HECHOS 21

Pablo rin Jerusalenman

1Chanta hermanosmanta t'aqakuspa barcoman wicharerqayku, chaymantataj cheqanta rerqayku Cos llajtaman. Q'ayantintaj chayarqayku Rodas llajtaman, jaqaymantataj Pátara llajtaman. 2Patarapi tarerqayku Feniciaman rishaj barcota, chayman wicharispataj rerqayku. 3Rishaspataj Chipre churuta rikorqayku, lloq'e ladoman saqespataj Siriakama rerqayku. Tiro llajtaman chayaspataj uraykorqayku, imaraykuchus barcomanta cargata uraykuchinanku karqa. 4Yachachisqasta tarispataj paykunawan qhepakorqayku qanchis p'unchayta. Hermanostaj Santo Espíritoj atiynimpi Pablota jark'asharqanku, ama Jerusalenman wicharinanta. 5Chay qanchis p'unchaymantataj riporqayku. Tukuy hermanostaj warmisninkuwan, wawasninkuwan ima, noqaykuwan rerqanku llajta llojsiykama. Qocha cantopitaj qonqoriykukuspa Diosmanta mañakorqayku. 6Chaymanta sapa ujwan q'apinakuspa, barcoman wicharerqayku, paykunataj wasisninkuman kutiriporqanku.

7Tiromanta llojsispa Tolemaidaman chayarqayku. Ajinapi tukucherqayku jatun qochanejta puriyniykuta. Chaypi kaj hermanosta yanapaykorqayku, paykunawantaj uj p'unchayta qhepakorqayku. 8Q'ayantintaj, tukuy Pablowan kajkuna ima, Cesareaman riporqayku. Cesareaman chayaspataj, evangelista Felipej wasinman chayakorqayku. Payqa iglesiapi qanchis diáconos ajllasqamanta ujnin karqa. 9Felipejtataj tawa doncella ususisnin tiyarqa, paykunataj Diospa palabranta willaj kanku. 10Pisi p'unchaykunata kasqaykumantataj, Judeamanta Agabo sutiyoj profeta chayamorqa. 11Paytaj noqaykuta watukoj jamuspa, Pabloj chumpinta oqharispa, chakisninta makisnintawan wataykukuspa nerqa: Kay jinata Santo Espíritu nin: Ajinata kay chumpiyojta watanqanku judíos Jerusalempi, chaymantataj gentilesman entreganqanku, nispa.

12Chayta uyarispataj noqaykoqa, chaypi kaj hermanoswan ima, Pablota jark'arqayku Jerusalenman ama wicharinanta. 13Chaymantataj Pablo niwarqayku: Imaraykutaj chay jinatapuni waqaspa sonqoyta nanachishawankichejri? Noqaqa wakichisqa kani, mana watachikunallaypajchu, astawanqa, Jerusalempi wañunaypaj Señor Jesuspa sutinrayku.

14Manaña imaynapi Jerusalenman rinanmanta jark'ayta atispataj, saqellarqaykuña, Señorpa munaynin ruwakuchun, nispa.

15Chay p'unchaykuna qhepatataj, wakichikuytawan Jerusalenman wicharerqayku. 16Cesareamantapis wakin yachachisqas noqaykuwan rillarqankutaj, pusanawaykupaj Chipre llajtayoj Mnasompa wasinman, chayman chayanaykupaj. Payqa unayña creej karqa.

