2 MACABEOS 10
10
Templota llimphuyachinku
[1 Mac. 4.36-61]
1Macabeoqa, paywan khuska kajkunawantaj, Señorpa yanapayninwan ujtawan jap'ikaporqanku templota, Jerusalén llajtatawan. 2Chantaqa, t'unarparicherqanku altarkunata, mana creejkuna plazapi sayarichisqanku chaykunata. T'unarparichillarqankutaj santo cheqaspi churasqanku chay altarkunatapis. 3Chaymantataj, templota llimphuyachiytawanqa, waj altarta sayaricherqanku. Chantá, iskay rumita khituspa, ninata rikhurichimorqanku. Chantá, iskay watamanta Señorman rikuchikusta jaywarqanku, ñaupaqempitaj churarqanku k'anchanasta rikuchiku t'antastawan. 4Chayta ruwaytawantaj, paykuna pampaman k'umuykukuspa Diosmanta mañakorqanku amaña ujtawan chay jina llakiypi paykunata urmajta saqenanta. Nerqankutaj sichus juchallikunkuman chayqa, paykunata k'acha sonqowan k'aminanta. Nerqankutaj ama paykunata jaywananta chay mana creejkuna runasman, mana khuyakoj k'ita runasman, pikunachus Diospaj sajrata parlaj kanku, chaykunaman. 5Chay karu llajtayojkuna templota ch'ichichasqanku ñaupaj watapi iskay chunka phishqayoj kaj diapi, Quisleu nisqa killamanta. Chay kikin diallapitaj judiosqa llimphuyacherqanku templota. 6Jatun kusikuywantaj judiosqa fiesta ruwarqanku pusaj diata, ramadas fiestapi jina. Yuyarikorqankutaj imaynatachus qanimpalla chay fiestapajqa orqospi kasharqanku, t'oqospi, k'ita animalkuna jina. 7Chantaqa uj procesionta ruwarqanku apaspa poqoykunata, t'ikasta palmastawan. Rispataj Diosman takikorqanku agradecekuspa templonta chay jina sumajta llimphuyachisqanmanta.
8Chaymantataj, tukuyninku tantaykukuspa nerqanku chay kutimantapacha mundontimpi kaj judiosqa fiestata ruwananku kasqanta chay diaspi.
Tolomeo wañupun
9Ajina ari wañuporqa Antíoco, Epífanes nisqa. 10Kunanqa parlarikusun Antíoco Eupatormanta, chay rumi sonqo Antíoco Epifanespa wawanmanta. Willasuntaj ima sajrakunatachus jamusqanta chay ch'ajwaswan. 11Antíoco Eupatorqa reyman tukuspaña, ajllasqa uj runata, Lisias sutiyojta, jatun kamachej kanampaj. Lisiasqa kamachej karqa Celesiriapi Feniciapitaj. 12Tolomeotaj, Macrón nisqa, cheqan sonqoyoj qhawasqa nin judiosta, phiñakuspa mana allintachu ñaupajta paykunata qhawasqankumanta. Tolomeoqa munashasqa tukuy imata paykunapaj k'achata ruwayta. 13Chayraykoqa, reypa amigosnin Tolomeota ch'ataykusqanku reypa ñaupaqempi. Tukuynejpi runasqa nisharqanku pay q'ewakusqanta, Chipremanta llojsimuspa. Filométor nisqa Tolomeoman Chipreta qhawananta. Uyanchasqankuta Antíoco Epifanesman ripusqanmanta. Mana atispataj respetachikuyta munasqanman jina, Tolomeoqa venenota tomaspa wañusqa.
Idumeosta atipanku
[1 Mac. 5.1-8]
14Jamusqataj kamachinampaj uj general Gorgias sutiyoj. Payqa jamusqa waj llajtayoj soldadoswan. Sapa munarispa Gorgiasqa llojsisqa judioswan maqanakoj. 15Chantaqa, chay kutillapitaj idumeosqa jark'ana wasisninkumanta toreyaj kasqanku judiosta. Chantapis, recibillasqanku runasta Jerusalén llajtamanta ayqesharqanku chaykunata. Munasharqankupunitaj ch'ajwan kananta. 16Macabeoswan khuska kashajkunataj, Diospa yanapayninta mañakuytawantaj, llojsisqanku idumeoswan maqanakoj. 17Sinch'is kallpawan yaykuspataj ayqechisqanku idumeosta jark'anasninkumanta, wañuchisqankutaj yaqha iskay chunka waranqa runasta. 18Isq'on waranqa runasmanta astawan pakaykukusqanku iskay altospi, tukuy imata apakuspa sayarinallankupajpuni. 19Macabeoqa ajllasqa Simonta, Joseta, Zaqueotawan, rinankupaj idumeoswan maqanakoj. Saqesqataj soldadosta necesitasqanman jina. Paytaj waj ladosman ripusqa, maypichus payta wajyasharqanku chayman. 20Chantaqa, wakin Simompa soldadosnenqa, qolqeta munapayaspa, lluk'iykuchikusqanku. Ajinamantataj, isq'on chunka waranqa dracma qolqeta qochikuspa, saqellasqanku wakin runas ayqekapunankuta. 21Macabeotaj, yachaspa imachus pasasqanta, wajyachimusqa generalesta, ñaupaqenkupitaj willasqa imatachus chay runas ruwasqankuta, qolqerayku llojsichisqankuta contrasninkuta, chaykuna kachaykukunankupaj judiospa contrampi. 22Chaymantataj, paykunataqa wañuchichisqa runa masisninkuta wasanchasqankumanta. Chantá, pay kikin kachaykukusqa chay iskay torresta jap'ikapoj. 23Chay iskay torrespitaj iskay chunka waranqa runasmanta astawan, wañuchisqas kasqanku.
