COLOSENSES 4

1Patrones, kamachisniykichejwan cheqata, cheqan kajtataj ruwaychej, yachaspa qankunapis janaj pachapi patronniyoj kasqaykichejta.

2Mana sayk'uyta Diosmanta mañakuychej, mana puñuspataj qhawaychej graciasta qospa. 3Noqaykupajpis mañapuwayku, Señor punkuta kicharinampaj palabranta willanaykupaj, rejsichinaykupajtaj Cristoj pakasqa yachayninta. Payrayku noqapis presochasqa kashani. 4Mañapuwaychej payta sut'ita rejsichinaypaj, maychus kajta parlaspa.

5Allin yachaywan puriychej mana creejkunawan, ama tiempota usuchispa. 6K'acha misk'i simiwan parlaychej, kachiwan kachinchasqata jina. Chaymantaqa yachaychej imaynatachus sapa ujman kutichinaykichej kasqanta.

Pablo hermanosta napaykun

7Munasqa hermano Tíquico noqaykumanta allinta willasonqachej. Payqa allin yanapakoj, Señorpitaj kamachi masiy. 8Chaypaj payta qankunaman kachamuni, yachanampaj imaynachus kasqaykichejta, sonqoykichejtataj kallpachanampaj. 9Munasqa sumaj hermanonchej Onesimopis paywan jamushan; payqa qankunamanta ujniykichej. Paykuna willasonqachej imachus kaypi kasqanta. 10Aristarco napaykamusunkichej, pay noqawan presochasqa kashan. Jinallataj Marcospis, pichus Bernabéj ayllun, napaykamusunkichej, imaraykuchus paymanta kamachisqaña kankichej. Sichus qankunajman jamonqa chayqa, allinta payta wajyarikuychej. 11Jesús sutichasqa Justopis napaykamusunkichej. Paykunalla circuncisionmanta kajkuna Diospa reinonmanta willayta yanapawanku, sonqochawankutaj. 12Qankunamanta ujnin kaj, Cristoj kamachin Epafras napaykamusunkichej. Payqa Diosmanta mañashampuni qankunapaj sumajta sayanaykichejpaj, Diospa tukuy munaynimpitaj allinchasqas, junt'asqastaj kanaykichejpaj. 13Noqa yachani Epafrasqa qankunapaj Diosmanta mañakusqanta; jinallataj Laodiceapi kajkunapaj, Hierapolispi kajkunapajwan. 14Munasqa jampej Lucasqa Demaspiwan napaykamusunki chej.

15Laodiceapi kaj hermanosman napaykuychej, Ninfasman, wasimpi kaj iglesiamanwan. 16Qankuna kay cartata leeytawan, Laodiceaman apachiychej; Laodiceaman escibisqa cartata apachimojtinkutaj qankunapis leellaychejtaj. 17Arquipoman niychej: Señorpa nisusqanta ruwanaykipaj, allinta junt'ay.

18Noqa Pablo, makiywan escribimuykichej kay napaykuykunata. Carcelpi wisq'asqa kasqaymanta yuyarikuychej. Diospa khuyakuynin qankunawan kachun. Amén.

Currently Selected:

COLOSENSES 4: QCHSB

Highlight

Copy

Compare