Popular Bible Verses from HEBREOS 11

Share

Creeyqa suyakusqasninchejpa sinch'i sayaynin, mana rikusqanchejpata rikuchiynin. Ñaupa tatasninchej ferayku allimpaj qhawasqas karqanku.

Mana creespaqa, mana atinchejchu Diospa sonqonta kusichiyta; imaraykuchus Diosman qayllaykojqa, creenan tiyan Dios kasqanta, payta mask'ajkunamantaj t'inkachej kasqanta.

Creespa yachanchej kay pachakuna Diospa palabranrayku wakichisqas kasqankuta. Chayrayku rikusqanchejqa mana rikukojkunamanta ruwasqas karqanku.

Creesqanrayku Abrahampis wajyasqa kaspa, chayaqepaj jap'inan jallp'aman llojserqa, mana yachaspa maymanchus rishasqanta. Creesqanrayku Diospa qonan jallp'aman tiyakoj rerqa, waj runakunaj jallp'anman; toldo wasispi tiyakuspa, Isaacwan, Jacobwan, paykunapis chay kikin qonan kasqallanmantataj, paywan khuska chayaqeyoj karqanku.

Creespa Noeqa Diosmanta yachachisqa karqa, chay manaraj rikukoj imasmanta; manchachikuywantaj arcata wakicherqa, familiampis salvasqa kanampaj; chay feraykutaj mundota juchacharqa, feraykullataj Diosmanta cheqan kajpaj qhawasqa karqa, chayaqeyojtaj rikhurerqa.

Creespa Enocqa mana wañuyta rikuspa apasqa karqa; manataj payta tarerqankuchu, Dios payta apakapusqanrayku. Manaraj apasqa kashajtin, yachakorqaña Dios payta munakusqanta.

Creespa Abelpis aswan allin uywa wañuchisqata Diosman qorqa Cainmanta nisqaqa. Chaywantaj Dios rejsichej allin kasqanta. Diospis Abel rikuchikusta jaywasqanrayku, allinta paymanta willarqa; feninraykutaj wañusqapis chayta parlashallanrajpuni.

Creesqanrayku kikin Sarapis, payaña kaspa mana wachakoj, wijsallikorqa kallpata jap'ispa; imaraykuchus payqa creerqa Dios imatachus qosaj nisqanta junt'ananta.

Sinch'i sayaj llajtata suyasharqa, mayqentachus kikin Dios wakicherqa, sayacherqataj.

Creesqanrayku Moisesqa jatunña kaspa, mana munarqachu faraompa ususimpata wawan nisqa kayta. Astawanqa, Diospa llajtanwan llakisqa kayta ajllakorqa; manataj munarqachu pisi p'unchaykunapaj kusikuspa jucha kausaypi puriyta. Aswan jatun kapuypaj qhawarqa Cristoj k'umuykachakuyninkunasta, Egipto llajtayojkunaj qhapaj kapuyninkumanta nisqaqa. Payqa jamoj t'inkataña qhawasharqa. Creesqanrayku Egiptomanta riporqa, reypa phiñakuyninta mana manchachikuspa; kallpachakuspataj sayarqa, mana rikukoj Diostapis rikushanman jina.

Creesqanrayku Abrahamqa tentasqa kaspa, Isaacta k'ata wawanta, rikuchikupi jaywarqa, pichus Diospa qonanta jap'inan kajta.

Creesqanrayku Rahab, khuchi purej warmi, mana wañorqachu Diosta mana kasojkunawan khuska, wateqajkunata tukuy sonqo wasinman wajyaykusqanrayku.

Creesqankurayku israelitasqa puka mar qochaj chaupinta, ch'aki jallp'ata chimparqanku; Egipto llajtayojkunataj, jinallatataj ruwayta munaspa yakuwan p'ampachikorqanku.

Creesqankurayku Jericó llajtaj perqasnin urmarqanku, qanchis diata israelitas muyuykojtinku.

Creesqanrayku Pascuata ruwarqa, yawarwantaj ch'ajchorqa, kuraj kaj qhari wawasta wañuchej ángel ama imananampaj.

Creesqanrayku Joseqa wañuy patapi kashaspa, Israelpa wawasnin Egiptomanta llojsinanku kasqanta willarqa, kamacherqataj imatachus tullusninwan ruwanankuta.

Jacobpis creesqanrayku, wañupushaspaña Josejpa sapa uj wawasninta bendicerqa, Diostataj yupaycharqa tojnunman atiykukuspa.

Creesqanrayku Isaacqa Jacobta bendicerqa, Esautawan, yuyaspa chay qhepa jamoj imaspi.