1 MACABEOS 6
6
Antíoco Epífanes wañupun
[2 Mac. 1.11-17; 9; 10.9-11]
1Rey Antiocoqa, patapi kaj jallp'asnejpi purishajtin, yachasqa Persiapi kasqanta uj llajta Elimaida sutiyoj. Chay llajtaqa may rejsisqa kasqa qhapaj kasqanrayku, qolqeyojtaj qoriyojtaj. 2Chay llajtapi kasqa uj templo may qhapaj. Chay templo ukhupi Filipoj wawan Alejandroqa, Macedonia llajtayoj rey, pichus ñaupajta griegosta kamacherqa, saqesqa qorimanta ruwasqa maqanakuna p'achasta, corazasta, t'ojsinasta ima. 3Chay llajtaman ripusqa Antiocoqa jap'ikapuyta munaspa, munaspataj apakapuyta chay llajtaj imasninta. Manataj atisqachu, imaraykuchus llajtayojkunaqa yuyayninta yachasqanku. 4Runasqa maqanasniyoj llojsisqanku paywan tinkunakoj. Chayraykoqa, Antíoco ayqerqa, kutimporqataj Babiloniaman may llakisqa.
5Persiallapiraj kashajtin willarqanku soldadosnin atipachikusqankuta Judeapi. 6Nerqanku Lisiasqa ayqesqanta judiosmanta ashkha soldadosniyoj kajtimpis. Judiosqa mosoj maqanasniyojña kasqanku, kallpachakusqankutaj ejercitosmanta jap'ikusqankuwan. 7Yachallarqataj judiosqa phirisqankuta chay millay lantita mayqentachus pay kikin churachisqa Jerusalén altarpi. Willasqankutaj judiosqa watejmanta sayarichisqankuta templo perqasta, imaynachus ñaupajta karqa ajinata. Chaymantataj, payman willasqanku judiosqa sinch'iyachisqankuta Bet-Sur llajtata. 8Tukuy chaykunata yachaspataj, reyqa anchatapuni mancharikorqa, llakiywantaj waqarqa. Phutiywan onqorqa, mana suyasqanman jinachu tukuy ima risqanmanta. 9Unayta ajina karqa Antiocoqa, mana llojsiyta atispa chay phutiyninmanta. 10Chaymanta, wañuy patapiña rikukuspa, kausaqesninta wajyachisqa, nisqataj: Puñoyqa ñawisniymanta karunchakun. Llakiyniy ancha llasa. 11Chayrayku tapukuni: Imaraykutaj kay jina sinch'i llakiy jamuwan? Imaraykutaj jina phutisqa kashaniri? Noqaqa k'acha sonqo karqani. Tukuy munakuwaj kanku atiyniyoj kashajtiy. 12Kunanqa yuyarikushani chay sajra ruwasqaymanta Jerusalempi. Chaymanta suwarqani qori imasta, qolqe imastataj. Qhasillamantataj Judea runasta wañucherqani. 13Kunanqa yachaniña imaraykuchus jamuwan kay llakiy. Kunanqa may llakisqa wañushani llajtaymanta kay jina karupi.
14Filipota wajyachispataj, ujnin amigosninmanta chayta, tukuy reinompa mayordomonman tukucherqa. 15Payman jaywarqataj pillunta, p'achasninta anillontawan. Nerqataj wawan Antiocota qhawananta wakichispa rey kanampaj. 16Chaypi wañuporqa rey Antiocoqa pachaj tawa chunka isq'onniyoj watapi.
17Lisiastaj, yachaytawan rey wañupusqanta, rey tiyanapi tiyaykucherqa reypa wawan Antiocota, pitachus qhawasqa wawa kasqanmantapacha, churarqataj Eupátor sutita.
Judas Macabeo Jerusalén llajtaman chayan
[2 Mac. 13.1-22]
18Jerusalén jark'anasta qhawaj soldadosqa templota qhawasharqanku, ama chaymanta israelitas llojsinankupaj. Tukuy imapi llakichej kanku paykunataqa, yanapajtaj kanku paganosta. 19Judastaj munaspaña paykunata ujta tukuchiyta, tukuy runasta wajyarqa paywan khuska rinankupaj llajtata muyuykunankupaj. 20Pachaj phishqa chunka kaj watapitaj tukuyninku ujllapi tantaykukuspa qallarerqanku llajta perqata urmarachiyta. Chaypajqa wakicherqanku cheqasta chaymanta wach'inasninkuta wijch'umunankupaj, ruwakorqankutaj maqanakupaj tukuy laya imasta.
