2 MACABEOS 8
8
Judas Macabeo oqharikun
1Chaypacha, Judas, Macabeo nisqa, payta qhatejkunawan khuska, pakayllamanta yaykoj kasqanku ranchosman. Tantaykamusqankutaj sojta waranqa runasta, ayllusninkumanta, judío religionman k'askasqas kajkunamantawan. 2Paykunaqa Señormanta mañakoj kanku qhawananta chay aylluta, tukuyninku sarusharqanku chayta. Mañakojtaj kanku khuyakunanta templomanta, mana creejkuna runas ch'ichisharqanku chaymanta. 3Mañakojtaj kanku raqayman tukuchisqa llajtapaj. Yuyashasqanku ari chejnikojkuna munashasqankuta q'alata pampachayta. Chantapis, mañakojtaj kanku uyarinanta wañusqas payta qhaparikusqankuta. 4Chaymanta, nisqankutaj yuyarikunanta mana juchayoj wañuchisqa wawasmanta. Yuyarikunantataj paypaj sajrata rimasqankumanta. Nillarqankutaj rikuchinanta sajra kajta chejnikusqanta. 5Macabeoqa runasninta sumajta wakichisqa maqanakupaj. Chaymantapacha manaña atipachikojchu kanku mana creejkuna runaswan. Señorpa phiñakuynenqa khuyakuyman tukusqa ari. 6Macabeoqa runasninwan ch'inllamanta ujta chayamoj kanku llajtasman ranchosmantaj, chaytataj ankhaykoj kanku. Chantaqa, jap'ikapoj kanku maqanakupaj ajllasqa cheqasta. Ayqechejtaj kanku ashkha runasta. 7Astawanraj chaytaqa ruwaj kanku ch'isispi. Ajinamanta, Macabeoj t'ukuna ruwasqasnin tukuynejpi rejsisqa karqa.
Nicanorwan Gorgiaswan Judeaman chayamunku
[1 Mac. 3.38-45]
8Felipetaj rikusqa Judas Macabeo pisimanta pisi astawan jatunyasqanta. Maqanakuspi Judas Macabeoqa atipashasqapuni. Chayrayku Filipoqa nichimusqa Tolomeoman jamunanta yanapaj reypa kapuynin mana chinkachisqa kanampaj. Tolomeoqa jatun kamachej karqa Celesiriapitaj Feniciapitaj. 9Tolomeoqa chaypacha ajllakusqa ujnin amigonta, Patrocloj wawan Nicanorta kachaykukunampaj Judeaman iskay chunka waranqa runaswan, judiosta atipanankupaj tukuchisqas kanankukama. Chay runasqa ashkha nacionesmanta karqanku. Nicanorwan khuska rinampajtaj, Tolomeo ajllasqa Gorgiasta. Chay Gorgiasqa karqa uj general, sumaj wakichisqa maqanakuspaj. 10Rey qonan kasqa iskay waranqa talento nisqa qolqeta romanosman. Nicanortaj yuyashasqa vendeyta judiosta, chay qolqewan reypa manunta paganampaj. 11Chantaqa, Nicanor willachimusqa jatun qochaj chimpapi kashaj llajtasman jamunankuta judiosta rantikoj wata runaspaj. Nichimusqa vendesqanta uj talentollapi isq'on chunka judiosta. Nicanorqa manapuni yuyashasqachu Diospa phiñakuynin patanman urmayashasqantaña.
12Judas Macabeotaj yachasqa Nicanor jamushasqanta. Chaypachallataj runasninman willasqa Nicanorpa soldadosnin qayllamushasqankuta. 13Chayta uyariytawantaj, pisi sonqoyojkuna, mana Diospi sonqonkuta churajkuna ima, ayqekapusqanku. 14Wajkunataj puchusqanmanta kapuyninkuta venderqanku. Mañakorqankutaj Diosmanta tukuy paykunata mana creej Nicanormanta jark'ananta. Nicanorqa paykunata vendesqa ari manaraj tinkuman rishajtinku. 15Nisharqankutaj mana paykunaraykuchu chayta ruwananta, manachayqa chay tratorayku ñaupa tatasninkuwan ruwarqa chayrayku, qhaparikusqankuraykutaj paypa may jatun sutinta.
