EFESIOS 5

Diospa wawasnin jina kausaychej

1Diosmanta yachakuychej munasqa wawasnin jina. 2Munakuypitaj puriychej, imaynatachus Cristopis munakuwarqanchej ajinata. Pay kikin entregakorqa noqanchejrayku Diosman ofrenda jina, ruphachisqa cordero jinataj k'acha q'apayniyoj.

3Ama kachunchu qhenchachakuy, tukuy ch'ichi kay, chayrí munapayay ima. Chaykunataqa ama parlarillaychejpischu, imaynatachus Diospa ajllasqasnimpaj allin kan, ajinata. 4Ama p'enqay millaykunata parlaychejchu, nitaj qhasi mana kajta nitaj sajra palabrastapis. Manachayqa Diosman graciasta qoychej. 5Kayta yachaychej: Qhenchachakojqa, ch'ichi imasta ruwajqa, lantita yupaychajman rijch'akoj mich'a kajpis, mana chayaqeta jap'enqankuchu Cristojtawan, Diospatawan reinonkupi. 6Ama piwampis qhasi mana kaj palabraswan ch'aukiyachikuychejchu, imaraykuchus kay imasrayku Diospa k'ajaj phiñakuynin jamun mana kasukojkunaj patanman. 7Ama paykunawan chay imaspi chajrukuychejchu.

8Ñaupajtaqa laqhapi karqankichej, kunanrí Señorpi k'anchay kankichej. Puriychejtaj k'anchaypa wawasnin jina. 9K'anchaypa poqoynenqa tukuy k'acha kaypi, cheqan kaypi, cheqa kaypitaj. 10Allinta yachaychej, imachus Señorpaj k'acha kasqanta. 11Laqhapi kajkunaj qhasi mana kaj ruwasqasninkuta ama ruwaysiychejchu. Manachayqa paykunata k'amiychej. 12Uj p'enqay pakaypi ruwasqasninkumanta parlayllapis. 13K'anchaynejta tukuy ima sut'inchakun. 14Ninkumin: Puñuyniykimanta rijch'ariy, sayariytaj wañusqakunamanta, Cristotaj k'anchaykusonqa, nispa.

15Allinta qhawakuychej imaynatachus purisqaykichejta, amataj mana yuyayniyoj wampus jinaqa, manachayrí, yachayniyojkuna jina. 16Tiempota kashajtinrajqa allin kajta ruwaychej, imaraykuchus kunan p'unchaykunaqa mana allinchu. 17Chayrayku ama wampus kaychejchu; manachayqa yachaychej mayqenchus Señorpa munaynin kasqanta. 18Ama vinowan machaykuychejchu. Chaypi sajra kausay tiyan. Astawanqa Espirituwan junt'a kaychej. 19Qankuna ukhupi salmoswan parlaychej, takiychejtaj. Espirituman jina Señorta yupaychaychej sonqoykichejpi. 20Señorninchej Jesucristoj sutimpi tukuy imamanta Dios Tataman graciasta qoychejpuni.

Familia ukhupi kausanamanta

21Cristota manchachikuspa purajmanta kasunakuychej.

22Qosayoj warmisqa qosasninkuta kasuchunku Señorta jina. 23Qosaqa warmimpa umanmin imaynachus Cristopis iglesiaj uman, ajina. Ajinallataj iglesiaqa paypa cuerpon, Cristotaj salvajnin. 24Imaynatachus iglesiapis Cristota kasun, ajinallatataj qosayoj warmispis qosasninkuta kasuchunku tukuy imapi.

25Qosas, warmisniykichejta munakuychej imaynatachus Cristo iglesiata munakorqa, ajinata, payraykutaj kausayninta qorqa. 26Kayta Cristo ruwarqa juchamanta t'aqaspa, palabranwan mayllaspataj llimphucharqa yakuwan jina. 27Pay kikimpaj rikuchinampaj uj sumaj qhawasqa iglesiata, mana ch'ichiyojta, mana k'usuyojta, nitaj chay imasman rijch'akojta. Manachayqa juchamanta t'aqasqata, llimphuchasqatataj rikuchinampaj. 28Ajinata qosaspis warmisninkuta munakuchunku ukhunkuta jina. Pillapis warminta munakojqa pay kikinta munakun. 29Mana pipis kikin cuerponta chejnikunchu, astawanqa allinta mikhuchin, allintataj qhawan, imaynatachus Cristopis iglesiata munakorqa, ajinata. 30Paypa cuerponmanta kanchej, [aychanmanta, tullusninmanta ima]. 31Chayrayku qhareqa tatanta, mamantawan saqespa, warminwan tantakaponqa, iskayninkutaj uj aychallaña kanqanku. 32Kay pakasqa yachayqa jatunmin. Kayta nini Cristomanta, iglesiamantawan. 33Chayrayku qankunamanta sapa uj munakuchun warminta, pay kikinta jina. Warmipis qosanta allimpi qhawachun tukuy imapi.

Currently Selected:

EFESIOS 5: QCHSB

Highlight

Copy

Compare