21Ukhupi kajkunamanta wakinkoqa ayqeyta aterqanku. Paykunamantaj wakin rumi sonqo israelitas k'askakusqanku. 22Tukuy paykunaqa risqanku reypaman nispa: Jayk'ajkamataj mana ni imata naspalla kakunkiri? Jayk'ajtaj justiciata ruwapusqaykuri? Manachu yanapawasqayku kutichikunaykupaj llajta masisniykumanta? 23Noqaykoqa tukuy sonqo tataykita sirvimorqayku, nisqanta uyarikorqayku, kamachisqantataj kasukorqayku. 24Chayrayku kunanqa llajta masisniyku phiña ñawiwan qhawawayku. Pikunatachus jap'inku noqaykumanta wañuchinkupacha. Kapuwasqaykutapis suwakapunku. 25Mana noqaykullatachu wajtashanku, manachayqa, qampa runasniykitapis. 26Kunampis, Jerusalén llajtata jap'ikapuyta munashanku. Chantapis, templotawan, Bet-Sur llajtatawan perqaswan muyuykuchinku. 27Mana jark'anki chayqa kunallan, reyniyku, aswan sajrakunata ruwanqankuchá. Qanrí mana atinkichu atipayta paykunataqa. 28Chayta uyariytawanqa, rey maytapuni phiñakorqa. Chantaqa wajyacherqa tukuy kausaqesninta, soldado kamachejkunata, caballería kamachejkunata ima. 29Chantaqa payman k'askakusqanku waj llajtayoj soldados. Paykuna ukhupi kasqa jatun qocha nacionesmantapis jamojkuna. 30Reypa soldadosnin karqanku pachaj waranqa chakipi purejkuna. Chantá, iskay chunka waranqa caballopi rejkuna. Kallasqataj kinsa chunka iskayniyoj elefantes, maqanakupaj yachachisqas. 31Tukuy chaykunaqa Idumeanta pasasqanku, jarakusqankutaj Bet-Surpa chimpampi. Ashkha día junt'ata Bet-Sur llajtaman yaykuyta munashasqanku. Chaypajqa maqanaku imasta apakusqanku. Israelitastaj, jark'anasninkumanta llojsispa chay makinasta ruphaykuchisqanku, maqanakusqankutaj mana manchachikuspa.
32Judastaj, ripuspa Jerusalén jark'anamanta, jaranta oqharichisqa Bet-Zacarías qayllapi, reypa jarampa chimpampi. 33Q'ayantintaj tutamanta rey usqhayllata kachaykukorqa Bet-Zacariasman soldadosninwan. Runasqa wakichikorqanku tinkupaj pututusninkuta waqachispa. 34Elefantesman qosqanku uva yakuta, mora yakutawan, chaywan kallpachasqas maqanakuman rinankupaj. 35Batallones chaupipi churasqanku elefantestaqa. Sapa elefantej muyuynimpi karqa waranqa runas sumaj p'achallisqas corazaswan, umankupi fierro monterayoj. Kallarqataj qayllankupi phishqa pachaj caballopi rejkuna ajllasqa runas. 36Chay runasqa elefantej ñaupaqempipuni kakoj kanku. Rillajtaj kanku mayllamampis elefantewan khuska. 37Sapa elefantej wasampi watasqa karqa uj k'ullumanta ruwasqa caja, kinsa runayoj, pikunachus chay patamanta maqanakoj kanku. Cajaj ñaupaqempitaj tiyakoj elefanteta purichej, India llajtayoj runa. 38Caballopi rejkunataj churakoj kanku wakinku lloq'enejpi, wakinkutaj pañanejpi. Paykunaqa qallarej kanku maqanakuyta. Chakipi rejkunataj paykunata jark'aj kanku. 39Inteqa lliphirichej chay qorimanta broncemantawan jark'anasta. Orqospis lliphirej kanku larwashaj k'anchanas jina.
40Wakin soldados orqosman wicharisqanku. Wakintaj pampallanta risharqanku. Tukuy reypa soldadosnenqa sonqochasqas risharqanku sinru sinrulla. 41Karumanta uyarikun purisqanku maqanasninkuta sonachispa. Chayta uyarejqa manchachikuywan kharkatiterqa. Ashkha karqanku ari chay runasqa, kallpayojtaj atiyniyojtaj.
