2 MACABEOS 9
9
Antíoco Epífanes wañupun
[1 Mac. 6.1-17; 2 Mac. 1.11-17]
1Chaypachallapitaj Antiocoqa runasninwan usqhayllata patan patanta ripusqanku Persiamanta. 2Antiocoqa yaykusqa Persépolis nisqa llajtaman. Chaypi munashasqa ch'inmanta apakapuyta templomanta imatachus munasqanta. Munasqataj llajtapi kamachiyta. Chayta yachaspa, runasqa oqharikusqanku maqanasninkuwan, ayqechisqankutaj Antiocota. Antiocotaj, chay jinamanta llajtamanta runas ayqechisqankurayku, p'enqaywan ripusqa. 3Ecbatana llajtapi kaspataj, Antiocoman willaykusqanku imatachus pasasqanta Nicanorman, Timoteoj runasninman ima. 4Antiocoqa, may phiñasqa yuyashasqa judiosta castigayta, persas payta ayqechisqankumanta. Chayrayku, nisqa carrota purichejman, mana samaspa purichinanta, Jerusalenman chayanankukama. Diospa castigonqa payta qhatirisharqaña, wapuyaspa nisqanrayku: Jerusalenman chayaytawan, chay llajtataqa judío panteonman tukuchisaj, nispa.
5Tukuy imata rikoj Israelpa Diosnin payta wajtasqa uj mana jampikoj mana rikukojtaj onqoywan. Chayta niytawankamataj, ujta wijsan may sinch'itapuni nanaykun ch'unchulasninta q'awichispa. 6Cheqamanta, maychus kajllata jap'ikun payqa, imaraykuchus chay jinamantapuni nanaykucherqa wajkunaj ukhusninkuta. 7Chaywampis, Antiocoqa manapuni phiñakuyninta thañichisqachu. Wapu wapulla, k'ajaj phiñakuywan judiosata chejnillajpuni. Nisqataj carrota purichejman apurakunanta. Carrotaj anchata phawashajtin, ujta Antiocoqa carromanta urmaykusqa. Laq'akusqanmantataj, chakisnin makisnin, tukuy tullusnimpis q'alata p'akirakusqanku. 8Payqa ñaupajta, runa kayninmanta aswan pataman oqharikuspa, yuyasharqa atisqanta qocha yakusta kamachiyta. Yuyasharqataj atisqanta aysayta uj romanallawan jatuchaj orqosta. Kunanqa, pampaman urmasqanrayku, wantupi apasqa kanan tiyan. Ajinamanta tukuy runasqa sut'ita rikunku Diospa atiyninta. 9Chay rumi sonqo runaj ukhunmantaqa khurus yupata llojsimoj. Kausashajtinraj, aychan t'aqakoj, anchata payta nanaykuchispa. Asnamusqantaj tukuy soldadosta ayqechisharqa. 10Ñaupajta, chay runaqa yuyasharqa atisqanta ch'askasman chayayta. Kunanqa, mana ni pi, ni wantullapipis pusayta atishanchu, anchatapuni asnasqanrayku.
11Chantaqa, chay sinch'i llakiynimpi k'umuykuchiyta qallarisqa wapu kayninta. Diospa jasut'iykusqanwantaj umachakuyta qallarisqa. 12Chay phututuynin kikin paypajpis anchaña karqa. Chaymantataj sonqompi nisqa Antiocoqa: Runaqa Diospa urampipuni kanan tiyan. Wañoj runaqa mana yuyananchu tiyan Dios jina kasqanta, nispa. 13Chaymantataj, chay sajra runaqa, Diosmanta mañakusharqa, Diostaj mana uyarinmanñachu kasqa. 14Antiocoqa nisqa ari Diospa ajllasqan llajtata mana ni imata ruwananta. Ñaqhallaraj pay kikin munasharqa chay llajtata t'unarparichiyta aya p'ampanaman tukuchispa. 15Ñaupajta yuyashasqa mana p'ampaykuyta judiostaqa, manachayqa paykunata wijch'uykuyta wawasninkuwan khuska, alqamaristaj monte animalestaj mikhuranankupaj. Kunantaj, yuyashan Atenas llajtayojkuna jina qhawasqas kanankuta. 16Ñaupajta, tukuy ima atisqanta santo templomanta apakapusqa. Kunantaj nishan munasqanta chay templota sumajta k'achanchachiyta. Chantataj nishan munasqanta kutichipuyta suwakapusqan chay k'acha vasosta. Nishantaj munasqanta astawan yapaykuyta chay vasosmanqa. Chantá, nishan qolqeta qonanta rikuchikuspaj. 17Nishantaj pay kikin judioman tukunanta, rinantataj tukuynejman Diospa atiyninta willaraspa. 18Nanaynin manapuni thañishasqachu. Diospa cheqanyachiynin patanman urmasqa ari. Mayta llakiynimpi waqaspataj, judiosman uj cartata apachimusqa kay jinata nispa:
19Noqa rey Antíoco, qankunaj kamachejniykichej, napaykuykichej qankunata, k'acha sonqo judío wiraqochis. Allin kausay kachumpuni tukuy qankunapaj. 20Qankuna, wawasniykichejwan khuska, allinta kausakuychej. Tukuy ima kachun munasqaykichejman jina. Noqaqa sonqoyta Diosninchejpi churani. 21Ajinamanta ari, yuyarikunipuni imaynatachus qankunaqa sumajta recibiwarqankichej qankuna ukhupi kashajtiy. Persiamanta kutimuspa sinch'i onqoywan urmani. Kunanqa munani tapukuyta imaynatachus tukuy qankuna kashankichej. 22Noqaqa mana anchatapuni llakikushanichu kay jinata onqosqa kasqaymanta. Manachayqa, nishanipuni sanoyanayta. 23Jinapis, yuyarikuni imaynatachus tatay, rinan kashajtin maqanakoj pata cheqasman, ajllayta yachaj pitachus cuentanmanta kamachinan karqa chayta. 24Ajinamanta ari, ima laya llakiy jamojtimpis, tukuy yachanqankuña pitaj kamachishan. 25Yachallanitaj muyuyninchejpi kashanku chay kamachejkuna munasqankuta llajtanchejman yaykuyta ima ratotachus atenqanku chaypacha. Chayrayku, cuentaymanta rey jinata saqeshani waway Antiocota. Waj kutisña, patasman rinay kajtin, payta saqerqaniña noqaj sutiypi qankunata kamachinampaj. Paymampis uj cartata escribimuni. Chay cartataqa qankunamampis apachimullashanitaj. 26Kunanqa tukuy sonqo mañakuykichej wawayta kasukunaykichejta, imaynatachus noqata kasukuwarqankichej ajinata. 27Payqa noqa jina k'acha sonqo runa kanqa, qankunatataj munakusonqachej. 28Ajina ari, chay runa wañuchi pichus Diospaj sajrata parlarqa, wañuyman chayarqa nacekusqan llajtanmanta may karupi, pata orqospi, ñak'arispa imaynatachus wajkunata ñak'aricherqa ajinata. 29Amigon Filipoqa ayanta apakaporqa. Chay Filipoqa manapuni munakorqachu Antíokoj wawanta. Chayrayku riporqa Egiptoman, rey Tolomeo Filometorpaman.
Currently Selected:
2 MACABEOS 9: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.