1 JUAN 1

Wiñay kausayta qoj

1Kausayta qoj Palabramanta qankunaman escribimuyku. Kay Palabraqa ñapis karqaña kay pacha qallarikushajtin. Noqayku paymanta qankunaman willamuyku imatachus uyarisqaykuta, imatachus ñawisniykuwan rikusqaykuta, imatachus qhawasqaykuta, imatachus makisniykuwan payta llankhasqaykuta ima. 2Kay kausayta qojtaj rikuchikorqa. Noqaykutaj payta rikorqayku. Ajinamanta, qankunaman wiñay kausaymanta willamuyku, rejsichimuykutaj. Chay wiñay kausayqa Dios Tatapi karqa, noqaykumantaj rikuchikuwarqayku. 3Imatachus rikusqaykuta, chay uyarisqaykuta ima, qankunaman willamuyku; qankunapis uj sonqolla noqaykuwan kanaykichejpaj, imaynatachus noqaykupis ujlla kayku Dios Tatawan Jesucristo Churinwampis. 4Kay imasmanta qankunaman escribimuyku, kusiywan sonqoyku junt'asqa kanampaj.

Diosqa k'anchaymin

5Kay yachachiyta Jesucristomanta uyarerqayku, qankunamantaj willamuyku: Diosqa k'anchaymin, manataj paypeqa ni ima laqhayajpis kanchu. 6Dioswan ujlla kanchej nisunman, laqhapitaj purisunman chayqa, noqanchejqa llullakunchej, manataj cheqa kajtachu ruwanchej. 7K'anchaypichus purisunman chayqa, imaynatachus Diospis k'anchaypi kashan, ajinata noqanchejpis, ujkuna ujkunawan uj sonqolla kausanchej. Diospa Churin Jesuspa yawarnintaj tukuy juchamanta pichawanchej.

8Mana juchayojchu kanchej nisunman chayqa, noqallanchejtaj ch'aukiyakunchej. Cheqa kajtaj mana noqanchejpichu kashan. 9Juchasninchejtachus Diosman willakusunman chayqa, yachanchej payqa junt'aj cheqantaj kasqanrayku juchasninchejta pampachananta. Payqa tukuy sajra kayninchejtapis pichawasunchej. 10Mana juchallikunchejchu nisunman chayqa, llullata jina Diosta qhawachinchej, palabrantaj mana noqanchejpichu kashan.

Currently Selected:

1 JUAN 1: QCHSB

Highlight

Copy

Compare