42Judastaj runasninwan khuska thaskisharqa paykunawan tinkoj. Tinkunakuytawanqa, sojta pachaj reypa soldadosnin urmarqanku. 43Uj runataj, Eleazar sutiyoj, Avarán nisqa, rikusqa uj elefanteta reypa unanchanwan k'achanchasqata. Chay elefanteqa aswan jatun kasqa tukuy elefantesmanta. Rikuspataj, Eleazarqa, chaypichá kashan rey, nisqa. 44Eleazarqa chaypacha, ayllunrayku kausayninta churarqa. Ajinamantataj, sutenqa wiñaypaj rejsisqaña. 45Ujta sat'iykukusqa soldados chaupipi, kayman jaqayman wajtaspa, runasta wañuchispa. Soldadosqa ithirej kanku. Ajinamanta, pay pasallarqa. 46Elefantej wijsan urapi chukuspataj, wijsanta t'ojsispa wañucherqapacha. Elefantetaj wañuynimpi Eleazarpa patanman urmaykorqa, chay pachallapitaj wañuchispa. 47Jinapis, rikuspa israelitasqa reypa atiyninta soldadosnimpa kallpankutawan, ayqellarqanku.
48Wakin soldados Jerusalenman rerqanku israelitasta wajtaj. Reytaj soldadosninwan muyuykucherqa Judeata, Sión orqota ima. 49Chaymantataj, payqa allinyakorqa Bet-Sur llajtamanta runaswan. Chay runastaj llajtamanta llojserqanku. Chaypi mikhuna mana kasqachu. Runasqa manapuni atinkumanchu karqa sayayta enemigos munashajtinku llajtaman yaykuyta. Chay watapi jallp'aqa samarinan karqa, samarina wata kasqanrayku. 50Reytaj yaykullarqa Bet-Surman. Chaypitaj saqerqa uj regimientota. 51Chantaqa unayta kachaykukorqa temploj contranman. Chaypajqa ruwacherqa alto patasta chaymanta rumista choqamunankupaj llajtaman. Ruwacherqataj maqanaku makinasta, nina wijch'umunasta, rumi choqanasta, wach'ina kachamunasta, warak'astawan. 52Israelitaspis makinasta ruwasqanku kutichikunankupaj. Ajinamanta, unayta maqanakusharqanku. 53Jinapis, samarina wata kasqanrayku chay wataqa, mana ni ima mikhunapaj karqachu pirwasninkupi. Chantapis, chay israelitasqa, Judeaman jamorqanku pagano llajtasmanta chaykuna, tukuy puchusqan mikhunatapis tukusqankuña. 54Yarqhay anchaña karqa. Chayrayku templopi pisi runaslla qhepakusqanku. Wakinku wasisninkuman ripurasqanku.
Reywan judioswan allinyakunku
[2 Mac. 13.23-26; 11.21-26]
55Nerqanchejña rey Antiocoqa wañuy patapi kashajtin, nisqanta Filipoman wakichinanta wawan Antiocota rey kanampaj. 56Chantá willasqanku Lisiasman chay Filipoqa kutimusqanta Persiamantawan Mediamantawan, reypa soldadosninwan khuska. Nisqankutaj Lisiasman Filipoqa munashasqanta gobiernoman wichariyta. 57Chayta yachaytawanqa, Lisias usqhayllata ordenta qorqa soldadosninman rinankupaj. Nerqataj reyman, kamachejkunaman, soldadosmampis: Kallpanchejqa pisiyashan astawan sapa día. Mikhunanchejpis tukukapushanña. Yaykuyta munashanchej chay lugarpis may sinch'i. Chantapis, qhawananchej tiyan reino asuntosta. 58Uj tratota ruwana chay runaswan. Allinyakamuna paykunawan tukuynin nacionninkuwampis. 59Kausallachunku ñaupajta jina, leyesninkuman jina, costumbresninkuta siguispa. Mana saqesqanchejrayku leyesninkuman jina kausanankuta, paykunaqa phiñakunku kaytataj ruwawayku. 60Nisqanqa allin rijch'arqa reymampis kurajkunamampis. Lisiastaj nichimorqa israelitasman allinyakunankuta, israelitastaj arí nerqanku. 61Reypis kamachejkunapis juramentota ruwaspa, chay tratota ruwarqanku. Chaymantataj israelitasqa jark'anankumanta llojserqanku. 62Reytaj, Sión orqoman chayajtintaj, rikorqa sumaj sinch'iyachisqa kasqanta chay lugarqa. Chantapis, juramentota p'akispa ordenta qorqa t'unarparichinankupaj muyuynimpi kashaj perqasta. 63Chaymantataj, usqhayllata riporqa Antioquiaman. Chaypi Filipo kamachej jina sayashasqaña. Contranman kachaykukuspataj, sinch'ita maqanakuytawantaj, llajtata jap'ikaporqa.
Currently Selected:
1 MACABEOS 6: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.