1 CORINTIOS 10

Lantikunata mana yupaychanachu

1Hermanos, noqa munani qankuna yuyarikunaykichejta ñaupa tatasninchej phuyu urapi tukuy kasqankumanta, tukuytajmanta puka mar qochata pasasqankumanta. 2Ajinamanta, tukuyninku Moiseswan khuskachasqas bautizachikuspa karqanku phuyupi, mar qochapi ima. 3Jinallataj tukuyninku mikhorqanku Espirituman jina uj kikin mikhuyllata. 4Tukuyninkutaj ujyarqanku kikin ujyanallatataj Espirituman jina qaqamanta llojsimoj yakutaqa. Espirituman jina qaqarí, paykunawan khuska purej, chay qaqataj Cristo karqa. 5Chaywampis, paykunamanta ashkhas Diosta mana kasorqankuchu; chayrayku chay ch'impi wañurarqanku.

6Chay tukuy imas karqa noqanchej yachakunanchejpaj, ama noqanchej sajra imasta munapayananchejpaj paykuna jina. 7Chayrayku qankunaqa ama lantikunata yupaychaychejchu, imaynatachus paykunamanta wakin yupaycharqanku jinataqa. Escribisqapi nishan: Chay runasqa tiyaykukorqanku mikhunankupaj, ujyanankupaj. Chaymantataj sayarerqanku pujllanankupaj. 8Ama noqanchejqa, paykunamanta wakinkuna jinachu qhenchachakusunchej. Paykunaqa chay uj p'unchayllapi wañurarqanku iskay chunka kinsayoj waranqa. 9Amataj Señorta phiñachinachu, imaynatachus paykunamanta wakinkuna phiñacherqanku ajinata. Chayrayku wañorqanku katarispa wach'isqawan. 10Amataj thutuychejchu Diospa contranta, imaynatachus paykunamanta wakinkuna thutorqanku jinataqa. Señorpa angelnintaj paykunata wañuracherqa.

11Kay tukuy imas qhatirerqa ñaupa tatasninchejta, escribisqapitaj churasqa kashan noqanchej yachananchejpaj, kay qhepa p'unchaykuna kausajkuna. 12Ajinaqa, pichus sinch'i sayasqanta yuyakojqa, allinta qhawakuchun ama urmanampaj. 13Qankunaqa kallpaykichejman jinalla tentaciontaqa aguantankichej. Diosqa cheqamin, manataj saqesonqachejchu tentasqa kanaykichejta, mana atipay atina tentacionwanqa. Astawanqa tentación jamojtin, Diosllataj yanapasonqachej imaynatachus chay tentacionmanta llojsinaykichejta, ajinapi atipayta atinaykichejpaj.

14Chayrayku munakusqasníy, ayqekuychej lantikunata yupaychanamanta. 15Parlaykichej yuyayniyoj runasman jina. Qankuna kikiykichej kay nisqayta unanchaychej. 16Bendición copata bendicisqanchejqa, manachu ujlla kasqanchejta niyta munan Cristoj yawarnimpi? T'anta p'akisqanchejtaj, manachu niyta munan ujlla kasqanchejta Cristoj cuerpompi? 17Ujlla t'anta kajtin, noqanchejtaj ashkhas kaspa uj cuerpolla kanchej, imaraykuchus tukuyninchej uj t'antallamanta mikhunchej.

18Qhawariychej Israel aylluta aychaman jina kausasqanta: Uywa wañuchisqasmanta mikhojkunaqa, manachu altarmanta jap'ishanku? 19Imatataj niniri? Lanteqa ima kasqantachu nini, chayrí lantikunaman chay aycha jaywasqastachu ima kasqanta nini? 20Noqa nini, gentilesqa uywa wañuchisqasta supaykunaman jaywanku, manataj Diosmanchu. Noqaqa mana munanichu supaykunawan kanaykichejta. 21Mana atiwajchejchu Señorpa copanmanta ujyayta, supaypa copanmantapis. Manataj atiwajchejchu Señorpa mesanmanta mikhuyta, supaykunaj mesanmantapis.

22Chayri munanchejchu Señorta phiñachiyta? Chayrí astawan atiyniyojchu kanchej paymanta?

Cristota qhatikojkunaj munakuynin

23Tukuy ima allin noqapajqa, manataj tukuyninchu walej. Tukuy ima allin, manataj tukuyninchu Espirituman jina wiñachin. 24Ama pipis mask'achunchu paypaj allinnillanta, astawanqa wajpaj allinnintapis mask'achun.

25Aycha qhatupi tukuy ima qhatukojmanta mikhuychej, concienciarayku ama ni imata tapuspa. 26Jallp'aqa Señorpata, jinallataj tukuy ima jallp'a patapi kajpis.

27Pipis Señorpi mana creej wajyasunkichejman mikhunaykichejpaj, qankunataj riyta munankichej chayqa, mikhuychej tukuy ima qosqanta ama imata tapuspa concienciarayku. 28Sichus pipis chaypi willasunkichejman: Kay aychaqa lantikunaman jaywasqa karqa nispa chayqa, ama mikhuychejchu chay willasqanrayku, chantá concienciaraykutaj; [imaraykuchus Señorpata jallp'aqa, tukuy ima junt'a kasqanwan]. 29Parlashani wajpa conciencianmanta, mana qampamantachu.

Chaywampis, imaraykutaj libre kasqay juzgasqa kanman wajpa conciencianraykuri? 30Diosman graciasta qospachus mikhorqani chayqa, imaraykutaj sajrapaj qhawawanku graciasta qosqaymantari? 31Kunanqa mikhuspapis, ujyaspapis, imata ruwaspapis tukuy imata ruwaychej Diospa kusikuynimpaj. 32Ama misk'achiychejchu judiosta, nitaj gentilesta, nillataj Diospa iglesiantapis. 33Noqapis allin rijch'ayta munani tukuy imapi. Manataj noqaj allinnillaytachu mask'ashani, astawanqa wajkunaj allinnintapis mask'ashallanitaj, salvasqas kanankupaj.

Currently Selected:

1 CORINTIOS 10: QCHSB

Highlight

Copy

Compare