2 CORINTIOS 12

Rikhuriykuna sut'inchaykunawan

1Cheqamanta noqa jatunchakunayqa mana allinchu; munajtinkurí, Señor rikuchiwasqanmanta, sut'inchawasqanmanta ima parlasaj. 2Yachani uj qhari Cristopi creej, chunka tawayoj wataña apasqa kasqanta kinsa kaj janaj pachakama. Manataj yachanichu cuerpontinchus apasqa karqa, chayrí manachus. Chaytaqa Dioslla yachan. 3-4Chaywampis yachani chay qhareqa paraisoman apasqa kasqanta, maypichus mana willay atina palabrasta uyarerqa, cuerpompichus manachus, chaytaka Dioslla yachan. Chaykunata runaqa manapuni atinmanchu parlayta. 5Chaykunamanta alabakusaj, pisi kallpayoj kasqaymantawan. Noqa kikiymantarí mana alabakusajchu. 6-7Alabakuyta munayman chaypis, mana wampu jinachu kayman; imaraykuchus cheqa kajta parlayman. Chaywampis, ch'in kakusaj, ama pipis rikuwaspa, chayrí uyariwaspa imachus kasqaymanta astawanraj yuyanampaj, chay jatuchaj t'ukunas rikhuriwasqanta rikusqayrayku. Chayrayku ama anchata oqharinawampajqa, aychaypi uj aguijonwan jina t'ojsisqa karqani; chaytaqa Satanaspa kamachin sajmawarqa ama jatunchakunaypaj. 8Chayrayku Señormanta mañakorqani kinsa kutita, chay nanayniyta qhechunawanta. 9Señortaj niwarqa: Khuyakuynillay atipachisonqa; imaraykuchus atiyneyqa pisi kallpayojkunapi astawan rikuchikun. Chayrayku kusisqa kani. Pisi kallpayoj kaspa jatunchakuni, Cristoj atiynin noqapi kakunampaj. 10Chayrayku pisi kallpayoj kasqaypi kusikuni. Chantá kusikullanitaj k'amiykunapi, pisichikuypi, ñak'ariykunapi ima. Maypachachus pisi kallpayoj kani, chaypacha atiyniyoj kani.

Pablo anchatapuni yuyan Corinto iglesiamanta

11Loco jina karqani, chaytarí qankunallataj ruwachiwarqankichej. Astawanqa qankunamanta alabasqa kanay karqa. Noqaqa mana imapipis pisichu karqani, chay jatuchaj apostolesmanta nisqaqa; manapis jinachu kani. 12Chay tukuywampis qankuna ukhupi pacienciawan llank'arqani. Rikuchisqataj karqa señales, milagros, atiykuna ima cheqa apóstol kasqaymanta. 13Qankunaqa mana imapipis aswan pisichu karqankichej waj iglesiamanta nisqaqa; manachayqa qankunamanta mana imatapis mañasqayllaypi. Jina chayqa, perdonawaychej, kay mana allinta ruwasqaymanta.

14Kunanqa kinsa kutitaña wakichikuni qankunata watukoj jamunaypaj; manataj imatapis mañasqaykichejchu, imaraykuchus mana imaykichejtachu mask'ashani, astawanqa qankunata. Mana wawaschu qolqetaqa tantananku tiyan tatasninkupaj, manachayqa tatasqa qolqeta tantananku tiyan wawasninkupaj. 15Noqaqa may kusiywan tiyapuwasqanta gastasaj. Noqa kikiytaj kausayniyta qosaj almaykichejrayku. Qankunata anchata munakusqaykichejmanta, pisi munasqachu kasaj?

16Jinapis kachun, mana noqa imatapis mañarqaykichejchu. Astawanqa, ninku jina, ch'aukiyaspa jap'erqaykichej. 17Chantá imaykichejtachu orqhorqaykichej wajta kachamuspa? 18Noqa nerqani Titoman qankunata watukunanta, paywantaj kachamorqani waj hermanota. Chantá Titoqa orqhosorqachejchu imaykichejtapis? Manachu kikin espirituyoj karqayku? Manachu uj ñanllata purerqayku?

19Ichapis yuyashankichej noqayku allinta rijch'anaykuta qankunaj ñaupaqeykichejpi. Mana jinachu chayqa. Astawanqa parlashayku Diospa ñaupaqempi, Cristoj sutimpi, tukuy imapi wiñanaykichejpaj, munakusqay wauqesníy. 20Manchachikushani, qankunata watukoj jamuspaqa, mana munasqayman jinachu taripanayta. Manchachikullani taj qankunaqa mana qhawarinawaykichejta munasqaykichejman jina. Chantá yuyallanitaj qankuna ukhupi kananta churanakuykuna, qhawanakuykuna, phiñanakuykuna, t'aqanakuykuna, sajra rimaykuna, thutuykuna, jatunchakuykuna, ch'ajwaspi pejtunakus ima. 21Manchachikullanitaj, kutimojteyqa Diosniy k'umuykachachinawanta qankuna ukhupi. Ichapis waqanay kanqa, chay ashkha, ñaupajta juchallikojkunamanta, Diosman mana kutirisqankumanta, nitaj saqesqankumanta millay kausayninkuta, qhenchachakuyta, aychaj sajra munaynintapis.

Currently Selected:

2 CORINTIOS 12: QCHSB

Highlight

Copy

Compare