1 MACABEOS 4
4
Emauspi maqanaku
[2 Mac. 8.24-29, 34-36]
1Uj runa Gorgias sutiyoj kachaykukorqa chakipi purej phishqa waranqa soldadoswan, caballopi rej waranqa soldadoswantaj. Tukuyninku allin ajllasqas karqanku. Tukuy paykunaqa chaupi tutata llojserqanku. 2Chay runasqa munasharqanku ch'inllamanta yaykuyta judío jarakuman ujllapi runasta maqaj. Paykunata pusarqanku Jerusalempi tiyakoj runas. 3Jina kajtimpis, Judasqa yacharqa chayta yuyasqankuta. Pay, soldadosninwan khuska llojserqa reypa soldadosninta wajtaj, Emauspi kasharqanku chaykunata. 4Judasqa chayta munasharqa soldados kashajtinkuraj jarakuna jawapi. 5Gorgiastaj tuta chayamorqa Judaspa jarakunman. Chaypitaj mana ni pita tarerqachu. Chaymantataj, Gorgiasqa paykunata mask'aj rerqa orqosman, yuyaspa ayqesqankuta, paykunamanta manchachikuspa.
6Q'ayantintaj tutamanta Judasqa rikhurimorqa pampapi kinsa waranqa runaswan. Mana apakusqankuchu maqanasta nitaj espadastapis, munasqankuman jina. 7Judaspa runasnin rikorqanku contrasninkuta, kallpayojta, sumaj wakichisqasta, caballosniyojta. Tukuy chay soldadosqa yachasqas karqanku maqanakuyman. 8Judastaj runasninman kay jinata nerqa: Amapuni manchachikuychejchu chay chhika runasmanta. Ama kharkatitiychejchu chayamojtinku. 9Yuyarikuychej imaynatachus ñaupa tatasninchej salvakorqanku Puka Qochanta pasashajtinku, maypachachus faraón runasninwan khuska qhepankuta risharqa. 10Kunanqa, Diospa khuyakuyninta mañakunachej. Mañakuna yuyarikunanta chay tratomanta, ñaupa tatasninchejwan ruwasqan chaymanta. Mañarikuna t'unarparichinanta chay soldadosta, ñaupaqenchejpi kashanku chaykunata. 11Ajinamanta, tukuy naciones yachanqanku kasqanta pichus Israel aylluta salvan, kacharichintaj enemigosnimpa makisninmanta.
12Karu llajtayojkunaqa rikorqanku israelitasta, paykunaman kachaykukojkunata. 13Rikuspataj, jaramanta llojserqanku maqanakoj. Judaspa soldadosnin pututusninkuta waqacherqanku. 14Chaymantataj yaykorqanku tinkunakoj. Chaypacha, mana creejkunaqa atipachikorqanku. Atipachikuytawantaj, pampaman ayqekaporqanku. 15Qhepapi kajkuna espadawan wañuchisqas karqanku. Wajkunata israelitasqa qhaterqanku Gezerkama, Idumea pampaskama, Azoto pampaskama, Jabnia pampaskamataj. Tukuypi wañusqasqas enemigos ukhupi kinsa waranqa karqanku. 16-17Judasqa, kutimuspa soldadosninwan enemigosta qhatichisqanmantapacha, kay jinata nerqa runasman: Ama munaychejchu kunanqa imallatapis jap'ikapuyta. Kanqaraj maqanakus noqanchejpajqa. 18Gorgias soldadosninwan sayashan orqopi, qayllallanchejpi. Sinch'ita sayariychej ñaupaqenkupi. Maqanakuychej paykunawanqa. Qhepantaraj imatapis apakapullankichej.
19Judas chayta nishajtin, orqomanta rikhurimunku enemigo soldados wateqaj. 20Chay soldadosqa rikunku chay rato masisninku ayqesqankuta, llojsishaj q'osñita rikuspataj yacharqankuña jaranku ruphachisqa kasqanta. 21Chayta rikuspa manchachikuywan kharkatiterqanku. Rikorqankutaj pampapi Judaspa soldadosnin wakichisqasña kasqankuta. 22Rikuytawantaj qhaj pacha tukuyninku ayqerqanku filisteospaman.
