1 MACABEOS 5
5
Judasqa cheqerasqa judiosta tantaykun
[2 Mac. 10.14-38]
1Qayllapi kaj paganostaj yachasqanku israelitasqa watejmanta ruwasqankuta altarta, ruwasqankutataj templota, imaynatachus ñaupajta karqa ajinata. Chayta yachaspataj, anchatapuni phiñakusqanku. 2Phiñakuspataj, munarqanku wañurachiyta tukuy Jacobpa mirayninta, chaupinkupi kasharqanku chaykunata. Chantaqa, wakin judiosta wañucherqanku wakintataj qharqorqanku llajtankumanta. 3Yachaspa chaykunata ruwasqankuta, Judasqa kachaykukorqa Idumeaman Esaúj mirayninmanta runaswan maqanakoj. Judasqa chayarqa Acrabeteneman. Chaypi acrabetenosqa wakin israelitasta tukuy ladomanta wateqashasqanku. Chayaspataj, chay acrabetenostaqa sinch'ita nanaykuchisqa. Pampaman k'umuykucherqa paykunataqa. Chaymantataj, kapuyninkuta apakaporqa. 4Chaymantataj yuyarikorqa imaynatachus Beón llajtayojkunaqa unayta israelitasta imaymanapi llakichisqankuta, paykunata ñankunapi suwaspa. 5Judasqa mana saqerqachu chay runas wasisninkumanta llojsinankuta. Paykunaj muyuyninkupi Judasqa sayarqa soldadosninwan. Chaymantataj q'alata phiriykucherqa, ruphaykucherqataj llajtata runasnintinta. 6Chaymantataj riporqa amonitaspa llajtankuman. Chaypi Judaspa runasnin ashkha soldadoswan maqanakorqanku. Chay soldadosqa allintapuni wakichikusqanku maqanakupaj. Chay soldadosqa kamachejnenqa karqa uj runa Timoteo sutiyoj. 7Ashkha kutita tinkukuspa paykunawanqa, Judas atiparqa. 8Jap'iytawantaj Jazer llajtata ranchosnintinta, Judeaman kutimporqa.
Judasqa Galaadpitaj Galileapitaj maqanakun
[2 Mac. 12.10-31]
9Galaad llajtayoj mana creejkuna runasqa paykunapura ujchakorqanku tinkuyman llojsinankupaj israelitaspa contranta. Llajtanku ukhupi karqa ari israelitas. Galaaditasqa munasharqanku chay israelitasta chinkachiyta. Israelitastaj chayta yachaspa Datemaman ayqerqanku pakakoj. 10Chantaqa, Datemamantapacha uj cartata kachamorqanku Judasman wauqesninmantaj. Chay cartaqa kay jina karqa: Muyuyniykupi kaj paganosqa paykunapura ujchakunku chinkachinawaykupaj. 11Wakichikushankuña paykunaqa jamunankupaj noqaykuwan maqanakoj. Jap'ikapuyta munashanku kay lugarta, maypichus kashayku chayta. Uj runa, Timoteo sutiyoj, paykunaj kamachejnin. 12Jamuy ari chay runasmanta kacharichinawaykupaj. Noqayku ukhupi ashkhaña wañunku. 13Hermanosniyku Tubipi tiyakojkuna wañuchisqas karqanku. Enemigosniyku presochasqasta apakapunku warmista wawasta ima. Imasninkutapis apakapullanku. Waranqañachá kanku chay cheqapi wañojkunaqa.
14-15Chay cartata leeshajtinkuraj, chaypacha chayamorqanku Galileamanta waj kachas, p'achanku llik'isqas. Chay kachasqa nerqanku: Tukuy noqaykuta chinkachinawaykupaj ujchakorqanku Tolemaida llajtayojkuna, Tiro llajtayojkuna, Sidón llajtayojkuna ima. Chantapis, Galileapi tiyakojkuna chay paganospis, nispa. 16Chayta uyarispataj, Judaspis tukuy runaspis ujllapi tantakorqanku yuyanankupaj imatachus ruwayta atinkuman hermanosninkuta yanapanankupaj, jark'ayta munaspa enemigosninkumanta chay llakiypi. 17Judastaj nerqa Simón wauqenta kay jinata: Munayniykiman jina ajllakuy runasta. Rinayki tiyan Galileaman, hermanosninchejta kacharichej enemigosninkoj makisninkumanta. Wauqenchej Jonatanwan noqawan Galaadman risqayku. 18Judeapi kakorqanku soldadosninkuwan, Zacariaspa wawan Josewan Azariaswan ima. Iskayninku may rejsisqas respetasqastaj karqanku. 19Judasqa kay ordenta qorqa Joseman Azariamampis: Kunanqa kamachejkuna jina runasta qhawaychej. Amapuni tinkunakuychejchu paganoswan kutimunaykukama, nispa. 20Simonqa kachaykukorqa Galileaman kinsa waranqa runaswan. Judastaj rerqa Galaadman pusaj waranqa runaswan.
