1 TESALONICENSES 4

Dios munan allinta kausanata

1Kay qhepantataj hermanos, qankunamanta mañakuyku, umachaykutaj Señor Jesuspi, imaynatachus noqaykumanta yachachisqas karqankichej, ajinata purinaykichejta, Diosta kusichispa, astawan astawantaj wiñaspa.

2Yachankichejña ima kamachiykunatachus Señor Jesucristomanta qosusqaykuta. 3Kaymin Diospa munaynenqa: Llimphu sonqos kanaykichej, qhenchachakuymanta t'aqasqas. 4-5Sapa ujniykichej yachaychej warmisniykichejwan maychus kajta kausakuyta, llimphu sonqowan, mana aychaj munapayaynimpichu, imaynatachus ruwanku gentiles Diosta mana rejsisqankurayku, ajinataqa. 6Ama pipis hermanompa kapuyninman yaykuchunchu, nitaj suwachunchu, imaraykuchus Señorqa jasut'enqa kay tukuy imasmanta, imaynatachus nerqaykuña. 7Diosqa mana millay kausaymanchu wajyasorqachej, astawanqa llimphu kausayman. 8Chayrayku, pichus kay imasta qhesachan chayqa, mana runatachu, manachayqa Diosta qhesachan. Paytaj Santo Espirituta qosorqachej.

9Kunanqa, hermanopura munanakunamantaqa anchaña kanman escribimunayqa. Qankuna Diosmanta yachakorqankichej purajmanta munanakunaykichejta. 10Cheqamanta qankunaqa, ajinata ruwashankichej tukuy Macedoniapi kajkuna hermanoswan. Chaywampis, hermanos, mañakuyku astawan astawan wiñanaykichejta. 11Mañakuychejpuni samasqa sonqo kakuyta. Ruwanaykichejta ruwakuychej, kikin makisniykichejwan llank'aspa kamachisusqaykuman jina. 12Allinta puriychej Diosta mana rejsejkunaj ñaupaqempi, nitaj pejpa imantapis munapayaspa.

Señorpa kutimuynin

13Munayku, hermanos, qankuna yachanaykichejta wañojkunamanta, ama llakisqas kanaykichejpaj chay ujkuna jina, mana suyayniyoj kajkuna jina. 14Sichus creenchej Jesús wañusqanta, kausarimusqantataj chayqa, ajinallatataj Diosqa, paywan khuska pusanqa, Jesuspi creespa wañojkunata.

15Kaytaqa niyku Señorpa palabrampi: Noqanchejmanta kausajkuna, Señor jamunankama qhepakojkunaqa, mana ñaupaykusunchu, ñaupajta wañojkunata. 16Kikin Señorpuni kamachej qhapariywan, arcangelpa qhaparisqanwan, Diospa pututunwantaj janaj pachamanta uraykamonqa, Cristopi wañojkunataj ñaupajta kausarimonqanku. 17Chaymantaña, noqanchej, kausashaj qhepakojkunaqa, paykunawan khuska phuyusman oqharisqas kasunchej, Señorta taripamunanchejpaj pata wayrapi. Ajinata Señorwan wiñaypaj kamusunchej. 18Chayrayku, kay palabraswan purajmanta sonqochanakuy chej.

Currently Selected:

1 TESALONICENSES 4: QCHSB

Highlight

Copy

Compare