23Judas kutimporqa pallakoj jarapi tarisqanta. Paypa runasnin apakaporqanku ashkhata: Qorita, qolqeta, kulli colorniyoj puka colorniyojtaj awayusta, wajkunata ima. 24Kutimushaspa israelitasqa salmosta takisharqanku, Diosman graciasta qospa: Payqa k'achamin. Khuyakuynenqa wiñaypaj, nispa. 25Chay diaqa may jatun karqa Israelpaj.
26Karu llajtayojkuna, salvakusqanku chaykuna, llajtankuman chayarqanku, willarqankutaj Lisiasman imachus pasasqanta. 27Lisiastaj, chayta uyarispa mayta llakikorqa phutikorqataj, imaraykuchus Israelpi payman mana risqachu suyasqanman jina. Israelitas mana junt'asqankuchu ari reypa kamachisqantaqa.
Lisias chayamun maqanakoj
[2 Mac. 11.1-12]
28Qhepaj watata Lisiasqa wakicherqa sojta chunka waranqa runasta, phishqa waranqa caballostawan, israelitaswan tinkukoj. 29Lisiasqa Idumeanta rerqa, jarakorqataj Bet-Surpi. Chayman rerqa Judasqa chunka waranqa runaswan. 30Judasqa, rikuspataj Lisiaspa soldadosnin chhika yupa kasqankuta, Diosmanta kay jinata mañakorqa:
Bendito kanki Israelpa salvadornin. Qanqa David kamachiykinejta llauch'iyacherqanki jatunkaray runata, qorqankitaj filisteo soldadosta Saulpa wawan Jonatanman, paypa maqanakunasninta apajmampis. 31Ajinallatataj kunanqa churay kay soldadosta Israel aylluykej makisninman. P'enqakuchunku chay runasqa runasmantawan caballosmantawan. 32Mancharichiy paykunata. Amaña kallpankumanta umasninkuta oqharichunkuchu. Pampaman k'umuykuchisqas kachunku, amataj ni jayk'aj sayarichunkuñachu. 33Munakusunku runasniykej espadasninkuwan wañuchisqas kachunku. Ajinamanta, qanta rejsisojkuna sutiykita yupaychanqanku.
34Iskaynin soldado tropas tinkunakorqanku. Wañorqankutaj phishqa waranqa Lisiaspa soldadosnin. 35Lisiastaj rikorqa soldadosnin pisi sonqo kasqankuta. Judaspa runasninrí wapu wapusman tukusharqanku. Paykunaqa manapuni wañuymanta mancharikusharqankuchu. Chayrayku Lisiasqa riporqa Antioquiaman. Chaypitaj mask'asharqa ejercitonta jatunyachiyta mosoj soldadoswan. Munasharqapuni kutiriyta Judeaman.
