EFESIOS 4

Espiritupi ujlla kanchej

1Noqa Señorninchejrayku presochasqa kani. Mañaykichej allinta purinaykichejta Diospa wajyasqasnin jina, ajllasqasnin jinataj. 2Tukuyman k'umuykuspa, llamp'u sonqo kaywan purajmanta paciencianakuspa munakuypi kausakuychej. 3Espiritupi ujlla kayta, k'uchi kaywan waqaychaychej, sonqo tiyakuytawan khuska. 4Tiyan uj cuerpolla, uj Espiritulla, imaynatachus uj suyayllaman wajyasorqachej, ajinata. 5Tiyallantaj uj Señorlla, uj fella, uj bautismolla. 6Uj Diosllataj tukuypa Tatan. Payqa kashan tukuypa patampi, tukuynejpi, tukuypitaj.

7Sapa ujta khuyakuwarqanchej, Cristoj qonanman jina. 8Chayrayku Escriturapi nishan: Pataman wicharerqa presochasqasta apaspa, runasmantaj regalosta qorqa.

9Wicharerqa nispaqa, manachu niyta munan pay ñaupajta jallp'aj aswan ukhunkama uraykusqanta? 10Pichus uraykamorqa, chayllataj janaj pachaj patanman wicharerqa tukuy mundoman junt'aykunampaj. 11-14Pay kikillantaj churarqa wakinta apostolesta, wakinta profetasta, wakinta evangelistasta, wakinta michejkunata, wakintarí yachachejkunata, ajllasqas, ruwaypi allin wakichisqas kanankupaj, ajinapi Cristoj iglesian wiñanampaj; tukuyninchej ujllata creenanchejkama Diospa Churinta rejsinanchejpaj, cheqan runas kananchejpaj, Cristoj junt'aynimpa sayayninman chayananchejkama; amaña wawas jinachu kananchejpaj, waj yachachiykunawan wayrawan jina kayman jaqayman apaykachachikuspa. Chaykunataqa runakunalla wakichinku, misk'i parlaywan ch'aukiyaspa tojllawan jina pantachinankupaj. 15Chayrayku cheqa kajta qhatikuspa, munakuypi Cristowan khuska wiñana tukuy imapi; imaraykuchus Cristomin umaqa. 16Paynejta tukuy cuerpoqa allin wakichisqa kashan. Pay kikimpi tukuy iman sumaj t'inkisqa ankuswan ujllaman tukunku, yanapanakuspa maychus sapa uj ruwasqanman jina; sayankutaj munakuypi sayachinakuspa.

Cristopi mosoj kausay

17Kayta ari niykichej, anchatapuni mañakuykichej Señorpa sutimpi; amaña wakin gentiles jina purinaykichejta. Paykunaqa qhasita yuyayninkuman jina purinku. 18Yuyayninku laqhayasqa kajtin, Diospi kay kausaymanta karunchasqas kanku, paykuna mana yachasqankurayku, rumi sonqostaj kasqankurayku. 19Paykuna p'enqakuyninkuta chinkachispa millay kausayman qokorqanku, tukuy ima ch'ichi kaj ruwaywan mana sayayta atispa. 20-21Qankunarí, mana jinatachu Cristomanta yachakorqankichej. Cheqamantachus Jesusta uyarerqankichej yachakorqankichejtajchus cheqa kaj paypi kasqanman jina. 22Ñaupa sajra kausayniykichejmanta, mauk'a runamantawan t'aqakuychej; imaraykuchus sajra munaynimpa atipasqan, ch'aukiyasqantaj. 23Qankuna yuyayniykichejta sonqoykichejpi mosojyachikuychej. 24Chay mosoj runamanta p'achawan jina p'achallikuychej; mayqenchus Diosman jina ruwasqa karqa, cheqan kaypi, llimphu kaypi, cheqa kaypitaj.

25Chayrayku llullakuyta saqespa, sapa ujqa cheqata parlaychej runa masisniykichejwan; imaraykuchus ujkuna ujkunawan uj cuerpollamanta kanchej.

26Phiñakuspaqa, ama juchallikuychejchu, nitaj phiñasqa kashajtiykichejpis inti yaykupuchunchu. 27Nillataj supaytapis kasuychejchu.

28Pichus suwajqa, amaña suwachunchu; manachayqa makinwan allin kajta llank'achun, mana kapuyniyojman imachus pisisqanta qonampaj.

29Simiykichejmantapis ama ima sajra parlaykunapis llojsichunchu, manachayqa cheqan kajta parlaychej, uyarejkuna wiñanankupaj Diospa yanapayninwan. 30Diospa Santo Espiritunta ama llakichiychejchu. Paywan sellowan jina kankichej salvación p'unchaypaj.

31Qankunamanta qhechukuychej tukuy jaya sonqowan kayta, phiñakuyta, k'araj phiñakuyta, qhaparqachayta, runaj contranta parlayta, tukuy sajra yuyaytawan. 32Ujkuna ujkunawantaj k'achas kaychej, khuyakuyniyojtaj. Sapa uj juchasniykichejta perdonanakuspa, imaynatachus Diospis juchasniykichejta pampacharqa Cristopi, ajinata.

Currently Selected:

EFESIOS 4: QCHSB

Highlight

Copy

Compare