1 JUAN 5

Juchata atipanchej

1Pillapis Jesusqa Cristo kasqanta creen chayqa, Diospa wawan. Pillapis tatanta munakojqa, wawantapis munakullantaj. 2Kaypi yachanchej Diospa wawasninta munakusqanchejta, Diosta munakojtinchej, kamachiykunasnintataj kasojtinchej. 3Diosta munakoyqa kamachisqasninta junt'aymin, kamachisqasnintaj junt'ana jinalla kanku. 4Pillapis Diospa wawan kajqa kay pachata atipan. Kaymá atipayqa. Creesqaykichej kay pachata atipan. 5Pitaj kay pachata atipan, manachu Jesusqa Diospa Churin kasqanta creejlla?

Diospa Churinmanta willanku

6Kaymin yakuwan, yawarwan jamoj Jesucristoqa. Manataj yakullawanchu jamorqa, astawanqa yakuwan, yawarwan ima. Kay imasmanta kikin Espíritu willawanchej; imaraykuchus Espiritoqa cheqa kajmin. 7-8Kinsa kanku willajkunaqa: [Janaj pachapi Dios Tata, paypa Churin, Santo Espirituwan. Paykunataj ujlla kanku. Kay pachapi willajkunapis kinsallataj kanku]: Santo Espíritu, yaku, yawar ima. Kinsantintaj uj kikinta willanku. 9Runaspa willasqasninkutapis jap'ikunchej; kaymanta aswan kurajqa Diospa willasqan; kaytaj Diospa willaynenqa, Churinmanta willawasqanchej. 10Pichus Diospa Churimpi creejqa, Diospa willasqanta sonqompi jap'in. Diospi mana creejrí, Diosta llullata jina rikhurichin, Churinmanta Diospa willasqanta mana creesqanrayku. 11Kaytaj chay willayqa: Dios wiñay kausayta qowasqanchej, kay wiñay kausaytaj Churimpi kashan. 12Diospa Churinta sonqompi jap'ejqa kausayniyoj. Diospa Churinta mana sonqompi jap'ejrí, mana kausayniyojchu.

Wiñay kausay

13Kay imasta escribimuykichej, Diospa Churimpi creesqaykichejrayku, yachanaykichejpaj wiñay kausayniyoj kasqaykichejta.

14Kaytaj Diospi suyakuyninchejqa. Munayninman jinachus imallatapis mañakusunman chayqa, pay uyariwanchej. 15Imallatapis Diosmanta mañakojtinchejqa, yachanchej pay uyariwasqanchejta; ajinallatataj mañakusqanchejta paymanta jap'isunchej.

16Pillapis wauqenta rikunman mana wañuyman apaj juchawan juchallejta chayqa, Diosmanta paypaj mañapuchun. Diostaj payman kausayta qonqa. Kayta nini mana wañuyman apaj juchawan juchallejkunapaj. Tiyallantaj wañuyman apaj juchapis. Mana ninichu Diosmanta mañanata chay juchawan kajpaj. 17Tukuy mana cheqan kajta ruwayqa jucha. Chaywampis, tiyallantaj wañuyman mana apaj jucha.

18Yachanchej Diosmanta nacejqa mana juchapi purisqanta, imaraykuchus Diospa Churin payta juchamanta waqaychan. Chayrayku supayqa mana atinchu payta llankhaykuyllatapis. 19Yachanchej Diosmanta kasqanchejta, mundontintaj supaypa atiynimpi kasqanta. 20Yachanchej Diospa Churin jamuspa yachayta qowasqanchejta, cheqa Diosta rejsinanchejpaj; cheqa Churimpitaj kananchejpaj. Pay cheqa kaj Diosqa, wiñay kausaytaj. 21Wawitasníy, qhasi mana kaj dioskunamanta allinta qhawakuychej.

Currently Selected:

1 JUAN 5: QCHSB

Highlight

Copy

Compare