Judasqa Timoteota atipan
24Timoteotaj, pichus ñaupajta atipachikusqa judioswan, kunanqa jamushasqa waj llajtayoj soldadoswan. Apamushasqataj Asiamanta caballostapis. Ajinamantaqa, munashasqa Judeata jap'ikapuyta. 25Qayllasqantaña yachaspa, Macabeoj runasnin, Diosmanta mañakusqanku, umasninkumantaj jallp'ata churakusqanku, qhashqa p'achawantaj p'achallikusqanku. 26Qonqorikuspataj altarpa chakinman, Diosmanta mañakusharqanku paykunata k'acha ñawiwan qhawananta. Mañakusharqankutaj nispa Diosqa judiospa contrasninkojpata contrankullamantaj tukunanta. Nisharqankutaj Diosqa oqharikunanta maqanakoj pikunawanchus judiospa contrampi oqharikunku chaykunawan, leypa nisqanman jina. 27Mañakusqankumantataj maqanaku armasninkuta jap'ispa, llajtamanta llojserqanku, karumantaj chayarqanku. Chayaspataj maypichus contrasninku kasharqanku chayman, chay qayllapi sayarqanku. 28Inti k'anchaykamushajtinña, iskay t'aqas tinkunakoj llojsisqanku. Ujnin t'aqaqa, atipasaj, nisqa, kallpankupitaj Señorpitaj suyaspa. Ujnintaj nishasqa atipananta, sonqonta churaspa kikin phiña kaynimpi.
29May sinch'itapuni maqanakushajtinkutaj, ujta janaj pachamanta rikhurimunku, contraspa ñaupaqenkupi, phishqa wiraqochis caballospi. Chay caballospa aysanasninkoqa qorichasqas kasqanku. Chay phishqa wiraqochistaj judiospa ñaupaqenkuta rishasqanku. 30Chay wiraqochisqa Macabeota churarqanku chaupinkupi, paytataj jark'arqanku kikin jark'anasninkuwan, mana ni ima nasqa kanampaj. Wijch'usharqankutaj t'ojsinastawan flechastawan enemigosninkuman. Chaykunataj, mana rikuytapis atispa, mushphasqas, kayman jaqayman ch'eqerakorqanku. 31Ajinamantataj, iskay chunka waranqa phishqa pachajniyoj chakipi rej soldadosqa qholusqas wañorqanku. Chaymantataj, sojta pachaj soldadospis caballopi rejkunamanta. 32Timoteotaj ayqesqa Gezerman. Chaytaj sumaj jark'asqa kasqa. Chaypitaj kamachej kasqa uj general Quereas sutiyoj. 33May kallpachasqas Macabeoj runasnin chay sumaj perqachasqa wasimanqa tawa día junt'ata yaykuyta munasharqanku. 34Ukhupi kajkunataj, yuyaspa chay waseqa sinch'itapuni sayasqanta, mana sayk'uspa Diospaj rimashasqanku, millay palabrastataj nishasqanku. 35Phishqa kaj p'unchay paqarimuytawantaj, iskay chunka waynas, Macabeowan rejkunamanta, may phiñasqas chay jinata enemigosninku rimasqankumanta, tukuy sonqo kachaykukusqanku perqasman. Mana manchachikuspataj sinch'i rabiawan wañuchisqanku ñaupaqenkupi rikhurimojkunata. 36Wajkuna, kikillantataj waj ladontañataj lloq'aykusqanku, tinkunakusqankutaj ukhupi kajkunawan, larwachisqankutaj chay torresta, enqhaykuspataj ninawan jap'iykuchisqanku chay Diospaj rimajkunata, kausashajta. 37Timoteoqa pakaykukusqa uj pujyupi. Chaypi tarispa. wañuchisqanku. Chantaqa, wañuchillasqankutaj paypa hermanon Quereastawan, Apolofanestawan. 38Tukuy chay ruwasqankumantawanqa, takispataj qhaparispataj Diosta alabasqanku, Israelta chay jinatapuni yanapasqanmanta, paykunata atipachisqanmantataj.
Currently Selected:
2 MACABEOS 10: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.