21Galileapiña kaspa Simonqa ashkha maqanakuspi tinkukorqa chay paganoswan. Sapa kutitaj paykunata atipaykorqa. 22Wakinta qhatiykorqa Tolemaidakama. Paganosqa chinkachisqas karqanku. Kinsa waranqa jina wañurachisqas karqanku. Simontaj kapuyninkuta apakaporqa. 23Chantaqa, mayta kusikuspa Judeaman pusarqa judiosta Galileamantawan Arbatamantawan kajkunata, warmisnintinta, wawasnintinta, tukuy imasnintinta ima.
24Chaykama Judas Macabeoqa Jonatán wauqenwan, Jordán mayunta pasaspa, kinsa día junt'ata purerqanku ch'in pampanta. 25Ch'in pampapitaj tinkukorqanku nabateo runaswan. Chay nabateosqa allin sonqowan paykunata napaykorqanku, willarqankutaj paykunaman imachus pasasqanta Galaadpi judío masisninkuman. 26Willarqanku imaynatachus judiosqa wisq'asqas kasqankuta Bosrapi, Bosorpi, Alemapi, Caspimpi, Maquedpi, Carnaimpitaj. Chay llajtasqa jatuchaj kanku, sumaj perqachasqas. 27Nillarqankutaj waj Galaad llajtaspipis judiosqa wisq'asqas kasqankuta. Nerqankutaj chay judioswanqa enemigosninku munasqankuta qhepan diallata maqanakuyta. Nisqankutaj rinanku kasqanta perqachasqa llajtasman, jap'ikapunankupaj, wañuchinankupajtaj tukuy israelitasta uj diallapi.
28Chayta uyarispataj Judasqa soldadosninwan khuska kutimporqa Bosora ch'in pampaman. Chayaspataj, llajtaman yaykorqa. Chaypi espadawan tukuy qharista wañucherqa. Tarisqan imasta jap'ikaporqa, llajtatataj ruphaykucherqa. 29Ch'isita llojsispa, chayarqa Datema nisqa jark'akuna wasiman. 30Paqarimojtintaj, judiosqa rikorqanku mana yupay atina runasta. Chay runasqa qayllasharqanku escalerasta marq'aspa, apaspataj tukuy ima laya wicharinasta, maqanakupaj imastawan, jark'anata jap'ikapuyta atinankupaj. 31Judasqa yacharqa qallarisqankutaña maqanakuyta. Uyarikusharqañapis llajtamanta jamoj qhapariytaj, pututoj waqaynintaj. 32Judastaj soldadosninman kay jinata nerqa: Llajta masisninchejrayku kunanqa maqanakuna!, nispa.
33Chaymantataj nerqa rinankuta, kinsa ladomanta wajtaj enemigosta. Judiosqa rikhurimunku enemigosninkoj wasankupi pututusta waqachispa, mañakuspataj Diosmanta qhaparikuspa. 34Timoteoj runasnin, yachaspa Macabeo jamusqanta, ujta ayqekaporqanku. Judastaj ashkha runasta wañucherqa. Chay diallapi wañusqasqa pusaj waranqa jina karqanku.
35Chantaqa, Judas rerqa Alemaman. Yaykuytawanqa, tukuy qharista wañucherqa, imatachus tarisqanta apakaporqa, ruphaykucherqataj llajtata. 36Chaymantataj kikillantaj ruwarqa Casforpi, Maquelpi, Bosorpi, waj Galaad llajtaspipis. 37Chantaqa, watejmanta Timoteoqa tantasqa soldadosta. Chay runasninwan rikhurimorqa Rafompa chimpampi, wayq'o wasapi. 38Judastaj runasta kacharqa Timoteoj soldadosninta wateqaj. Kutimuspataj, kayta willarqanku: Tukuy kay cheqasmanta paganosqa Timoteoman k'askaykukusqanku. Kunanqa ejercitonqa ashkha soldadosniyoj. 39Chantapis, arabeswampis yanapachikushanku. Chay arabesqa wayq'o wasapi kashanku, wakichisqasña jamusunankupaj, nispa. Chayta uyariytawanqa, Judas llojserqa arabesta taripaj.
40Chayamushajtinña Judas wayq'oman, Timoteo soldadosninman nerqa: Wayq'onta pasanqa chayqa, kayman jamuspa, atipachikusunchejpunichá. 41Sichus manchachikuspa chimpallapi jarakonqa chayqa, noqanchej pasasunchej. Chayaspataj, payta atipaykusun, nispa. 42Judas wayq'oman chayaytawanqa, kurajkunata churarqa mayu cantopi nispa: Ama ni pitapis jarachinkichejchu kaypi. Tukuypuni rinanku tiyan maqanakoj. 43Judas pasarqa ñaupajta. Runasnin qhepampi pasallarqankutaj. Paganosqa, atipachikusqankuta rikuspa, maqanasninkuta wijch'uspa, ayqerqanku Carnáin temploman, chaypi pakakoj. 44Judiostaj llajtaman yaykorqanku. Yaykuspataj llajtata q'alata ruphaykucherqanku templontinta. Templo ukhupi kajkuna tukuyninku wañuchisqas karqanku. Carnáin llajta raqayman tukuchisqa karqa. Chaymantapacha mana ni pi aterqañachu sayayta Judaspa ñaupaqempi.
