2 CORINTIOS 6

1Arí ajina, qankunata yanapajkuna kayku Diospa ruwaynimpi. Mañakuykutaj qankunaqa ama qhasipajchu jap'inaykiychejta Diospa khuyakuyninta. 2Escribisqapeqa nishan: Khuyakuy tiempopi uyarerqayki; salvakuna p'unchaypitaj yanaparqayki. Kunanqa kaymin khuyakuna p'unchay. Kunanqa kaymin salvakuna p'unchay.

3Mana pipajpis ima misk'anatapis churarqanichu, ama p'enqayta rinankupaj noqaykoj ruwasqaykumanta. 4-5Astawanqa munayku tukuy imapi rikuchikuyta Diospa kamachisnin jina, ancha pacienciawan ñak'ariykunapi, pisichikuypi, llakiykunapi; jasut'isqas, carcelman churasqas, ch'ajwas chaupipi, llank'aykunapi, mana puñusqas, mana mikhusqastaj. 6Rikuchispa llimphus kasqaykuta kausayniykupi, cheqa kajta rejsisqaykurayku, pacienciakuspa, khuyakuywantaj, Santo Espiritupi tukuy sonqo munakuypi. 7Cheqa kaj palabrawan, Diospa atiyninwan, cheqa kaj armasta oqharikuspa pañamanta lloq'eman kutichikuspa. 8Uj kutipeqa allin qhawasqa kayku, waj kutitaj mana, uj kutipitaj allinta parlanku noqaykumanta. Waj kutipitaj sajrata parlanku, uj kutipitaj llullasta jina qhawawayku; chaywampis cheqatapuni parlayku. 9Mana rejsisqas jina kayku, chaywampis sumaj rejsisqas kayku, manataj wañusqaschu. 10Llakisqas jina kayku, chaywampis kusisqaspuni; wajchas jina kayku. Chaywampis ashkhasta qhapajyachiyku. Mana kapuyniyoj jina kashajtiykupis, astawan tukuy ima kapuwayku.

11Corintopi kaj hermanos, qankunaman sut'ita parlamuyku mana imata pakaspa, sonqoykutaj jatunta kicharikun qankunapaj. 12Noqaykoj sonqoykoqa qankunapaj mana wisq'asqachu. Qankunaj sonqoykichejrí, noqaykupaj wisq'asqa. 13Kunanqa kikillantataj kutichispa niykichej: Qankunapis ama manchachikuspa sonqoykichejta jatunta kichariychej. Wawasman jina parlashaykichej.

Kausaj Diospa templon kanchej

14Ama yugopi jina tantakuychejchu ch'ulla ch'ulla, Diospi mana creejkunawan. Kunanqa, imata ruwanan tiyan cheqa kaj, sajra kajwanri? Chayrí, imaynatataj k'anchayqa laqhawan chajrukonqari? 15Imaynatataj kausanqanku Cristowan supaywan? Chayrí, Diospi creejqa ima ruwanan tiyan mana creejwan? 16Chantá ima allintaj kanman, Diospa templompi lantikuna kanankuri? Qankunaqa kausashaj Diospa templon kankichej, imaynatachus Dios nerqa: Kausajtaj, purisajtaj paykuna ukhupi. Paykunaj Diosninku kasaj. Paykunataj aylluy kanqanku. 17Chayrayku llojsiychej paykunaj chaupinkumanta, t'aqakuychejtaj, nin Señorqa. Ama llankhaychejchu ch'ichi imasta, noqataj jap'ikapusqaykichej. 18Noqataj qankunaj tataykichej kasaj, qankunataj qhari wawasniy, warmi wawasniytaj kankichej, ajinata nin Tukuy Atiyniyoj Señor.

Currently Selected:

2 CORINTIOS 6: QCHSB

Highlight

Copy

Compare