1 CORINTIOS 7

Allin willaykuna casaranamanta

1Kunantaj cartapi tapumuwasqaykichejman kutichimuykichej. Allin kanman qharipajqa mana warmiyoj kanan. 2Ama qhenchachakuy kanampajrí, sapa ujqa warmiyoj kachun; jinallataj sapa uj warmipis qosayoj kachun. 3Qosaqa imachus qonanta warminman junt'achun, jinallataj warmipis junt'achun qosanman imatachus qonanta. 4Warmeqa mana atiyniyojchu kikin cuerponmanta, manachayqa qosan; nillataj qosapis atiyniyojchu cuerponmanta, manachayqa warmin. 5Chayrayku ama qankunaqa mana nispa ninakuychejchu. Astawanqa pisi tiempollapaj saqeychej, qhari warmi parlarikuspa, Diosmanta mañakunaykichejpaj. Chaymanta watejmanta tantakapullaychejtaj, ama Supay urmachinasuykichejpaj, mana kakuyta atisqaykichejrayku.

6Kayta nispaqa noqalla yuyaychaykichej, manataj kamachiykichejchu. 7Munayman tukuy runas noqa jina kanankuta. Chaywampis, Dios sapa ujman qopun imaynachus kananta, cheqamanta ujpataqa uj jinamanta, ujpatataj waj jinamanta.

8Solterosman, viudasman ima nini. Allin kanman noqa jina mana casaraspa qhepakunanku. 9Mana kakuyta atinkuchu chayqa, casarachunku. Aswan walejmin casarakoyqa ruphanamanta nisqaqa.

10Casarasqas kajkunamantaj kamachini, mana noqachu, manachayqa Señormin: Warmeqa qosanmanta ama t'aqakuchunchu. 11T'aqakun chayri, kakuchun amaña casaraspa, manachayrí qosanwan allinyakuchun; qosantaj ama warminta wijch'uchunchu.

12Wajkunamantaj noqa nini, mana Señorchu. Mayqen hermanoj warminchus mana creej kanman, munanmantaj qosanwan tiyakuyta chayqa, ama saqerparichunchu warmintaqa. 13Jinallataj uj warmej qosan mana creej kanman, paytaj warminwan tiyakuyta munanman chayqa, ama wijch'uchunchu qosantaqa. 14Qosaqa, mana creejqa, warminnejta llimphuchasqa. Ajinallataj mana creej warmipis, qosannejta llimphuchasqa. Mana jina kanman chayqa, wawasninkupis mana allin qhawasqachu kankuman. Kunanqa wawasninkupis llimphuchasqas kanku. 15Uj qosa, chayrí mana creej warmipis, t'aqakuyta munan chayqa, t'aqakuchun. Mana chayraykuchu hermano, chayri hermanapis ñak'ariyta atinchu. Dios wajyawarqanchej tukuy sonqo kausakunapaj. 16Imata qan yachanki warmi, qosaykita salvayta atinaykimanta? Qampis qosa, imata yachanki, warmiykita salvayta atinaykimanta?

17Imaynatachus sapa ujman Señor qosqanman jina, sapa ujtataj Dios imaynatachus wajyarqa, ajinata ruwachun. Kayta kamachini tukuy iglesiasman. 18Mayqempis circuncidasqa kashaspachu wajyasqa karqa? Qhepakuchun circuncidasqa. Mayqellampis mana circuncidasqachu wajyasqa karqa? Ama circuncidakuchunchu. 19Chayrayku circuncidasqa kayqa, mana imachu; mana circuncidasqa kaypis nillataj imachu, astawanqa Diospa kamachisqasninta junt'ana tiyan. 20Sapa uj imayna kausaypichus wajyasqa karqa, chaypi qhepakuchun. 21Kamachi kashaspachu wajyasqa karqanki? Chaymantaqa ama llakikuychu; atiwaj kacharisqa kayta chayqa, kallpakuy kacharisqa kanaykikama. 22Pichus kamachi kashaspa Señorpi creenampaj wajyasqa chayqa, kunanqa kacharisqaña Señorpaj. Jinallataj pichus kacharisqa kashaspa wajyasqa karqa chayqa, kunanqa Cristoj kamachinña. 23Ashkha preciowan rantisqas kankichej. Amaña runaspa kamachisnin churakuychejchu. 24Chayrayku, hermanos, imayna kausaypichus sapa uj wajyasqa karqa chayqa, ajinallatapuni Diospa ñaupaqempi kakuchun.

