COLOSENSES 1

Pablo napaykuynin

1-2Noqa Pablo, Diospa munayninrayku Jesucristoj apostolnin, hermano Timoteowan khuska, kay cartata escribimuni, Colosas llajtapi ajllasqas hermanos Cristopi kajkunaman. Khuyakuy, sonqo tiyakuytaj qankunapaj kachun, Dios Tatanchejmanta, [Señorninchej Jesucristomantawan.]

Pablo mañan Diosmanta creejkunapaj

3-4Qankunarayku graciasta qoykupuni Diosman, Señorninchej Jesucristoj Tatanman, uyarispa Cristo Jesuspi feniykichejmanta, Diospa ajllasqasnintapis munakusqaykichejmanta. 5Janaj pachapi suyakuyniykichejqa qankunapaj waqaychasqa kashan. Chaymantaqa uyarerqankichejña evangelioj cheqa kaj palabrannejta. 6Kay evangelioqa qankunakama chayamorqa, jinallataj tukuy mundontinman. Kaytaj poqon, qankunapipis wiñan, maypachachus Diospa khuyakuyninta cheqamanta uyarerqankichej, rejserqankichejtaj chay p'unchaymantapacha. 7Kayta yachachisorqachej munasqa hermanonchej Epafras. Pay llank'aj masiyku, Jesuspa sumaj kamachin qankunapaj. 8Noqaykumampis pay willawarqayku, Espiritupi munakuyniyoj kasqaykichejmanta.

9Chayrayku noqaykoqa qankunamanta uyarisqaykumantapacha, mana saqeykuchu Diosmanta mañakuyta, Diospa munayninta rejsispa junt'a kanaykichejpaj tukuy laya yachaywan, espiritupi unanchaywampis. 10Mañakuyku Señorpa munayninman jina purinaykichejpaj, tukuy imapi Diosta kusichispa, allin poqoyta apaspa, tukuy ima allin ruwaypi, ajinamanta wiñaspataj, Diosta rejsinaykichejpaj. 11Mañakullaykutaj tukuy atiyninwan kallpachasqas kanaykichejta, janaj pacha k'anchaynimpi atiyninman jina, tukuy imata jap'ikunaykichejpaj pacienciawan. 12Jatun kusiywantaj Dios Tataman graciasta qonkichej. Payqa wakichisorqachej chayaqeta jap'inaykichejpaj, Diospa ajllasqasninwan janaj pacha k'anchaypi. 13Dios, laqhaj atiyninmanta orqhospa, munasqa Churimpa reinonman pusawarqanchej. 14Paypi kacharisqas kanchej, juchasninchejtaj pampachasqas kanku.

Cristoj wañuyninrayku Dioswan allinyakunchej

15Cristoqa mana rikukoj Diospa rijch'ayninmin. Pay karqa tukuy ima ruwasqasmanta ñaupaj nacej. 16Paypi tukuy ima ruwasqa karqa patapi kajkuna, jallp'api kajkunapis; mana rikukojkuna, sut'ipi kajkunapis. Jinallataj tronospis, qhapaj suyuspis, kuraj kamachejkunapis, atiyniyojkunapis. Ajina tukuy ima ruwasqa karqa, paynejta paypajtaj. 17Cristoqa karqapuni manaraj imapis kashajtin. Paytaj tukuy imata sayachishan. 18Payqa cuerpoj uman, iglesia nisqajta. Paymin qallareyqa, tukuy wañusqasmanta ñaupaj nacej, tukuy imapitaj kamachej kanampaj. 19Dios Tatapaj allin karqa Jesusqa tukuy Diospa kayninwan junt'asqa kanan. 20Dios munarqa pay kikinwan allinyachiyta tukuy imata Cristonejta, jallp'api kajkunata, jinallataj janaj pachapi kajkunatapis; sonqo tiyakuy kanampaj Jesuspa yawarninrayku, cruzpi wañusqanraykutaj.

21Qankunapis jinallataj ñaupajta karqankichej, karunchasqas yuyayniykichejpi, Diospa enemigosnin, sajra imasta ruwaspa. Kunantaj Dioswan allinyasqasña kankichej. 22Cristoqa aycha cuerpoyoj kashaspa, wañuyninnejta Diosman qayllachisonqachej, llimphusta, mana juchayojta, mana k'aminatataj. 23Cheqamanta saphinchasqas sinch'ita sayaychej, fepi mana kuyuspa, evangelioj yuyayninta uyarisqaykichejpi. Kay evangeliomanta tukuy kay pachapi kajkunaman willakun. Noqa Pablopis chay evangeliomanta willanaypaj churasqa kani.

Pablo gentilesta yanapanampaj churasqa

24Kunanqa kusisqa kani, qankunarayku ñak'ariypi rikukuspa. Kay jinamanta aychaypi junt'ashani imachus pisisqanta Cristoj ñak'ariyninman cuerponrayku, chaytaj iglesia. 25Noqa iglesiata yanapanaypaj churasqa kani. Dios churawarqa qankunarayku, mana qhellakuspa Diospa palabranta willanaypaj. 26Chay pakasqa yachay, wiñaymantapacha ñaupa miraykunapi mana rejsisqachu karqa. Kunantaj sut'inchasqaña Diospata kajkunaman. 27Paykunaman Dios rejsichiyta munarqa chay pakasqa yachaypata qhapaj k'anchayninta gentiles ukhupi. Chay pakasqa yachaytaj karqa kikin Cristo. Paynejtataj suyankichej janaj pachaj k'anchayninta. Payqa qankunapi kashan.

28Kayta Cristomanta noqayku willayku tukuy runaman sonqochaspa, tukuy ima yachaypitaj yachachispa, sapa ujqa Cristopi allinchasqa kanampaj. 29Chayrayku noqapis llank'ani, maqanakuspa Señorpa atiyninman jina. Chay atiytaj noqapi maytapuni ruwashan.

Currently Selected:

COLOSENSES 1: QCHSB

Highlight

Copy

Compare