1 TESALONICENSES 1

Pabloj napaykuynin

1Pablo, Silvanowan, Timoteowan ima, Tesalónica llajtayojkunaj iglesianman kay cartata escribimuyku, pikunachus Dios Tatawan, Señor Jesucristowan ima ujchasqas kashanku chaykunaman. Dios [Tatanchej, Señor Jesucristowan,] khuyakuyta, sonqo tiyakuytataj qankunaman qochun.

Tesalonicensespa fenin

2Tukuyniykichejmanta Diosman graciasta qoykupuni mañakuyniykupi qankunamanta yuyarikuspa. 3Dios Tatanchejpa ñaupaqempi mana samaspa, yuyarikuykupuni feniykichejpa ruwayninmanta, munakuywan llank'asqaykichejmanta, Señorninchej Jesucristopitaj, pacienciakuywan suyakusqaykichejmanta. 4Hermanos, Diospa munakusqasnin, yachayku paypa ajllasqasnin kasqaykichejta. 5Evangelioykoqa mana simillamantachu; astawanqa Santo Espíritoj atiynimpi qankunaman chayamorqa, sumaj cheqa yachachiypi. Yachankichej imayna allintachus qankuna ukhupi kausakusqaykuta qankunata munakusqaykurayku. 6Qankunataj noqaykumanta, Señormantapis yachakorqankichej ancha llakiypi. Santo Espíritoj kusikuyninwantaj Diospa palabranta jap'erqankichej. 7Chay jinamanta Macedoniapi, Acayapi ima, tukuy creejkunaman sumaj kausayniykichejta rikucherqankichej. 8Qankunanejta Señorpa palabran willarakorqa, mana Macedoniallapichu, jinallataj Acayapipis; astawanqa Diospi feniykichej tukuynejpi yachakorqa. Chaymantaqa mana imata ninayku kanchu. 9Paykunallataj noqaykumanta willanku imaynamantachus qankunaman yaykumusqaykuta, imaynamantachus qankunapis lantikunamanta kutirikusqaykichejta, kausaj cheqa Diosta kasunaykichejpaj. 10Willallankutaj qankuna janaj pachamanta Diospa Churinta suyashasqaykichejta, pitachus Dios wañusqakunamanta kausarichimorqa. Chaytaj Jesús. Pay jamoj k'ajaj phiñakuymanta salvawarqanchej.

Currently Selected:

1 TESALONICENSES 1: QCHSB

Highlight

Copy

Compare