Judiosqa Nicanorta atipanku
[1 Mac. 3.46-60]
16Chaymantataj Macabeoqa tantaykamorqa sojta waranqa runasninta, nerqataj ama llauch'iyanankuta contrankupi jamojkunaj ñaupaqenkupi. Nisqataj ama manchachikunankuta chay ashkha paganosmanta, qhasillamanta jamusharqanku maqanakoj chaykunamanta. Nisqataj sinch'i sonqoyoj rinankuta maqanakoj. 17Chaymanta, nillasqataj yuyarikunankuta imaynatachus chay runasqa ch'ichichasqankuta templota, yuyarikunankutataj llajtankuta chay jinatapuni llakichisqankumanta. Chantapis, nillasqataj yuyarikunankuta chay runasqa costumbresninkuta chinkachiyta munasqankumanta. 18Nerqa ari Macabeoqa: Paykunaqa wapuyashanku sonqonkuta churaspa maqanakunasninkupitaj, umachakuyta yachasqankupitaj. Noqanchejrí sonqonchejta churanchej Tukuy Atiyniyoj Diosninchejpi. Paymin uj simillawan atin atipayta contranchejpi jamushajkunatawan, mundontimpi kaj runastawan, nispa. 19Yuyaricherqataj imaynatachus Diosqa unay wataspi yanaparqa ñaupa tatasninkuta. Yuyarichillarqataj Senaquerib kamachishajtin, Diosqa chinkachisqanta Senaqueribpa pusaj chunka phishqayoj waranqa runasninta. 20Ajinallatataj, yuyaricherqa imaynatachus Babiloniapi judiosqa maqanakorqanku galataswan. Chaypi pusaj waranqa judiosqa yanapasqanku maqanakupi tawa waranqa macedoniosta. Chaypacha, macedoniosqa atipachikushajtinkuña, chay pusaj waranqa judiosqa, Diospa yanapayninwan, pachaj iskay chunka waranqa runasta atipasqanku, kapuyninkumantataj ashkhata apakapusqanku. 21Ajinamanta Macabeoqa nisqasninwan kallpacharqa runasninta, nispa wakichikunankuta wañunankupaj leyesninkurayku llajtankuraykutaj. Chaymantataj, tukuy runasta tawa t'aqapi churarqa.
22Ujnin kaj t'aqata kamachinan karqa Judaspa wauqen Simón. Ujninta kamachinan karqa wauqen José. Ujnintari wauqen Jonatán. Sapa uj karqa waranqa phishqa pachaj runasniyoj. 23Kikin Judas Macabeo ñaupaj kaj t'aqata kamachinan karqa. Nerqataj Judas Macabeoqa Azariasman santo librota leemunanta. Chaymantataj, Diospa yanapayninwan!, nispa, kachaykukorqa Nicanorwan tinkukoj. 24Tukuy atiyniyojqa paykunata yanaparqa maqanakupi. Paykunataj wañucherqanku isq'on waranqa soldadosmanta astawan. Nanaykucherqankutaj, qholurparerqankutaj yaqha tukuy Nicanorpa soldadosninta. Tukuyninkutataj ayqericherqanku. 25Chantataj, judiosqa jap'ikaporqanku chay qolqeta imatachus chay runasqa apamusqanku judiosta rantinankupaj. Unaytaña qhatisqankumanta, judiosqa kutimpusqanku ch'isiyamushajtinrayku. 26Q'ayantin samarina día karqa. Chayraykoqa, paykunata manaña qhatiykorqankuñachu. 27Qotuytawanqa maqanasta, contrasninku saqerparisqanku chaykunata, tukuy imata pallakapusqanku. Chaymantataj, qallarisqankuña sabadota waqaychayta Señorta yupaychaspa. Agradecekorqankutaj Señorqa chay diakama paykunata qhawasqanmanta. Qallarisqaña ari paykunaman khuyakuyninta rikuchiyta. 28Samarina pasaytawankamataj, jap'ikapusqankumanta qorqanku mask'asqas karqanku chaykunaman, warmi sapasman, wajcha wawasmampis. Puchusqantataj, paykuna wawasninkupis apakaporqanku. 29Chaymanta, ujllapi tantaykukuspa, khuyakoj Señormanta mañakorqanku allinyakapunanta.
Judiosqa Timoteotawan Baquidestawan atipanku
30Maqanakuspataj Timoteowan Baquideswan ima, iskay chunka waranqa soldadosta wañucherqanku. Chaymanta, jap'ikaporqanku pataspi kashaj jark'anasta. Chantaqa, iskaymanta partisqanku jap'ikapusqanku chayta. Ujnin paykunapaj karqa, ujnintaj wajcha wawaspaj, warmi sapaspaj, machu runaspaj ima. 31Maqanasta sumajta jallch'asqanku ajllasqa cheqaspi. Wajkunatataj apakapusqanku Jerusalén llajtaman. 32Chaymanta, wañuchisqanku Timoteoj soldado tropasninta kamachejta. Chay runa may sajra karqa, anchatapunitaj ñak'aricherqa judiostaqa. 33Jerusalén llajtapitaj, fiestata ruwashajtinku atipasqankumanta, ruphaykuchisqanku pikunatachus templo punkusta enqhaykorqanku chaykunata, Calistenestawan, pichus uj ch'ullapi pakakushasqa, chayta. Ajinamanta, Calistenesqa pagota jap'ikorqa sajra ruwasqanmanta.
Nicanorqa ayqekapun
34Kunanqa, yuyarikusunchej Nicanormanta, chay kinsa kuti sajra runamanta. Payqa ari apachimusqa waranqa qhatukoj runasta, judiosta rantikunankupaj. 35Señorqa munasqanrayku, chay Nicanorta pampaman k'umuykucherqanku pikunachus paymanta qhesachasqas karqanku tukuy runasmanta astawan. Nicanorqa manaña k'acha p'achasniyoj karqachu. Sapallan ayqesharqa kayman jaqayman camposninta. Chaymanta, Antioquía llajtaman chayasqa, aswan suerteyoj kaspa atipachikusqanku soldadosninmantaqa. 36Pichus nisqa romanosman manuta pagakapunanta Jerusalenmanta judiosta vendesqanwan, kunanqa willashan judiosata uj jark'akoj yanapasqanta, imaraykuchus judiosqa junt'anku chay yanapajpa kamachisqanta.
Currently Selected:
2 MACABEOS 8: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.