1 JUAN 4

Diospa Espíritun, anticristoj espiritunwan

1Munakusqasníy, ama pillatapis Diospa yuyaychasqan kani nejkunataqa creeychejchu; allintaraj paykunata rejsiychej Diosmantachus kanku, manachus chayta, imaraykuchus ashkha llulla profetas tukuynejpi rikhurishanku. 2Kay jinapi rejsinkichej Diospa yuyayninman parlajta. Pillapis Jesucristo aychapi jamusqanta yachachejqa, Diosmanta. 3Pillapis Jesucristota qhesachajqa, mana Diosmantachu, Cristoj contranmantamin. Chay anticristo jamunanmanta uyarerqankichejña; kunan payqa kay pachapiña kashan.

4Wawitasníy, qankunaqa Diosmanta kankichej, paykunatataj atiparqankichej, imaraykuchus qankunapi kajqa astawan atiyniyoj kay pachapi kajmanta nisqaqa. 5Paykunaqa kay pachamanta kanku. Chayrayku kay pachapi imasllamanta parlanku. Kay pacha runastaj paykunata uyarinku. 6Noqanchejqa Diosmanta kanchej. Pichus Diosta rejsin chayqa, uyariwanchej. Diosta mana rejsejrí, mana uyariwanchejchu. Chay jinamanta cheqa Espirituta rejsinchej, pantachej espiritutapis.

Diosqa munakuy

7Munakusqasníy, purajmanta munanakunachej. Munakoyqa Diosmantamin. Munakojqa Diospa wawan, Diostataj rejsin. 8Mana munakojqa Diosta mana rejsinchu; Diosqa munakuymin. 9Kay jinamanta Diosqa munakuyninta rikuchiwarqanchej: Uj k'ata Churinta kachamusqampi paynejta kausananchejpaj. 10Kaymá chay munakoyqa. Manaraj Diosta munakushajtinchej, payqa munakuwarqanchejña. Churintataj kachamorqa wañunampaj juchasninchejrayku.

11Munakusqasníy, chay jinatachus Dios munakuwarqanchej chayqa, noqanchejpis purajmanta munanakunachej. 12Mana ni jayk'aj pipis Diosta rikorqachu. Purajmanta munanakojtinchejqa, Dios noqanchejpi kashan, munakuynintaj noqanchejpi junt'akun. 13Kay jinapi yachachej Diospi kasqanchejta, paytaj noqanchejpi, Espiritunta qowasqanchejpi. 14Noqaykutaj rikorqayku, willaykutaj Dios Tata churinta kachamusqanta kay pachapi runaspa Salvajnin kanampaj. 15Pichus willanman Jesusqa Diospa Churin kasqanta chayqa, Dios paypi kashan, paytaj Diospi.

16Noqanchej rejsinchej, creenchejtaj Dios munakuwasqanchejta. Diosqa munakuymin. Munakuypi kajqa Diospi kashan, Diostaj paypi. 17Kay jinamanta munakoyqa noqanchejpi junt'akun, tukuy sonqo juicio p'unchaypi kananchejpaj. Imaynatachus pay kashan, ajinata noqanchejpis kay pachapi kashanchej. 18Munakuypeqa mana manchachikuy kanchu. Junt'asqa munakoyqa manchachikuyta jawaman qharqon. Manchachikoyqa ñak'ariykunata apamun. Manchachikojqa manaraj munakuywan junt'asqachu kashan.

19Noqanchejqa Diosta munakunchej, pay ñaupajta munakuwasqanchejrayku. 20Pillapis Diosta munakuni ninman, wauqentataj chejninman chayqa, llulla runa. Pichus wauqenta rikushaspa, mana munakunchu chayqa, manallataj Diostapis munakuyta atinchu, mayqentachus mana rikunchu. 21Jesucristoqa kay kamachiyta qowarqanchej: Diosta munakojqa, wauqentapis munakullachuntaj.

Currently Selected:

1 JUAN 4: QCHSB

Highlight

Copy

Compare