1 CORINTIOS 9

Apostolpata atikun llank'asqanmanta jap'inan

1Manachu libre kani? Manachu apóstol kani? Manachu Jesús Señorninchejta rikorqani? Manachu qankunapis Señorpi noqaj llank'asqay kankichej? 2Sichus wajkunapaj mana apostolchu kani chayqa, cheqamanta qankunapajqa apóstol kani; imaraykuchus Señorpa apostolnin kasqayqa qankunapi yachakun.

3Ajinata kutichikuni, noqapaj rimajkunaman: 4Manachu mikhuytapis ujyaytapis atiyku? 5Ajinallataj, manachu noqapis atiyman creej warmita pusakuyta, imaynatachus waj apostolespis, Señorpa wauqesnin, Pedropis pusakunku ajinata? 6Chayrí noqawan Bernabellawanchu, mana llank'anayoj kasqayku? 7Pi soldadotaj karqa, qolqenta pagaspa kamachita ruwaj? Pitaj uva sach'ata plantaspa poqoyninmanta mana mikhunchu? Chayrí, pichus ovejasta michejqa, manachu ovejaj lechenta ujyanman? 8Kaytaqa runa jinallachu nini? Manachu leypis kikillantataj nin? 9Moisespa leynimpi escribisqa kashan: Ama churankichu ñukuta trillaj wakaman. Diosqa munanchu wakas allimpi kananta? 10Chayta nispaqa noqanchejraykuchu nin? Arí, noqanchejrayku chay leyqa escribikorqa; chayrayku llank'ajqa suyaspa llank'an mana qhasipajchu; trillajpis trillan, poqoyninta oqhariyta suyaspa. 11Sichus noqayku, qankuna ukhupi tarporqayku Espirituman jina chayqa, kunanqa ashkhatachu qankuna ukhumanta cosechata oqharisqayku? 12Sichus qankuna ukhupi wajkuna jap'iyta atinku chayqa, noqaykurí manachu atiykuman llank'asqaykumanta jap'iyta?

Chaywampis mana jinatachu ruwarqayku, astawanqa tukuy imata aguantakullarqayku, Cristoj evangeliompaj ama ima misk'anatapis churanaykupaj. 13Manachu yachankichej templopi llank'ajkunaqa Diosman jaywasqasta mikhusqankuta? Jinallataj altarpi jaywajkunapis manachu altarpi kaj ofrendasmanta jap'illankutaj? 14Ajinallatataj Señor kamacherqa evangeliota willajkunaman, evangeliomanta kausanankuta. 15Noqarí, kay imasmanta mana imatapis jap'ikorqanichu. Kaytapis escribimuykichej, mana ajinata noqawan ruwanaykichejpajchu. Noqaqa wañuyta munayman manaraj pipis kay kusikuyniyta qhechushawajtin.

16Evangeliota willani chayqa, mana imamanta jatunchakunay kanchu. Chaypaj kachasqa kani. Ay, noqamanta, manachus evangeliota willasaj chayqa! 17Chayrayku tukuy sonqowan ruwasaj chayqa, t'inkayta jap'isaj; mana tukuy sonqowan ruwasaj chaypis, evangeliota willanaypaj kachasqapuni kani. 18Mayqentaj noqaj t'inkayri? T'inkayqa kaymin: Kusikuywan qhasillata willasqay Cristoj evangelionta; evangeliopi llank'asqaymanta noqapaj kajta ama orqhonaypaj.

19Chayrayku libre kashaspa kunanqa tukuypa kamachin kani, aswan ashkha runasta Cristoman pusanaypaj. 20Judiospajqa judíos jina kani, judiosta Cristoman pusanaypaj. Leypa kamachimpi kajkunapaj, manapis leypa kamachimpichu kani, leypa kamachimpipis kayman jina kani, leypa kamachimpi kajkunata Cristoman pusanaypaj. 21Mana leyniyojkunapaj mana leyniyoj jina kani, Diospa leynimpi kashaspapis Cristoj leynillampitaj kani, Cristoman mana leyniyojkunata pusanaypaj. 22Pisi kallpayojkunapajqa, pisi kallpayoj jina kani; Cristoman pusanaypaj pisi kallpayojkunata, sapa uj imachus kasqankuman jina tukuni, chay jinamanta wakillantapis salvanaypaj. 23Chay tukuyta ruwani evangeliorayku, chayllawampis yanapakoj kanaypaj.

24Manachu yachankichej pujllana kanchapi correjkunamanta? Cheqamanta tukuy correnku, chaywampis ujlla t'inkataqa jap'in atipasqanrayku. Qankunapis correychej t'inkata jap'inaykichejkama. 25Pillapis correspa atipanampaj wakichikun chayqa, cuerponta jark'an tukuy ima mana allin kajmanta; cheqamanta paykunaqa ismoj pilluta jap'inankupaj; noqanchejrí, mana ismoj pilluta jap'inanchejpaj. 26Chayrayku noqapis ajinata correni, mana qhasillapajchu. Ajinata maqanakuni mana wayrallata sajmaj jinachu. 27Astawampis cuerpoyta maqani, kasuchikunitaj, ama noqa wajkunaj yachachejnin kashaspa, noqa kikiy qhesachasqa kanaypaj.

Currently Selected:

1 CORINTIOS 9: QCHSB

Highlight

Copy

Compare