HEBREOS 11

Creey imatataj niyta munanri?

1Creeyqa suyakusqasninchejpa sinch'i sayaynin, mana rikusqanchejpata rikuchiynin. 2Ñaupa tatasninchej ferayku allimpaj qhawasqas karqanku.

3Creespa yachanchej kay pachakuna Diospa palabranrayku wakichisqas kasqankuta. Chayrayku rikusqanchejqa mana rikukojkunamanta ruwasqas karqanku.

4Creespa Abelpis aswan allin uywa wañuchisqata Diosman qorqa Cainmanta nisqaqa. Chaywantaj Dios rejsichej allin kasqanta. Diospis Abel rikuchikusta jaywasqanrayku, allinta paymanta willarqa; feninraykutaj wañusqapis chayta parlashallanrajpuni.

5Creespa Enocqa mana wañuyta rikuspa apasqa karqa; manataj payta tarerqankuchu, Dios payta apakapusqanrayku. Manaraj apasqa kashajtin, yachakorqaña Dios payta munakusqanta. 6Mana creespaqa, mana atinchejchu Diospa sonqonta kusichiyta; imaraykuchus Diosman qayllaykojqa, creenan tiyan Dios kasqanta, payta mask'ajkunamantaj t'inkachej kasqanta.

7Creespa Noeqa Diosmanta yachachisqa karqa, chay manaraj rikukoj imasmanta; manchachikuywantaj arcata wakicherqa, familiampis salvasqa kanampaj; chay feraykutaj mundota juchacharqa, feraykullataj Diosmanta cheqan kajpaj qhawasqa karqa, chayaqeyojtaj rikhurerqa.

8Creesqanrayku Abrahampis wajyasqa kaspa, chayaqepaj jap'inan jallp'aman llojserqa, mana yachaspa maymanchus rishasqanta. 9Creesqanrayku Diospa qonan jallp'aman tiyakoj rerqa, waj runakunaj jallp'anman; toldo wasispi tiyakuspa, Isaacwan, Jacobwan, paykunapis chay kikin qonan kasqallanmantataj, paywan khuska chayaqeyoj karqanku. 10Sinch'i sayaj llajtata suyasharqa, mayqentachus kikin Dios wakicherqa, sayacherqataj.

11Creesqanrayku kikin Sarapis, payaña kaspa mana wachakoj, wijsallikorqa kallpata jap'ispa; imaraykuchus payqa creerqa Dios imatachus qosaj nisqanta junt'ananta. 12Chay jinamanta, uj runamanta wañusqa jina kajmantaña, patapi qoyllurkuna jina runa mirarqa, mar qocha cantompi t'iyu jinataj, mana yupay atina.

13Creespa tukuyninku wañuporqanku, chay Diospa qonan kasqanta manaraj jap'ishaspa; astawanqa karullamanta chay imasta qhawaspa, creespa, napaykuspataj; ajinamanta, kay pachapi purej runas jina, mana llajtayoj kasqankuta rejsicherqanku. 14Chay jinata nejkuna sut'ita rejsichinku, waj llajtata mask'asqankuta. 15Cheqamanta, sichus yuyankuman llojsimorqanku chay llajtamanta chayqa, kutiripuyta atinkuman karqa. 16Chaywampis, aswan sumaj llajtata munasharqanku, chay janaj pachapi kajta. Chayrayku Diosqa mana p'enqakunchu paykunaj Diosninku kayta, imaraykuchus paykunapaj uj llajtata wakichiporqa.

17Creesqanrayku Abrahamqa tentasqa kaspa, Isaacta k'ata wawanta, rikuchikupi jaywarqa, pichus Diospa qonanta jap'inan kajta. 18Dios payman nerqa: Isaacnejta miray kapusonqa, nispa. 19Abrahamqa yuyasharqa Dios atiyniyoj kasqanta wañojkunasnintinta kausarichinampaj. Chayrayku nisunman, wañusqas ukhumanta churinta watejmanta jap'ikaporqa.

20Creesqanrayku Isaacqa Jacobta bendicerqa, Esautawan, yuyaspa chay qhepa jamoj imaspi.

