaña, Diosta phiñachejkunari? Manachu Moiseswan Egiptomanta tukuy llojsimojkuna? 17Pikunapajtaj Dios phiñasqa karqa tawa chunka watastari? Manachu juchallikojkunapaj karqa, paykunaj ayasninkutaj ch'in pampapi wijch'urayarqanku? 18Pikunapajtaj Dios jurarqa, samakuyninman mana yaykunankutari? Manachu chay mana kasukojkunapaj? 19Yachanchej mana yaykuyta atisqankuta, mana creesqankurayku.

Currently Selected:

HEBREOS 3: QCHSB

Highlight

Copy

Compare