1 CORINTIOS 6

Quejanaku mana creejkunaj ñaupaqempi

1Qankunamanta mayqellampis wajpa contrampi quejakoj kanman chayqa; imaynatataj rinman mana creejpa ñaupaqenman quejakoj, manataj Diospa ajllasqasninmanchu? 2Chayrí, manachu yachankichej kay mundota Diospa ajllasqasnin juzgananta? Qankunanejtachus kay mundo juzgasqa kanqa chayqa, manachu atiwajchej juch'uy imasta juzgaytaqa? 3Chayrí, manachu yachankichej angelesta juzganaykichejta? Jina chayqa, ima astawanchus mana juzgasunchej kay kausaypa imasnintaqa! 4Arí, qankuna ukhupi tiyan quejanakus kay kausaypa imasninmanta. Chayta juzganampajqa iglesiapi mana kajkunatachu churankichej? 5Kayta nini qankunata p'enqachinaypaj. Manachu qankuna ukhupi tiyan ni ujllapis yachayniyoj, hermanosta juzganampaj? 6Atikunchu hermanopura quejanakunanku, mana creejkunaj ñaupaqenkupi?

7Ajina chayqa qankunapura quejanakuspa juchallinkichejña. Imaraykutaj qankunapura mana aguantanakunkichejchu phiñanakuyta saqespa? Imaraykutaj mana saqenkichejchu suwasunaykichejta? 8Astawan qankuna juchallinkichej, mana cheqan kajta ruwaspa, hermanosllamantataj suwaspa.

9-10Manachu yachankichej mana cheqa kajta ruwajkuna, Diospa reinonta chayaqepaj mana jap'inankuta? Ama pantaychejchu, millayta purejkuna, lantista yupaychajkuna, qhenchachakojkuna, qhari kashaspa warmiman rijch'akojkuna, qharipura kakojkuna, ajinallataj suwaspis, mich'aspis, machajkunapis, maldicejkunapis, nitaj ch'aukiyajkunapis Diospa reinontaqa chayaqepaj jap'enqankuchu. 11Ajina karqankichej qankunamanta wakin; kunanrí mayllasqasña kankichej, juchamanta llimphuchasqasña, allinyasqastaj Señor Jesuspa sutinrayku, Diosninchejpa Espiritunnejta ima.

Cuerpoqa Diosta yupaychanapaj

12Tukuy imas noqapajqa atikun, manataj chayraykuchu tukuynenqa walej. Tukuy imas noqapajqa atikun, manataj ni mayqenwan atipachikusajchu. 13Cheqamanta mikhunasqa wijsapaj, wijsataj mikhunaspaj. Chaywampis, iskayninta Dios chinkachenqa. Cuerpoqa mana qhenchachakunampajchu. Cuerpoqa Señorpata, Señortaj cuerpojta. 14Imaynatachus Diosqa Señorta kausaricherqa, ajinallatataj noqanchejtapis kausarichiwasun atiyninwan.

15Manachu yachankichej qankunaj cuerpoykichejqa Cristoj cuerponmanta kasqanta? Chaykunata Cristoj cuerponmanta qhechuspachu qhencha warmej cuerponman chajruyman? Manapuni. 16Chayrí, manachu yachankichej pichus qhencha warmiwan tantakojqa, paywan uj cuerpolla kasqanta? Escribisqa nishan: Iskayninku uj aychalla kanqanku, nispa. 17Ajinata pichus Señorwan ujchakojqa, paywan uj espiritullapi kashan.

18Ayqeychej qhenchachakuymanta. Pillapis waj ima juchata ruwanman chayqa, cuerponmanta jawapi kashan. Pichus qhenchachakojqa cuerpompa contrampi juchallikun. 19Manachu yachankichej cuerpoykichejqa Santo Espíritoj templon kasqanta? Payqa qankunapi kashan. Payta Dios qosunkichej, manataj qankunajtachu kankichej. 20Diosqa preciowan rantisorqachej. Diosta yupaychaychej cuerpoykichejwan, espirituykichejwan ima; chaykunaqa Diospata kanku.

Currently Selected:

1 CORINTIOS 6: QCHSB

Highlight

Copy

Compare