Pablo watukun Santiagota

17Jerusalenman chayajtiykutaj, hermanosqa tukuy sonqo wasinkuman wajyarikuwarqayku. 18Q'ayantintaj Pablo noqaykuwan rerqa Santiagota watukoj, chaymantaj tukuy ancianos tantakamorqanku. 19Napaykuspataj, paykunaman ujmanta uj willarqa, imastachus Dios ruwasqanta paynejta gentiles ukhupi. 20Chayta uyarispataj Diosta yupaycharqanku, nerqankutaj: Hermano, qan kikiyki yachashanki, may chhika waranqa judíos creejkuna kasqankuta. Tukuyninkutaj Moisespa leynintapuni kasuyta munanku. 21Qanmantataj uyarikun, gentiles ukhupi tiyakoj judiosta yachachisqaykita manaña kasunata Moisespa leyninta. Nillasqankitaj amaña wawasninkutapis circuncidanankuta, nitaj ñaupa usuman jina kausanankuta. 22Kunanqa, imaynataj kayri? Paykunaqa yachanqankupuni kayman chayamusqaykita, ashkhastaj tantakonqanku. 23Chayrayku kay nisqaykuta ruway. Noqayku ukhupi tawa qharis tiyan. Paykunaqa nisqankuta junt'ananku tiyan. 24Paykunawan khuska temploman yaykuspa llimphuchakuy, paykunapajtaj qolqeta churapuy, chujchankuta ruthuchikunanku paj. Ajinapi tukuy yachanqanku mana jinachu kasqanta qanmanta uyarisqankoqa. Astawanqa rikonqanku qampis leyta junt'asqaykita. 25Gentilesmanta creejkunaman, ñapis cartata apacherqaykuña, willachispa, lantikunaman jaywasqa aychata ama mikhunankuta, nitaj yawarta, nillataj jeq'eqasqa uywastapis, amataj qhenchachakunankuta.

26Ajinamanta, Pabloqa chay tawa qhariswan q'ayantin llimphuchakorqa. Chaypacha temploman yaykuspa willamorqa ima p'unchaytachus chay llimphuchakuy tukukunanta; chay qhepatataj Diosman jaywanankupaj ofrendata sapa ujninkumanta.

Pablota templopi jap'ichinku

27Qanchis p'unchay junt'akunan kashajtintaj, Asiamanta judíos templopi Pablota rikorqanku. Tukuy runata oqharichispataj Pablota presocharqanku. 28Qhaparispataj nerqanku: Israel runakuna, yanapawayku! Kay runa tukuynejpi yachachishan ayllunchejpa contranta, leypa contranta, temploj contrantapis. Astawanqa griegosta pusaykamuspa ch'ichichan kay santo lugarta.

29Chayta nerqanku, Pablota rikuspa Efeso llajtayoj Trofimowan purishajta. Chayrayku yuyarqanku payqa Trofimota temploman pusaykusqanta.

30Ajinamanta, tukuy llajtantin oqharikuspa, Pablota jap'iykorqanku, qhatatispataj templomanta orqhorqanku. Chay kikimpachataj punkusta wisq'ararqanku. 31Pablota wañuchinayashajtinku, soldadospa comandantenman willamorqanku tukuy Jerusalén llajta oqharikusqanta. 32Chay kikimpachataj, comandanteqa soldadosta capitanestawan pusarispa ch'ajwa chaupiman chayarqanku. Runastaj, comandanteta soldadostawan rikuspa manaña Pablota maqarqankuchu. 33Comandantetaj chimpaykuspa Pablota jap'icherqa, kamacherqataj iskay cadenaswan wataykunankuta. Taporqataj pichus kasqanta, imatachus ruwasqanta ima. 34Runakunataj qhaparisharqanku ujkuna uj jinata, ujkunataj uj jinata. Chay jinapuni ch'ajwa kasqanraykutaj, comandanteqa yachaspa imamantachus oqharikusqankuta Pablota cuartelman pusacherqa. 35Patillaskama chayaspataj, soldadosqa Pablota ayqecherqanku; runasqa wañuchej jina qhepankuta jamusharqanku. 36Ashkha runastaj, qhepankuta rispa qhaparqachasharqanku: Wañuchun!, nispa.

Pablo kutichikun

37Cuartelman pusaykushajtinkutaj Pablo nerqa comandanteman: Ujta nisuyta atiymanchu?

Comandantetaj nerqa: Griegota parlayta yachankichu? 38Manachu qan chay Egipto llajtayoj runa kanki? Manaraj unaychu ch'ajwata oqharichispa, tawa waranqa runa wañuchista ch'in pampaman qan pusarqanki.

39Pablotaj kutichispa nerqa: Noqa judío kani Tarso llajtamanta. Tarsoqa jatun llajta Ciliciapi. Kunanqa saqeway runakunaman parlajta; chayta mañarikuyki.

40Comandantetaj parlananta saqerqa. Pablotaj patillapi sayaykuspa, makinwan runasta ch'inyacherqa, hebreo parlaypitaj runasman nerqa:

Currently Selected:

HECHOS 21: QCHSB

Highlight

Copy

Compare