21Jacobpis creesqanrayku, wañupushaspaña Josejpa sapa uj wawasninta bendicerqa, Diostataj yupaycharqa tojnunman atiykukuspa.

22Creesqanrayku Joseqa wañuy patapi kashaspa, Israelpa wawasnin Egiptomanta llojsinanku kasqanta willarqa, kamacherqataj imatachus tullusninwan ruwanankuta.

23Creesqanrayku Moisés nacikojtinkama, kinsa killa junt'ata tatasnin pakaykorqanku, k'acha wawita kasqanrayku, reypa kamachisqanta mana manchachikuspa.

24Creesqanrayku Moisesqa jatunña kaspa, mana munarqachu faraompa ususimpata wawan nisqa kayta. 25Astawanqa, Diospa llajtanwan llakisqa kayta ajllakorqa; manataj munarqachu pisi p'unchaykunapaj kusikuspa jucha kausaypi puriyta. 26Aswan jatun kapuypaj qhawarqa Cristoj k'umuykachakuyninkunasta, Egipto llajtayojkunaj qhapaj kapuyninkumanta nisqaqa. Payqa jamoj t'inkataña qhawasharqa.

27Creesqanrayku Egiptomanta riporqa, reypa phiñakuyninta mana manchachikuspa; kallpachakuspataj sayarqa, mana rikukoj Diostapis rikushanman jina. 28Creesqanrayku Pascuata ruwarqa, yawarwantaj ch'ajchorqa, kuraj kaj qhari wawasta wañuchej ángel ama imananampaj.

29Creesqankurayku israelitasqa puka mar qochaj chaupinta, ch'aki jallp'ata chimparqanku; Egipto llajtayojkunataj, jinallatataj ruwayta munaspa yakuwan p'ampachikorqanku.

30Creesqankurayku Jericó llajtaj perqasnin urmarqanku, qanchis diata israelitas muyuykojtinku. 31Creesqanrayku Rahab, khuchi purej warmi, mana wañorqachu Diosta mana kasojkunawan khuska, wateqajkunata tukuy sonqo wasinman wajyaykusqanrayku.

32Imatawanraj nisajri? Mana atinichu pisi tiempopi willayta Gedeonmanta, Barajmanta, Sansonmanta, Jeptemanta, Davidmanta, Samuelmanta, profetasmanta ima. 33Paykunaqa creesqankurayku suyu kamachejkunata atiparqanku, cheqan kajta ruwarqanku, Diospa qonan kasqanta jap'erqanku, leonespa simisnintapis wisq'arqanku. 34Paykuna ninaj kallpanta thasnorqanku, cuchilloj filonmanta ayqerqanku, onqoykunamanta walejyakaporqanku, maqanakuspi sinch'ita sayaykorqanku, waj llajtayojkunaj yupa soldadosninta t'usterqanku, ayqecherqankutaj. 35Wakin warmispis wañusqasninkuta kausarimuynejta jap'ikaporqanku.

Wakin runastaj aysasqas ñak'arerqanku, kacharisqas kaytataj mana munarqankuchu; imaraykuchus yacharqanku aswan allin kausarimpuyta jap'inankuta. 36Wakinkuna asipayachikorqanku jasut'ichikorqan kutaj; astawanqa carcelespi watasqas wisq'achikorqanku. 37Wakintaj rumiswan ch'anqasqas, serruchowan khuchusqas, tentasqas, espadawan wañuchisqas ima karqanku. Kaymanta jaqayman purerqanku oveja qaraswan, cabra qaraswan p'achallisqas, mana imayoj, llakisqas, maqasqas ima. 38Mundoqa mana paykunapaj jinachu karqa. Ch'in pampaspi, orqospi, qaqa jusk'uspi, jallp'a toqospi ima chinkasqas purerqanku.

39Tukuy kaykunataj, creesqankurayku allimpaj rejsisqas karqanku; chaywampis Diospa qonan kasqanta mana jap'erqankuchu. 40Diosqa aswan allin imasta noqanchejpaj wakichisharqa; mana noqanchejwan khuskarí, paykunapis mana allinchasqa kayta aterqankuchu.

Currently Selected:

HEBREOS 11: QCHSB

Highlight

Copy

Compare