2 CORINTIOS 11

Llullata yachachejkuna

1Walej kanman, uj chhikanta saqerinawaykichej loco jina parlajta. Arí, saqerillawaychej. 2Noqa celoso kashani qankunamanta Diospa celosninwan; imaraykuchus uj qosallawan rejsinacherqaykichej, Cristoman qankunata chimpachinaypaj llimphu doncellata jina. 3Manchachikuni imaynatachus katari llullakuspa ch'aukiyarqa Evata, ajinallatataj yuyayniykichejta pantachinanta, tukuy sonqo, llamp'u sonqostaj Cristowan kanaykichej kashajtin. 4Sichus pipis jamunman waj Jesusmanta willaspa, manataj kikinchu willasqanman jina, chayrí waj espiritutataj jap'iwajchej ñaupajta jap'isqaykichejmanta, chayrí waj evangeliota jap'iwajchej ñaupajta jap'isqaykichejmanta chaypis, qankunaqa jap'illankichej. 5Yuyanitaj noqa mana aswan pisichu kasqayta chay jatuchaj apostolesmantaqa. 6Mana allinta parlani chaypis, tukuy ima yachayta rejsiypitaj mana jinachu kani, kaytataj qankunawan kashaspa rikucherqayku tukuy imapi.

7Juchallikunichu qankuna jatunchasqas kanaykichejrayku k'umuykuspa, Diospa evangelionta qhasillata willaspa? 8Waj iglesiasmanta qolqeta qhechorqani, qankunata yanapanaypaj pagota jap'ispa. 9Qankunawan kashajtiy imapis pisiwaj, mana carga jinachu mayqempajpis karqani. Chaytaqa, hermanos, Macedoniamanta qowaj kanku tukuy ima pisiwasqanta. Tukuy imapi jark'akoj kani, ama pipajpis carga jina kanaypaj. Jinallapunitaj kasaj. 10Cristoj cheqa kaynin noqapi kasqanrayku, mana pipis kay kusikuyniymanta jark'awanqachu tukuy Acaya llajtapi. 11Imaraykutaj ajinata parlani? Manachu munakuykichej? Dios yachan qankunata mayta munakusqayta.

12Chaywampis, imatachus kunan ruwasqaytaqa ruwallasajpuni, manataj saqesajchu chay ujkuna jatunchakunankuta; imaraykuchus paykuna mask'ashanku noqaykuman rijch'akuyta. 13Chaykunaqa llulla apóstoles kanku, suwa llank'ajkunataj. Paykunaqa Cristoj apostolesninkupis kankuman jina purishanku. 14Chayqa mana t'ukunapajchu, imaraykuchus Satanaspis yachan k'anchaj angelman tukuyta. 15Chayrayku, kamachisnimpis jinallatataj ruwanku, sumaj runasman rijch'asqas, imastapis cheqanta ruwajkunaman rijch'akunku. Paykunaj tukukuyninkurí, ruwasqankuman jina kanqa.

Pabloqa apóstol jina ñak'arin

16Watejmanta nini: Ama pipis yuyachunchu loco kasqayta. Ajina kasqayta yuyanku chayqa, saqewaychej loco jina parlajta. Noqapis ajinapeqa uj chhikanta alabakusaj. 17Kaytaqa mana Señorpa munasqanman jinachu nishani, astawanqa loco jina parlashani, chaymanta astawan kusikunaypaj. 18Imaynatachus ashkhasña alabakunku kay pacha imasmanta, allin kanman noqapis alabakunay. 19Qankunaqa yachayniyoj kashaspa, tukuy sonqo aguantankichej locosta. 20Sichus pipis kamachimpi jap'isunkichej, chayrí sojsusunkichej, chayrí pichus jap'ikapun imaykichejtapis, chayrí k'umuykachachisunkichej, chayrí sajmasunkichej chayqa, qankuna chay tukuy imasta aguantashankichej. 21P'enqakuni niyta pisi kallpayojpis kaykuman karqa jina.

Pitajchus alabakun chayqa, noqapis alabakullasajtaj. Chaytaqa loco jina nini. 22Paykuna hebreoschu kanku? Noqapis hebreollataj kani. Israelitaschu kanku? Noqapis israelitallataj kani. Abrahampa mirayninmantachu kanku? Noqapis chayllamantataj kani. 23Cristoj kamachisninchu kanku? Locopis kayman jina parlashani, noqa astawan Cristoj kamachin kani paykunamantaqa. Noqa ashkhata llank'arqani, may chhika kutita jasut'ichikuspa. Carcelpi wisq'asqa, ashkha kutitataj wañunaypaj jina karqani. 24Phishqa kutita judiospis jasut'iwarqanku, sapa kuti jasut'iypi, kinsa chunka isq'onniyojta. 25Kinsa kutita k'aspiwan seq'owarqanku. Uj kutipeqa rumiswanñataj ch'anqawarqanku. Barcopi rishaspataj kinsa kutikama p'ultikorqani. Uj kutitaj mar qocha chaupipi karqani uj tutata uj p'unchaytawan. 26Ñankunaspi ashkha kutista rikhurerqani suwas wañuchinawankupaj jina, mayuspi wañunaypaj jina. Ayllu masisniypis wañuchiyta munaspa wateqawanku. Jinallataj gentilespa chaupinkupi, llajta ukhupi ch'inkunaspi, qocha chaupipi, llullakuspa hermano kani nejkuna ukhupi ima, wañuy patapi karqani. 27Llank'aypi may sayk'uywan, sapa kuti mana puñuspa karqani. Yarqhaywan, ch'akiywan anchata ch'ayñarqani. Chiriwarkataj p'achay mana kashajtin.

28Astawanraj, waj imasmanta sapa p'unchay sonqoyta llasaykuwan, tukuy iglesiasmanta yuyaspa llakikusqay. 29Pipis onqon chayqa, manachu noqapis onqoni? Pitapis misk'achinku chayqa, noqapis manachu phiñakuni? 30Alabakuna kajtenqa, alabakusaj pisi kallpayoj kasqaymanta. 31Señorninchej Jesucristoj Dios Tatanqa yupaychasqa kachun wiñaypaj. Pay yachan mana llullakusqayta. 32Damascopi kashajtiy, kamachej rey Aretas, qhawajkunata llajta punkuman churarqa, presota jap'inawankupaj. 33Chantá, llajta perqaj jawa ventananta canastapi warkhuspa kachaykuwarqanku. Ajinamanta ayqekorqani makisninkumanta.

Currently Selected:

2 CORINTIOS 11: QCHSB

Highlight

Copy

Compare