2 CORINTIOS 7

1Munakusqasníy, imatachus Dios qosqaykichej nisqanqa tiyapuwanchej; chayrayku cuerponchejta, espiritunchejtapis llimphuchakuna tukuy ch'ichi kajmanta. Diosta manchachikuspa juchamanta t'aqakuna tukuy atisqanchejta.

Corintopi tiyakojkuna Diosman kutirikunku

2Uyariwayku; mana pitapis ima sajrata ruwaykuchu, nitaj pantacherqaykuchu, nitaj ch'aukiyarqaykuchu pitapis. 3Kaytaqa mana juchachanayraykuchu niykichej, imaynatachus ñaupajtaña nerqani. Qankunaqa sonqosniykupi kashankichej, khuska kausananchejpaj, wañunanchejpajpis. 4Qankunamanqa sut'inta parlaykichej. Qankunamanta may sonqo junt'asqa kani. Tukuy llakiyniypitaj may sonqochasqa, kusiyniyojtaj kani.

5Macedoniaman chayamusqaykumantapacha, mana imaynata samarikorqaykuchu, astawanqa imaymana llakiykuna jamuwarqayku; jawamanta ch'ajwas, ukhumantataj manchachikuykuna. 6Chaywampis, Dios yachan llakisqasta sonqochayta. Noqaykutapis sonqochawarqayku Titoj chayamusqan. 7Mana chayamusqallanwanchu, astawanqa qankunamanta sonqochasqa kasqanrayku; paytaj willawarqayku rikuyta munawasqaykuta, waqasqaykichejta, noqamantapis llakikusqaykichejta ima. Chaytaj astawan kusichiwarqa.

8Escribimusqay cartawan llakicherqaykichej, chaymanta kunanqa mana llakikunichu; chaypacha llakikorqani, yachaspa chay cartaqa llakichisusqaykichejta, manataj unaytachu llakichisorqachej. 9Kunanqa kusikuni, mana qankunata llakichisqayraykuchu, imaraykuchus chay llakeyqa, juchamanta Diosman kutirinaykichejpaj karqa; chaykunata jap'erqankichej Diospa munasqanman jina. Chayrayku noqaykumantaqa mana ima sajratapis jap'erqankichejchu. 10Diospa munasqanman jina llakikoyqa, juchamanta Diosman kutirispa salvakunapaj. Chaymantaqa, mana llakikunachu, astawanqa kay mundoj llakiynin wañuyta apamun. 11Kay llakiyta jap'erqankichej Diospa munasqanman jina. Qhawaychej mashkha phutichikuytachus apamusunkichej: Kutichikuyta, phiñakuyta, mancharikuyta, k'ajaj munakuyta, atipanakuyta, jasut'iyta ima; chay tukuypi rikusqas kankichej mana juchayoj llimphus. 12Ajinaqa, cartata escribimushaspaqa, mana chay juchallikojpichu yuyarqani, nitaj chay runaj llakikusqampichu; astawanqa yachanaykichejpaj llakikusqaykuta qankunamanta yuyarikuspa Diospa ñaupaqempi. 13Chayrayku, sonqochakuyku qankuna sonqochasqas kasqaykichejwan.

Jinallataj Tito kusisqa kasqanmanta kusikuyku. Qankunataj kallpachankichej sonqonta. 14Sichus Titowan kusikorqani chayqa, mana p'enqakorqanichu qankunamanta. Tukuy ima cheqa kajta parlarqayku, Titowan kusikusqaykoqa cheqapuni karqa. 15Paypa munakuynenqa may jatumpuni qankunapaj. Sapa kuti yuyarikun kasukoj kasqaykichejmanta, imaynatachus chayamushajtiy jap'iwarqankichej, manchachikuywan, kharkatitiywantaj. 16Kusikuni tukuy imapi qankunapi confiasqaymanta.

Currently Selected:

2 CORINTIOS 7: QCHSB

Highlight

Copy

Compare