HECHOS 23
23
1Pablotaj jatun juntapi kajkunata qhawarispa, nerqa: Wauqekuna, kunankama Diospa ñaupaqempi llimphu sonqoyoj kausakuni.
2Kuraj sacerdote Ananiastaj chay qayllapi kajkunata kamacherqa Pablota simimpi laq'anankuta. 3Pablotaj nerqa Ananiasman: Yurajchasqa perqa, qantapis Diosqa jinch'asonqa! Qanqa chaypi tiyashanki, leyman jina juzganawaykipaj. Kunantajchu leyta p'akispa jinch'achiwanki?
4Chay qayllapi kajkunataj Pabloman nerqanku: Ajinatachu Diospa kuraj sacerdotenta k'aminki?
5Pablotaj nerqa: Wauqekuna, mana noqaqa yacharqanichu pay kuraj sacerdote kasqanta; escribisqa kashan: Ama sajrata rimankichu llajtaykipi kamachejpajqa.
6Pablo yachaspa chay jatun juntapi wakin saduceos, wakintaj fariseos kasqankuta, sinch'ita qhaparerqa: Wauqekuna, noqa fariseo kani fariseoj wawan. Wañuymanta kausarimunapi suyasqayrayku noqata juchachashawanku.
7Chayta nisqantawan, fariseos, saduceoswan churanakuyta qallarerqanku, chay jawataj jatun juntapi kajkuna iskayman t'aqakorqanku. 8Saduceosqa ninku kausarimuy mana kasqanta, nitaj ángeles, nillataj almapis. Fariseostajrí kay tukuypi creenku. 9Tukuyninkutaj anchata ch'ajwarqanku. Fariseosmanta wakin leymanta yachachejkuna sayaykuspa manchayta siminakorqanku, nispa: Mana ima sajratapis kay runapi tariykuchu. Ichapis uj espíritu, chayrí uj angelchus payman parlanman karqa.
10Chay jinatapuni jap'inakojtinkutaj, comandanteqa manchachikorqa Pablota wañuchinankuta. Chayrayku soldadosta kamacherqa, chay runa chaupimanta orqhomuspa ujtawan cuartelman Pablota pusaykunankuta.
11Q'ayantin ch'isitaj Señor rikhurerqa Pabloman, nerqataj: Sonqochakuy, Pablo. Imaynatachus kay Jerusalempi noqamanta willarqanki, kikillantataj Romapipis willanki.
Pablota wañuchinankupaj wakichinku
12Q'ayantin paqarintaj wakin judíos, tantakuspa yachachinakusqanku, mana imata mikhunankuta, nitaj ujyanankuta, Pablota wañuchinankukama. 13Chay yachachinakojkunaqa, tawa chunka kuraj karqanku. 14Paykunataj tinkumorqanku kuraj sacerdoteswan, kurajkunawan ima, nerqankutaj: Noqayku parlasqaña kayku mana imata llaminaykupaj Pablota wañuchinaykukama. 15Kunanqa qankuna, jatun juntapi kajkunawan comandantemanta mañachiychej, Pablota pusachimunanta, astawan tapuyta munaj jinalla. Noqaykutaj, manaraj kayman chayamushajtin suyasqayku payta wañuchinaykupaj.
16Pabloj panampa churintaj, nisqankuta uyariytawan, cuartelman yaykuspa Pabloman willamorqa. 17Pablotaj ujnin capitanta wajyaspa nerqa: Kay waynata pusaykuripuway comandanteman, imatachá willanan tiyan.
18Capitantaj pusaykuspa, comandanteman nerqa: Presochasqa Pablo wajyachiwaspa mañawarqa kay waynata qanman pusamunayta. Paytaj imatachá willasonqa.
19Comandantetaj waynata wajnejman makinmanta pusaspa taporqa: Imatataj willanawayki tiyan?
20Waynataj payman nerqa: Judíos yachachinakunku qanmanta mañanankupaj Pablota q'aya jatun juntaman pusaykunaykita; payta astawan tapuyta munaj jinalla. 21Qanqa ama paykunata kasuychu. Tawa chunkamanta aswan ashkha qharis, ñampi pakaykukuspa Pablota suyanqanku. Paykunataj parlasqaña kanku mana mikhunankuta, nitaj ujyanankuta Pablota wañuchinankukama. Kunantaj wakichisqaña kanku chayta ruwanankupaj. Qampa ninallaykitaña suyashanku.
22Comandantetaj waynata kachaporqa: Ama piman imata ninkichu kay willawasqaykimanta, nispa.
Felixpaman pusanku Pablota
23Comandantetaj iskay capitanesta kamacherqa wakichinankuta iskay pachaj soldadosta Cesareaman rinankupaj; jinallatataj qanchis chunkata caballosniyojta, iskay pachaj lanzasniyojtawan, chay ch'isipacha isq'on horasta puririnankupaj. 24Kamachillarqataj wakichinankuta caballosta, Pablo rinampaj; sumaj waqaychasqa kamachej Felixpaman chayanampaj. 25-26Paykunawantaj Felixman apacherqa kay jina cartata: Noqa Claudio Lisias, qanta sumaj kamachej Félix, napaykamuyki. 27Judíos kay runata jap'ichispa wañuchinanku kashajtin, Roma llajtayoj kasqanta yachaspa, noqa soldadosniywan makisninkumanta qhechuni. 28Imamantachus ch'atayta munasqankuta yachayta munaspataj jatun juntankuman pusacherqani. 29Chaypitaj yacharqani leyninkoj imasnillanmanta ch'atasqankuta. Manataj paypeqa ima juchapis karqachu wañuchinankupaj, nitaj carcelman wisq'achinankupajpis. 30Wañuchinankupaj wateqasqankuta yachaspataj qanman pusachimushani. Payta ch'ataykojkunamampis nillanitaj, qampa ñaupaqeykipi uyanchanankuta.
31Kamachisqaman jinataj, soldados pusarqanku Pablota chay ch'isipacha Atípatris llajtaman. 32Q'ayantintaj chakipi rej soldados kutiriporqanku. Caballospi kajkunallaña Pablowan rerqanku. 33Cesareaman chayaspataj, kamachejman cartata jaywarqanku; Pablotataj entregarqanku. 34-35Felixtaj cartata leespa, Pablota taporqa maymantachus kasqanta. Ciliciamanta kasqanta yachaspataj, Pabloman nerqa: Qanta ch'atajkuna chayamojtinku uyarisqayki.
Chaymantataj kamacherqa wisq'anankuta Herodespa uyarinan wasipi.
Currently Selected:
HECHOS 23: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