25Mana casarasqaspajqa mana imatapis Señor kamachiwarqachu; astawanqa noqaman rijch'awasqanta nini, imaynatachus noqapis Señorpa khuyakuyninta tariparqani, kamachiyninta junt'anaypaj. 26Kaytaj noqamanqa allin rijch'awan, runa imayna kausaypichus kashan, chaypachampi qhepakuchun. Kay p'unchaykunapeqa yupa misk'anas tiyan. 27Casadochu kanki? Ama warmiykimanta t'aqakuychu. Manachu casado kanki? Ama munaychu casarakuyta. 28Casarakunki chaypis, mana juchachu. Doncellapis mana casarakuspaqa manallataj juchallinchu. Chaywampis, paykunaqa llakiyniyoj kanqanku aychaman jina. Noqaqa mana munaymanchu chay llakiykuna kananta.

29Hermanos, kayta niyta munaykichej: Pisi tiempollaña kashan. Kunanmanta ñaupajmanqa, casadosqa manapis warmiyojchu kankuman jina kausakuchunku.

30-31Waqajkunapis manapis waqankumanchu jina; kusikojkunapis, manapis kusikunkumanchu jina rantikojkunapis, mana kapuyniyojpis kankuman jina. Kay pachaj imasninwan kusisqa kajpis, manapis kusisqachu kanman jina; imaraykuchus kay mundoj rijch'aynenqa tukukapushanña.

32Munayman ari mana llakiyniyoj kanaykichejta. Solteroqa Señorpa imasninmanta anchata yuyan, Señorman allinta rijch'anampaj. 33Qosataj kay mundoj imasninta mask'an, warminman allinta rijch'anampaj. 34Ajinamanta iskay imaspi yuyashan. Jinallataj mana qosayoj warmi, doncellapis Señorpa imasninta mask'anku llimphu kanankupaj, cuerpopi, almapiwan. Qosayojrí kay mundoj imasninta mask'an, qosanman allinta rijch'anampaj.

35Kayta niykichej qankuna allin kanaykichejpaj, mana misk'anata churanaypajchu; astawanqa allin kajta ruwanaykichejpaj, cheqan kajtawan, mana ima jark'anayoj Señorman qayllaykunaykichejpaj.

36Sichus pipis casarachiyta munanman ususinta, casaranan tiempo pasasqantaña yuyaspa chayqa, munasqanta ruwachun. Chaypeqa mana juchallikunchu. Munaspaqa kasarakapuchun. 37Pitajchus tukuy sonqo ninman ususin mana casarakunanta chayqa, allinta ruwan; sichus munayninmanta, sonqompi yuyanña doncella ususinta ajinata waqaychananta, chayqa allinta ruwan. 38Chayrayku, pitajchus ususinta casarachin chayqa, allinta ruwan. Chantá, pitajchus mana casarachinmanchu chayri, astawan allinta ruwan.

39Casada warmeqa khuska kanan tiyan qosanwan leynejta, qosan kausanankama. Qosan wañupojtinrí, atinman casarakuyta piwanchus munasqanwan. Kayrí creejllataj kanan tiyan. 40Noqaj yuyayniymantaqa, aswan kusiy kanman mana casaraspa qhepakunan; Diospa Espíritun noqapi kasqanta yuyani.

Currently Selected:

1 CORINTIOS 7: QCHSB

Highlight

Copy

Compare