COLOSENSES 2

1Yachanaykichejta munani may chhikatapunichus qankunarayku llakikusqayta; jinallatataj Laodiceapi kajkunarayku, uyayta manaraj rejsejkunaraykupis. 2Munani sonqosninku kallpachasqas kanankuta, munakuypi ujchasqas, qhapaj suyaytataj tarinankupaj. Ajinamanta Diospa pakasqa yachayninta rejsinankupaj. Chaytaj Cristo. 3Cristopi yachaypa, yuyaypatawan qhapaj kaynin pakasqa kashan. 4-5Kayta nini mana pipis k'acha palabraswan pantachisunaykichejpaj, imaraykuchus manapis qankunawanchu kashani. Chaywampis, espiritupi qankunawan khuska kashani, kusikuspa allin ruwasqaykichejta qhawaspa, Cristopi feniykichejwan sinch'ita sayasqaykichejta ima.

6Chayrayku imaynatachus Señor Jesucristota sonqoykichejpi jap'erqankichej, chayman jina paywan puriychej. 7Paypi saphinchasqas, allinchasqastaj kaspa, fepi wiñaychej, yachachisqas kasqaykichejman jina, Diosman ashkha graciasta qospa.

Cristopi tiyan mosoj kausay

8Allinta qhawakuychej, pajtataj pipis pantachisunkichejman llulla yachachiykunawan, qhasi mana kaj parlaykunawan ima. Paykunaqa mana Cristoj nisqantachu yachachinku, manachayqa ñaupa runaj yachachiyninman jinalla, kay mundopi runas yuyaychasqankuman jina.

9Kikin Diosqa Cristopi junt'a kashan. 10Cristopi tukuy ima tiyapusunkichej. Pay tukuy kamachejkunaj, jatun atiyniyojkunaj umantaj kasqanrayku. 11Jinallataj paypi circuncidasqas kankichej, mana makiwan ruwasqawanchu. Qankuna aychaj juchanta wijch'orqankichejña, Cristopi circuncidachikuspa. 12Bautizachikuspaqa Cristowan p'ampasqas karqankichej. Jinallatataj paywan kausarimorqankichej, creespa Dios atiyninwan wañusqakunaj chaupinmanta payta kausarichimusqanta. 13Qankunatapis juchapi wañusqas kashajtiykichej, aychaykichejpitaj manaraj circuncidasqas kashajtiykichej, Dios paytawan khuska kausarichimusorqachej, tukuy juchasniykichejta pampachaspa. 14Imachus leypi contranchejpi escribisqa karqa chayta, Dios yanqhayachispa picharparerqa. Chayta qhechuspataj cruzman clavaykorqa. 15Cristo cruzpi wañuspa atiparqa kamachejkunata, atiyniyojkunata ima, tukuypa rikunanta paykunata p'enqaypi rikhurichispa.

Janaj pachapi kaj imasta mask'ana

16Chayrayku ama pipis qankunata juchachasuchunchu mikhunamanta, ujyanamanta, chayri wata fiestamanta, killa fiestamanta, samarina p'unchaymanta ima. 17Chaykunaqa tukuy jamoj imaspa llanthun, iglesiataj Cristoj cuerpon. 18Ama pipis t'inkaykichejta qhechusuchunchu llamp'u sonqoman tukuspa, angelestataj yupaychaspa. Paykunaqa mana rikusqallankuman sat'ikunku, qhasi mana kajta runaykachankutaj sajra yuyayninkuman jina. 19Paykunaqa Cristota mana kasunkuchu. Cristoqa uma kasqanrayku iglesiata tukuy cuerponta jina mikhuchin, ankuswan t'inkispataj wiñachin Dios wiñayta qosqanman jina.

20Qankuna Cristowan wañorqankichejña, kay pachapi runakunaj yachachiyninta qhechuspa. Imaraykutaj chantá, mundojtapis kawajchej jina kamachisqasninta kasunkichejri? 21Chay kamachiykunaqa kaykuna kanku: Ama jap'iychu, ama llamiychu, nitaj llujchillaypischu. 22Cheqamanta tukuy kaykuna usuman jina chinkanan tiyan. Chaykunaqa runaspa kamachiynillan, yachachiynillan ima. 23Cheqamanta chaykunaqa cheqa yachayman rijch'akunku, Diosta yupaychaypi, sapa ujpa munayninman jina, llamp'u sonqo kaypi, aychata sinch'ita ñak'arichiypi ima. Chaywampis, chaykunaqa mana atipayta atinkuchu aychaj munapayayninta.

Currently Selected:

COLOSENSES 2: QCHSB

Highlight

Copy

Compare