HECHOS 22

1Wauqekuna, kurajkuna ima, kay ñaupaqeykichejpi kutichikusqayta uyariwaychej, nispa.

2-3Hebreo parlaypi Pablota uyarispataj, astawan ch'inyarqanku. Pablotaj nerqa:

Noqa judío kani. Ciliciapi kaj Tarso llajtapi nacikorqani. Kay Jerusalén llajtapi wiñakorqani, yachachejniytaj Gamaliel karqa. Ñaupa tataspa tukuy kamachisqankuta allintapuni yachachiwarqanku. Tukuy sonqowantaj Diospa leyninta junt'arqani, imaynatachus qankunapis kunan ruwashankichej ajinata. 4Ñaupajtaqa qhatiykacharqani kay Mosoj Ñanta jap'ejkunata chinkachiyta munaspa. Qharista, ajinallatataj warmistapis carcelman wisq'aracherqani. 5Jatun sacerdotepis, kurajkunasnintin willasunkichejman cheqata parlasqayta. Paykunamanta qochikorqani cartasta Damascopi kaj judío masisninchejman apanaypaj, chaypi kajkunata presochaspa, Jerusalenman watasqasta apamuspa jasut'ichinaypaj.

Pablo creen Jesuspi

[Hch 9.1-19; 26.12-18]

6Damasco qayllataña rishajtiytaj, chaupi p'unchayta, ujllata janaj pachamanta uj jatun k'anchay muyuykuwarqa. 7Pampaman urmarqani, uyarerqanitaj nimuwajta: Saulo, Saulo. Imaraykutaj noqata qhatiykachashawankiri?, nispa. 8Noqataj nerqani: Pitaj kanki, wiraqochi? Paytaj kutichiwarqa: Noqa Nazaretmanta Jesús kani, pitachus qan qhatiykachashanki chay. 9Noqawan rejkunataj, cheqamanta k'anchayta rikorqanku, manataj parlamuwajta uyarerqankuchu. 10Chaymantataj noqa nerqani: Imatataj ruwasajri? Señortaj niwarqa: Jatarispa Damascoman yaykuy, chaypitaj nisonqanku imatachus ruwanaykita. 11Chay k'anchaytaj ciegoyachiwarqa. Chayrayku, noqawan kajkuna makiymanta aysaspa Damascoman pusawarqanku.

12Uj runa Ananías sutiyoj karqa, paytaj Diosta yupaychaj leyman jina. Damascopi kaj judiostaj, allin runapaj payta qhawarqanku. 13Ananiastaj watukuwaj jamorqa, ñaupaqeypi sayaykuspataj niwarqa: Hermano Saulo, qhawariy, nispa. Chay kikimpachataj qhawarerqani, paytataj rikorqani. 14Ananiastaj niwarqa: Tatasninchejpa Diosnin, ñaupajmantapacha qanta ajllasorqa, paypa munayninta yachanaykipaj, cheqan kajta rikuspa simimpa nisqanta uyarinaykipaj. 15Qanqa Jesusmanta runasman willamunki imatachus rikusqaykita, uyarisqaykitawan. 16Kunanqa, imatataj suyanki? Jatirispa bautizachikuy, juchasniykimanta llimphuchakuy Jesuspa sutinta oqharispa.

Pablo gentilesman rin

17Jerusalenman kutimuspa, templopi Diosmanta mañakushajtiytaj mosqoy jina jap'iwarqa. 18Jesustataj rikorqani. Paytaj niwarqa: Usqhayta kunampacha Jerusalenmanta llojsiy, imaraykuchus kaypi imatachus noqamanta willasqaykita mana uyarisonqankuchu, nispa. 19Noqataj kuticherqani: Señor, tukuyninku yachanku imaynatachus tukuynejman rispa sinagogaspi qampi creejkunata jap'ichispa maqachisqayta. 20Willajniyki Estebanta wañuchishajtinku pis, noqa chaypi paykunawan khuska kasharqani wañuchinankuta munaspa; chay wañuchejkunaj p'achasninkutapis qhawarqani. 21Chantá Jesús niwarqa: Puririllayña; karu llajtasman kachasqayki, nispa.

Pablota wisq'achinku

22Chaykama Pabloj parlasqanta uyarerqanku, chaymantataj qhaparqacharqanku: Wañuchun chay runaqa. Mana allinchu kanman kausananqa! 23-24Runas qhaparqachajtinku, p'achasninkuta choqaraspa, jallp'ata pataman qhallajtinkutaj, comandante cuartelman Pablota pusaykucherqa, chaypitaj jasut'ichispa rimarinampaj, yachayta munasqanrayku imamantachus chay jinatapuni Pabloj contranta qhaparqachasqankuta. 25Jasut'inankupaj watasqaña kashajtin, chay qayllapi sayashaj capitanman Pablo nerqa: Atikullanchu jasut'ichiy Roma llajtayojta manaraj allinta tapushaspa?

26Capitantaj chayta uyarispa comandanteman willamorqa, nerqataj: Allinta qhawakuy imatachus ruwasqaykita, imaraykuchus kay runaqa romano kasqa.

27Comandantetaj Pabloman qayllaykuspa taporqa: Niway, romanochu kanki?

Pablotaj, arí nerqa. 28Chantaqa comandante nillarqataj: Noqaqa romano kanaypaj ashkha qolqeta pagarqani.

Pablotaj kuticherqa: Noqatajrí, romano kani nacikusqaymantapacha.

29Chay kikimpachataj Pablota jasut'ejkuna ithirerqanku, astawanqa kikin comandante, Pablo romano kasqanta yachaspa mancharikorqa wataykuchisqanmanta.

Pablota Sanedrín jatun juntaman pusanku

30Q'ayantintaj comandanteqa, yachaytapuni munaspa imamantachus judíos ch'atasqankuta, Pablota phaskaracherqa. Chaymantataj kamacherqa tukuy kuraj sacerdotes juntaman tantakamunankuta, Pablotataj ñaupaqenkuman pusaykorqanku.

Currently Selected:

HECHOS 22: QCHSB

Highlight

Copy

Compare