1 TIMOTEO 4

Femanta t'aqakojkuna

1Santo Espíritu sut'ita nin: Jamoj p'unchaykunapi femanta wakin t'aqakonqanku, ch'aukiyaj espiritusta, supaypa yachachiyninta ima uyarispa. 2Puraj uyas parlanqanku llullakuspa. Paykunaj concienciankutaj rupha fierrowan jina marcasqa kashan. 3Kaykunaqa casarajta jark'anku, Diospa churasqan mikhunatapis kamachinku ama mikhunata. Chaykunataqa Dios churarqa, creejkuna, cheqa kajta rejsejkuna ima Diosman graciasta qospa mikhunankupaj. 4Diospa tukuy ruwasqanqa walejmin. Mana qhesachanapajchu, sichus graciasta qospa mikhusun chayqa. 5Diospa palabranrayku, mañakusqanchejraykutaj chaykunaqa llimphuchasqaña.

Jesucristoj sumaj kamachin

6Kaytachus hermanosman yachachinki chayqa, jap'ispa fe palabrasta, cheqa yachachiytataj imatachus jap'ikorqankiña chayta, Jesucristoj sumaj kamachin kanki.

7Qhasi mana kaj palabrasta, paya warmispa cuentosninkutapis qhesachay. Astawanqa kallpachakuy Diosta yupaychaypi. 8Cuerpota kallpachayqa pisillapaj, Diosta yupaychayrí sumaj tukuy imapaj; imaraykuchus allinmin kay kausaypi, jinallataj jamoj kausaypipis. 9Kay palabraqa cheqapuni, allintaj tukuy jap'inankupaj. 10Kayrayku llank'anchej sayaykukunchejtaj. Suyanchej ari kausaj Diospi, pichus tukuy runakunaj salvajnin, astawanqa creejkunajta.

11Kayta kamachiytaj yachachiytaj. 12Ama pipis wayna kasqaykirayku pisipi qhawasuchunchu; astawanqa creejkunaj ñaupaqenkupi allinta puriy: Parlaypi, allin kausaypi, munakuypi, espiritupi, fepi, llimphu kausaypi ima. 13Jamunaykamaqa Escriturasta leey, sonqochay runasta yachachiytaj. 14Ama qonqapuychu qanman atiy qosqa kasqanta, maypachachus Diospa yuyaychasqan ancianosqa makisninkuta qanman churasorqanku chaypacha.

15Chaykunata ruway, chaykunapi sonqoykita churay, ñaupajman rishasqaykita tukuy rikunankupaj. 16Qan kikiykita qhawakuy, yachachisqaykitapis. Chaypi allinta sayay. Kayta ruwaspa qan kikiykita salvakunki, jinallataj uyarisojkunatapis.

Currently Selected:

1 TIMOTEO 4: QCHSB

Highlight

Copy

Compare