Judasqa templota llimphuyachin
[2 Mac. 10.1-8]
36Chaypacha, Judaspis hermanosnimpis nisharqanku paykunapura: Enemigosninchej atipachikunku. Wicharina ari Jerusalenman, Santo templota llimphuchaj, watejmanta Diospaj santoyachisqa kanampaj. 37Tukuy soldadosta tantaspataj Sión orqoman wicharerqanku. 38Chaypi Diospa wasenqa ch'usajpacha kasqa, altartaj ch'ichichasqa, punkus ruphachisqas. Wasistaj t'unarasqas kasqanku. Patiospitaj qhora wiñasqa montepi jina. 39Chayta rikuspa, israelitasqa p'achasninkuta llik'irasqanku, paran parantataj waqasqanku, umasninku patapitaj ushphata churakusqanku. 40Chaymantataj pampaman k'umuykukorqanku, pututustapis waqacherqanku, qhaparerqankutaj janaj pachaman ñawisninkuta oqharispa. 41Judas ajllarqa wakin runasta perqasman rinankupaj maqanakoj. Payrí templopi kakullarqa chayta llimphuyachiyta munaspa. 42Chantaqa Judas ajllarqa mana k'amina sacerdotesta. Diospa leyninman k'askasqas kajkunata. 43Paykunaman nerqa templota llimphuchanankuta, apanankutataj mana creejkunaj ch'ichi altarnimpa rumisninkuta q'opa wijch'unaman. 44Chaymantataj, tantakuspa nisharqanku imatachus ruwanankuta chay altarwan, Diosman rikuchikusta jaywanku chaywan, ch'ichichasqa kasqanrayku. 45Allinta unanchaspataj nerqanku kosa kasqanta phiriykuchiy. Ajinamanta, mana p'enqachikonqankuchu, paganos ch'ichichasqankumanta. 46Chay altar rumista churarqanku templo orqopi, sumaj cheqapi, rikhurimunankama uj profeta imachus chaywan ruwanankuta sut'inchaj. 47Chantaqa mask'arqanku mana allinyachisqa rumista, leypa nisqanman jina, sayaricherqankutaj mosoj altarta, ñaupaj kajman rijch'akojta. 48Mosoj templota ruwarqanku. Santoyacherqankutaj chaupipi kajta patiostapis. 49Mosoj santoyachisqa imasta ruwarqanku. Chaymantataj, candelabrota watejmanta churarqanku santuariopi. Churarqankutaj q'osñichina churana altarta, t'antata jaywana altartapis. 50Altar patapi inciensota q'osñicherqanku, jap'icherqankutaj candelabro lamparasta, santo lugarpi k'anchanankupaj. 51Mesa pataman churaykorqanku t'antasta. Chantataj cortinastapis warqhorqanku. Ajinamanta, tukuy ruwanankuta tukorqanku.
52Iskay chunka phishqayoj kaj diapi, Quisleu nisqa killapitaj, chayqa jisq'on kaj killa, pachaj tawa chunka pusajniyoj watapi, chhapu chhaputa sayarikorqanku. 53Sayarikuytawantaj, Diospa leyninman jina uj rikuchikuta Diosman jaywarqanku rikuchikuspaj ruwasqanku chay mosoj altar patapi. 54Uj wataña kashajtin paganos ch'ichichasqankumanta altarta, chay kikin diapi israelitasqa watejmanta santoyacherqanku takispa, guitarrasta, arpasta, tocanastapis waqachispa. 55Tukuy runasqa qonqorikorqanku, pampamantaj k'umuykukorqanku Diosta yupaychaspa, agradecekuspataj tukuy imas allin paykunapaj risqanmanta.
56Pusaj día junt'ata kusikorqanku altarta santoyachisqankumanta. Kusikuspa rikuchikusta jaywarqanku, Diosta alabaspa, perdón mañakuspa, agradecekuspataj. 57Temploj punkunta k'achancharqanku qori pilluswan warawaswan ima. Chantapis, yaykunasman punkusta churarqanku, mosojyacherqankutaj wasista. 58Jatun kusikuywan runasqa kusikorqanku, manaña k'umuykuchisqas kasqankumanta paganoswanqa. 59Judasqa, hermanosninwan khuska, tukuy israelita runaswantaj nerqanku chay kutimantapacha fiestata ruwanankuta sapa wata jatun kusikuywan, pusaj día junt'ata, qallarispa Quisleu killaj iskay chunka phishqayoj dianmanta, yuyarikuspa mosoj altar santoyachisqa kasqanmanta.
60Chaypacha, oqharerqanku Sión orqoj muyuynimpi jatuchaj perqasta sinch'i jark'anastawan, ama watejmanta mana creejkuna yaykunankupaj, chay lugarta ch'ichichaj. 61Judasqa chayman kacharqa qhawaj soldadosta jark'anankupaj. Chaymantataj, Bet-Surtapis perqachaykorqa, jark'ana llajta kanampaj Idumeaj chimpampi.
Currently Selected:
1 MACABEOS 4: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.