1 JUAN 3

Diospa wawasnin

1Qhawariychej, may jinatapunichus Dios Tata munakuwarqanchej, Diospa wawasnin sutichasqas kananchejpaj; cheqamanta ajina kanchej. chayrayku, kay pachapi runakuna mana rejsiwanchejchu, Diosta mana rejsisqankurayku. 2Munakusqasníy, kunanqa Diospa wawasnin kanchej, chaywampis, manaraj sut'ichu imaynachus kananchejqa. Yachanchejtaj, Jesucristo rikhurimojtin payman rijch'akunanchejta, imaraykuchus payta rikusunchej maychus kasqanta jina. 3Pillapis Jesucristopi suyayninta churajqa, pay kikin llimphuchakun, imaynatachus Jesucristopis llimphu kashan, ajinata.

4Juchallikojqa Diospa leyninta p'akin; imaraykuchus juchaqa Diospa leyninta p'akiymin. 5Yachankichej jina, Jesucristoqa jamorqa juchasninchejta chinkachinampaj; manataj paypeqa ni ima jucha kanchu. 6Jesucristowan kakojqa, mana juchachakunchu. Juchallapipuni kakojrí, mana payta rikorqachu, nitaj rejserqachu. 7Wawitasníy, ama piwampis ch'aukiyachikuychejchu. Pichus cheqan kajta ruwajqa, cheqan runa; imaynatachus Jesucristopis cheqan, ajina. 8Juchallikojqa supaypata. Supayqa qallariymanta juchallikun. Chayrayku, Diospa Churenqa jamorqa supaypa ruwasqasninta phirinampaj.

9Diospa wawan kajqa mana juchapi kausanchu; paypeqa Diospa kausaynin kashan. Diospa wawan kasqanraykutaj manaña juchapi kausanmanchu. 10Kay jinapi yachakun Diospa wawasninchus chayrí supaypatachus kasqankoqa. Mana cheqan kajta ruwajqa, nitaj wauqentapis munakojqa, mana Diospa wawanchu.

Ujkuna ujkunawan munanakunamanta

11Kaymin qallariymantapacha uyarisqaykichej willayqa: Ujkuna ujkunawan munanakunanchej. 12Mana Caín jinachu kananchej; payqa supaypata kaspa, wauqenta wañucherqa. Imaraykutaj payta wañucherqari? Caimpa ruwasqasnin sajras karqanku, wauqempatataj allin karqanku.

13Wauqesníy, kay pachapi sajrata kausajkunachus chejnisunkichejman chayqa, ama t'ukuychejchu. 14Noqanchejqa yachanchej wañuymanta kausayman kutirimusqanchejta wauqesninchejta munakusqanchejwan. Mana munakojqa wañusqallaraj kashan. 15Pillapis wauqenta chejnejqa, runa wañuchi; yachankichejtaj runa wañucheqa mana wiñay kausayniyoj kasqanta. 16Jesucristo kausayninta noqanchejrayku qorqa, chaypitaj munakuyninta rejsinchej. Ajinata noqanchejpis wauqesninchejrayku kausayninchejta qonanchej tiyan. 17Kapuyniyoj runachus, wauqenta pisichikojta rikuspa, mana khuyanmanchu chayqa, imaynamantataj chay runaj sonqompi Diospa munakuynin kanmanri? 18Wawitasníy, ama simillawanchu munanakusun, astawanqa ruwanawan, cheqa kajwantaj.

Suyayninchejta Diospi churana

19Kay jinamanta yachanchej cheqa kajmanta kasqanchejta; Diospa ñaupaqempitaj sonqosninchej jallch'asqas kasqankuta. 20Sonqonchejchus imallamantapis k'amiwasunman chayqa, Dios astawan kuraj sonqonchejmanta nisqaqa, tukuy imatataj yachan. 21Munakusqasníy, sonqonchejchus mana k'amiwanchej chayqa, tukuy suyayninchej Diospi kashan. 22Imallatapis Diosmanta mañakusunchej chayqa, paymanta jap'isunchej; imaraykuchus kamachisqasninta junt'anchej, paypa munasqantataj ruwanchej. 23Kaymin Diospa kamachiynenqa: Jesucristo Churimpa sutimpi creespa, ujkuna ujkunawan munanakunanchej, kamachiwasqanchejman jina. 24Pillapis Diospa kamachisqasninta junt'an chayqa, Diospi kashan, Diostaj paypi. Chaypitaj yachanchej Dios noqanchejpi kashasqanta, qowarqanchej chay Espiritunnejta.

Currently Selected:

1 JUAN 3: QCHSB

Highlight

Copy

Compare