2 CORINTIOS 8
8
Tukuy sonqo wajkunaman qona
1Kunanqa, hermanos, willayta munayku qankunaman, Dios rikuchisqanta khuyakuyninta Macedoniapi kaj iglesiasman. 2May phutiykunapi kashajtinku, may kusikuyniyoj karqanku; wajchas kashaspapis qorqanku tukuy sonqo, qhapajyarqankutaj sumaj sonqowan qosqankurayku. 3Noqa rikorqani, paykunaqa kallpankuman jina atisqankuta qorqanku, kallpankumantapis astawanraj. 4Maytapuni paykuna niwarqayku chay yanapata jap'inaykuta, hermanosman apanaykupaj. 5Mana suyasqaykuman jinachu karqa, astawanqa paykunaraj ñaupajta Señorman jaywarqanku, chaymantataj noqaykuman Diospa munasqanman jina. 6Chaymanta Titota nerqayku, imaynatachus pay qallarerqa ñaupajta ofrendata oqhariyta, ajinallatataj pay tukuchichun kay khuyakuy ruwayta qankuna ukhupi. 7Chayrayku qankunajta tukuy ima tiyapusunkichej feniykichejpi, allin parlaypi, yachaykunaspi, tukuy imapi k'uchiyaspa, noqaykuta munakuspa, ajinata ashkhayaychej kay khuyakuypi.
8Mana kaytaqa kamachej jinachu niykichej, imaraykuchus munani yachanaykichejta imaynatachus ujkuna ruwanku tukuy sonqo. Ajinataj kachun qankunajtapis munakuyniykichejqa. 9Ña rejsinkichejña Señorninchej Jesucristoj khuyakuyninta. Qhapaj kashaspa qankunata munakuspa wajchaman tukorqa. Chay wajcha kayninwantaj qankunata qhapajyachisorqachej.
10Qankuna allin kanaykichejta munaspa yuyaychaykichej, imaraykuchus kayqa qankunapaj allin. Qayna watamantapachaña ruwayta qallarerqankichej, mana ruwayta munaspallachu, astawanqa tukuy sonqo. 11Kunanqa ruwallaychejpuni tukuchinaykichejkama, imaynatachus munarqankichej usqhayta ruwayta, ajinallatataj junt'apuychej kapususqaykichejman jina. 12Sichus uj runa munanman cheqamanta qoyta chayqa, Dios jap'enqa chay ofrendata tiyapusqanman jina. Payqa mana mañanchu mana imayojmantaqa.
13Kaywanqa mana niytachu munaykichej, wakin tukuy imayoj kanankuta, qankunarí mana imayoj. 14Astawanqa niyta munani, kay tiempopi uj rejlla kanampaj, ashkha tiyapuyniyojkuna qoychej pisichikojman, uj tiempotaj paykunajtapis tiyapojtin qosonqachej qankunajtapis pisejtin, ajinapi uj rejlla kanampaj. 15Escribisqapi nishan: Ashkhata oqharejpataqa mana puchorqachu; pisita oqharejpatapis nillataj piserqachu.
Titota llank'aysejkuna
16Diosman graciasta qoni, noqaman jinallataj Titomampis sonqonman churasqanmanta, qankunamanta yuyanampaj. 17Paytaj sonqochasqayta uyariwarqa. Payqa maytapuni munakusunkichej, kunantaj jamun qankunata watukoj paypa munayninman jina.
18Titotawan kachamusqayku uj hermanota, pimantachus allinta parlanku tukuy iglesiaspi, sumajta llank'asqanmanta evangeliota willaspa. 19Manataj chayllachu karqa, astawanqa tukuy iglesias kay hermanollatataj ajllarqanku noqaykuwan rinampaj; qolqeta apaspa maychus kajta rak'inaykupaj Señorpa kusiynimpaj, rikuchinaykupajtaj khuyakoj sonqoyoj kasqaykichejta. 20Ajinata munayku ama pipis rimanankupaj kay ashkha qolqeta tantasqaykumanta. 21Astawantaj munashayku kay imasta ruwayta cheqanta, mana Señorpa ñaupaqellampichu, astawanqa runaspa ñaupaqempipis.
22Paykunawan waj hermanota kachamullaykutaj. Sapa kuti rikuyku payqa tukuy imapi k'uchi kasqanta. Kunanqa pay astawanraj, qankunapi maytapuni yuyashan mana iskayrayaspa. 23Pipis Titomanta tapukunman pichus pay kasqanta chayqa, qankuna willaychej kausaqey kasqanta, yanapawajniy, qankunata yanapanaykupaj. Waj hermanosmanta tapukojtinkutaj, willaychej, iglesiamanta hermanos kachamusqas kasqankuta, Cristoj kusiynimpaj. 24Chayrayku iglesias yachanankupaj, qankuna rikuchiychej munakuyniykichejta, jinallataj noqaykumantapis rikuchiychej may kusiyniyoj kasqaykuta qankunamanta.
Currently Selected:
2 CORINTIOS 8: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
