1 TESALONICENSES 2

Pablo Tesalonicapi

1Hermanos, yachankichej jina, qankunata watukusqaykoqa mana qhasipajchu karqa. 2Astawanqa yachankichej, Filipospi ñaupajta ñak'arerqayku, k'amisqastaj karqayku; chaywampis Diosniyku kallpachawarqayku, paypa evangelionta qankunaman willanaykupaj, manchay churanaku chaupipi. 3Umachakusqaykoqa mana pantaypichu, nitaj ch'ichichakuypichu, nitaj ch'aukiyaypichu karqa. 4Imaynatachus Dios allimpaj qhawawasqaykuman jina, evangeliota qowarqayku; chayman jina parlayku, mana runata kusichinaykupajchu, astawanqa Diosllata. Payqa sonqosninchejta allinta rejsin. 5Noqaykoqa, yachankichej jina, mana pitapis ni jayk'aj misk'i simiwan llunk'upayarqaykuchu; nitaj pakaymanta qolqetapis munapayarqaykuchu. Chaytaqa Dios yachan. 6Noqaykoqa mana runakunapaj allin qhawasqa kaytachu mask'ayku, ni qankunapaj, nitaj wajkunapajpis. Atiykumampis karqa qankunawan imatapis yanapachikuyta, Cristoj apostolesnin jina. 7Qankuna ukhupeqa llamp'u sonqos karqayku; imaynatachus uj sumaj mama wawasninta munakuywan uywan, ajinata. 8Chay jinatapuni qankunata munakusqaykurayku, mana Diospa evangeliollantachu yachacherqayku; astawanqa kausayniykutapis qoyta munarqayku. Noqaykupajqa ancha munasqas kankichej. 9Yuyarikuychej, hermanos, ruwasqaykumanta, sayk'usqaykumanta, tuta p'unchay llank'aspa; manataj mayqenniykichejpajpis carga jinachu karqayku, Diospa evangelionta qankunaman willashaspaqa.

10Qankuna yachankichej, Diospis yachan, imaynatachus llimphus, cheqan kausaywan, mana k'aminas qankuna creejkunawan purisqaykuta. 11Yachallankichejtaj, imaynatachus uj tata wawasninta k'amin, ajinata k'amej, sonqochajtaj kayku sapa ujniykichejta. 12Umachajtaj kayku, Diospa wawasnin jina purinaykichejta; payqa wajyasorqachej reinonman, k'anchayninmantaj.

13Chayrayku noqaykupis mana samaspa Diosman graciasta qoyku, maypachachus Diospa palabranta jap'isharqankichej noqaykumanta uyarispa; chaypacha mana runakunaj palabranta jinachu, cheqamanta Diospa palabranta jina jap'erqankichej. Chay palabrataj qankuna creejkunapi llank'ashan. 14Hermanos, qankunaqa yachakojkuna kankichej Diospa iglesiasninmanta, mayqenkunachus Judeapi kashanku, Cristo Jesuspi; ima llakiytachus qankuna jap'ikorqankichej llajta masisniykichejmanta. Chay kikillantataj paykunapis judiosmanta jap'ikorqanku. 15Paykunaqa Señor Jesusta wañucherqanku, jinallatataj profetasninkutapis. Noqaykutataj qhatiykachawarqayku. Chayrayku Diosta phiñachinku, tukuy runakunaj contrampitaj kashanku. 16Paykunaqa jark'awayku gentilesman evangeliota willanaykuta salvasqas kanankupaj. Juchankoqa tupuman junt'aykunña, phiñakuytaj patankuman jamushanña, wiñaypaj jasut'isqas kanankupaj.

Pablo munan watukuyta Tesalonicapi kajkunata

17Noqaykutaj, hermanos, uj pisi p'unchaykunata t'aqasqa kaspa, cuerpopi, mana sonqopichu, astawanraj munasqayku uyaykichejta rikuyta. 18Chayrayku munarqayku qankunata watukuyta. Noqa Pablo, cheqamanta uj kutita, iskay kutitapis jamuyta munarqani, Satanastaj jark'awarqayku. 19Kunanqa mayqentaj suyayniyku, chayri kusikuyniyku, chayri k'anchaj pilluykuri? Manachu qankuna kankichej, Señorninchej Jesuspa ñaupaqempi, paypa jamuynimpi? 20Qankuna kankichej sonqo junt'asqa kayniyku, kusikuyniykutaj.

Currently Selected:

1 TESALONICENSES 2: QCHSB

Highlight

Copy

Compare