HEBREOS 2

May jatun salvación

1Chayrayku allimpuni noqanchejpaj, tukuy uyarisqanchejta aswan k'uchi kaywan kasunanchejqa, ama llusk'ananchejpaj. 2-3Angelespa nisqankuchus sinch'ita sayarqa; tukuy juchallikuy, mana kasukuytaj allin jasut'isqa karqa, chayqa; imaynamantataj noqanchej ayqesun, chay jina jatun salvacionta pisipi jap'ispari? Chay salvacionmanta Señor ñaupajtaña willarqa, payta uyarejkunataj cheqa kajta willawarqanchej. 4Diospis paykunawan khuska willallarqataj jatun rikuchinaswan, milagroswan, imaymana atiykunawan ima; ajinallatataj Santo Espíritoj atiyninwan, munayninman jina.

Salvawajninchej

5Diosqa mana angelespa kamachiynimpichu chay jamoj mundota churarqa, mayqenmantachus parlashanchej, chayta. 6Chaywampis uj escribej escriturapi willarqa, nispa: Imataj runa paymanta yuyarikunaykipajrí? Chayrí, imataj runaj churin payta watukunaykipajri? 7Angelesmanta nisqaqa, uj pisi tiempollapaj payta juch'uyyacherqanki; qhapaj k'anchaywan, allin sutiwantaj payta pilluykucherqanki. 8Tukuy imata chakisnin uraman churarqanki. Chayrayku, tukuy ima paypa kamachimpi kaspaqa, manaña imapis kanchu paypa kamachin uraman churanapajqa. Kunantaj, manaraj rikunchejchu tukuy ima paypa kamachimpi churasqa kasqantaqa. 9Jinallatataj Jesusta rikunchej qhapaj k'anchaywan, allin sutiwantaj pillusqata wañuynin jawa ñak'arisqanrayku. Payqa uj pisi tiempolla juch'uychasqa karqa angelesmanta nisqaqa; chaywampis Diospa khuyakuyninrayku Jesusqa tukuypaj wañuyta munarqa.

10Allin karqa Diospaj, piraykuchus, pinejtatajchus tukuy imapis ruwasqa karqa, ashkha wawasta janaj pacha k'anchayman pusashajtin, paykunaman salvacionta qoj. Jesucristotapis pusallantaj ñak'ariykunawan allinta wakichispa. 11Llimphuchajqa llimphuchasqaswan uj kikinmanta kanku; chayrayku mana p'enqakunchu paykunata hermanos, niyta. 12Ajinallatataj nin: Hermanosniyman sutiykita willasaj, iglesia chaupipitaj takispa yupaychasqayki. 13Ujtawan nillantaj: Noqa paypi suyasaj; nillantaj: Kaypi kashani, Dios qowarqa chay wawaswan.

14Wawasqa uj yawarllamanta, uj aychallamanta kanku; ajinallatataj Cristopis, chaykunallamantataj kaspa, wañuynejta, wañuypa atiyninta jap'ejta atipanampaj, niyta munan, supayta. 15Ajinallatataj salvanampaj, pikunachus wañuyta manchachikuspa, tukuy kausayninkupi kamachis jina kasharqanku, chaykunata. 16Cheqatapuni, Diosqa mana angelestachu yanaparqa; astawanqa, Abrahampa mirayninta yanaparqa. 17Chayrayku, hermanosninman tukuy imapi rijch'akunampi karqa, khuyakuyniyoj, kuraj sacerdote churasqa kaspa, Diospa tukuy imasnimpi junt'aj, runakunaj juchasnintapis pampachanampaj. 18Imaynatachus pay kikin tentasqa kaspa ñak'arerqa, ajinallatataj atiyniyoj tentasqa kajkunatapis yanapanampaj.

Currently Selected:

HEBREOS 2: QCHSB

Highlight

Copy

Compare