1 TESALONICENSES 3
3
1Chayrayku, manaña suyayta atispa, noqayku ukhu parlarikorqayku Atenaspi sapayku qhepakunaykuta. 2-3Hermanoyku Timoteotataj kachamorqayku. Payqa Diospa kamachin, ruwaysiwajniykutaj Cristoj evangeliompi. Payta kachamorqayku qankunata sinch'ita sayachinampaj, creesqaykichejpitaj astawan yanapanampaj, ama pipis kay ñak'ariykunarayku iskayrayanampaj; imaraykuchus yachankichej jina, chaykunapaj churasqas kayku. 4Ñaupajmantapacha qankunawan kashajtiyku, willarqayku llakiykunata jap'ikunaykichejta. Ajinataj karqa, imaynachus yachankichej jina. 5Chayrayku, noqapis mana astawan suyayta atispa, Timoteota kachamorqani feniykichejmanta yachanampaj, ichapis supay pantachisunkichejman karqa, llank'asqaykutaj qhasipaj kanman, nispa.
6Kunanqa, Timoteo kutimuspa willawayku feniykichejmanta, munakuyniykichejmanta ima; noqaykumantataj yuyarikojpuni kasqaykichejta, noqaykuta rikuyta munaspa, imaynatachus noqaykupis qankunata, ajinata. 7Chayrayku, hermanos, qankunanejta sonqochakorqayku, tukuy llakiyniykupi, ñak'ariyniykichejpipis, feniykichejrayku. 8Kunanqa watejmanta kausayku qankuna Señorpi sinch'ita sayasqaykichejrayku. 9Imaynamantataj graciasta Diosman qoyta atiykuman may kusiywan, kusikusqaykumanta Diospa ñaupaqempi? 10Tuta p'unchay anchatapuni Diosmanta mañakuyku uyaykichejta rikunaykupaj, feniykichejman pisisqantataj junt'anaykupaj.
11Kikin Dios Tatanchej, Señorninchej Jesucristowan, qankunaman rinaykupaj ñanta wakichichunku. 12Señortaj qankunata munakuywan junt'achichun, ashkhayachichuntaj qankuna ukhupi, wajkuna ukhupipis; imaynatachus noqaykupis qankunata munakuyku, ajinata. 13Sonqosniykichej llimphu kausaypi kallpachasqas kachunku, mana k'amiyniyoj Dios Tatanchejpa ñaupaqempi, Señorninchej Jesucristo, tukuy ajllasqasninwan jamunankama.
Currently Selected:
1 TESALONICENSES 3: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