45Chaymanta Judasqa tantaykucherqa tukuy israelitasta Galaadpi tiyakojkunata. Tantakorqanku wawas, machu runas, warmis ima. Tukuyninku imasninkuta apaspa, ñanta jap'erqanku Judá jallp'aman rinankupaj. 46Chayarqanku Efrón llajtaman. Chay llajtaqa ñan cantopi sayashan. Sumaj perqachasqa kasqa, sinch'i jark'asniyoj. Chaynintapuni pasananku karqa judiosqa. Mana atikorqachu riyta lloq'e ladomanchus, paña ladomanchus. 47Llajtayojkunataj mana munarqankuchu pasanankuta. Tukuynejpi jark'anasta churaykusqanku ama llajtaman yaykunankupaj. Rumi perqastapis churallasqankutaj. 48Judastaj chay llajtayojkunamanqa kachaswan allin kaywan nichimusqa: Pasarichiwayku, llajtaykuman chayanaykupaj. Mana ni imata ruwasqaykuchu. Pasallasqayku, nispa. Jinapis, chay runasqa mana munarqankuchu pasachiyta.
49Chantaqa, Judas nerqa soldadosninman wakichikunankuta maqanakupaj. 50Soldadosqa, wakichikuytawankamataj llajtaman rerqanku. Tuta p'unchay maqanakuspataj atiparqanku. 51Judasqa kamacherqa wañuchinankuta espadawan tukuy qharista. Llajtata raqayman tukucherqa. Tukuy ima tarisqantapis apakaporqa. Ayasta saruspataj llajtanta pasarqa. 52Chaymantataj, Jordán mayunta pasarqanku, chayarqankutaj uj jatun pampaman, Bet-Seampa qayllanman. 53Judasqa, purisqampi mana thaskiyta atejkunata sonqochaykorqa, tukuymantaj yanaparqa Judá llajtaman chayanankukama. 54Anchata kusikuspa wicharerqanku Sión orqoman. Chaypi Diosman rikuchikusta jaywarqanku agradecekuspa allillanta chayasqankumanta, mana ni uj runallatapis chinkachispa.
Judiosqa Yamniapi atipachikunku
[2 Mac. 12.32-45]
55-57Judaswan Jonatanwan kashajtinkuraj Galaad jallp'api, wauqenku Simontaj Galileapi kashajtin, Tolemaida chimpapi, Zacariaspa wawan Josewan Azariaswan Judeapi qhepakusqanku soldadosninkuwan. Chaypitaj uyarisqanku imatachus Judasqa wauqesninwan ima ruwasqankuta. Paykunaqa paykuna ukhu nisqanku kay jinata: Noqanchejpis sutisninchejta jatunyachina llojsispa maqanakoj, muyuyninchejpi kaj paganoswan, nispa. 58Soldadosninkumantaj nisqanku rinankuta Yamniaman maqanakoj. 59Gorgiastaj soldadosninwan llojserqa llajtamanta paykunata taripaj, tinkunakuyta munaspa. 60Josepis Azariaspis atipachikorqanku. Iskayninkuta Gorgiasqa qhaticherqa Judea lindekama. Chay kuti wañorqanku iskay waranqa israelita runas. 61Israelitasqa atipachikorqanku mana Judasta kasukusqankurayku, nitaj wauqesnintapis, pataman oqharikuspa. 62Nitaj Josepis, nitaj Azariaspis jatun sonqoyojchu karqanku. Mana ajllachikunkumanchu Israel aylluta llakiymanta llojsichinankupaj.
63Tukuy Israelpi wapu Judaspis wauqesnimpis sumaj rejsisqas karqanku. Jinallataj waj jallp'aspipis, maymanchus sutisninku chayasqa chaypi. 64Runasqa yupa kaj kanku muyuyninkupi sutisninkuta qhaparispa.
65Judasqa wauqesninwan khuska kachaykukorqa uranejman maqanakoj Esaúj mirayninwan. Chayaspataj, jap'ikaporqa Hebrón llajtata ranchosnintinta. Llajta perqasta urmaracherqa. Chaymantataj, patapi kaj qhawanasta, llajtaj muyuynimpi kasharqanku chaykunata, q'alata ruphaykucherqa. 66Chaymanta llojserqa filisteospa llajtankuman rinampaj, Manesanejta pasaspa. 67Chay kuti wakin sacerdotes maqanakupi urmarqanku, mana unanchaspalla wapu wapus jina maqanakuyta munasqankurayku. 68Chantá Judasqa muyuykamorqa Azotoman. Chayqa filisteospa llajtanku. Chaypi altaresta phiriykucherqa, ruphaykucherqataj lantista. Chaymantataj, tukuy ima tarisqanta chay llajtamanta apakaporqa. Chantaqa, kutimporqa Judea jallp'aman.
Currently Selected:
1 MACABEOS 5: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.