1 CORINTIOS 5

Qhenchachakoj runa juzgasqa

1Cheqamanta qankuna ukhupi qhenchachakuy kasqan uyarikun. Chay jina qhenchachakoyqa gentilespurapipis mana kanchu. Uj runa qankuna ukhupi tatampa warminwan kashan. 2Qankunarí wapus kashankichej! Manachu astawanqa llakikunaykichej karqa, chay jinata ruwasqanmanta, chay jina juchallikoj runata qankuna ukhumanta qharqosqa kanampaj? 3Cheqamanta, noqa qankunamanta karupi kashaspapis yuyayniypi qankunawan kashani. Ñapis juchachaniña chay runata chaypipis kashayman jina. 4Señorninchej Jesucristoj sutimpi tantakuspa, noqaj yuyayniywan ima, Señorninchej Jesucristoj atiyninwan. 5Chay runata supayman jaywaychej, aychan chinkachisqa kanampaj; almantaj salvasqa kanampaj Señor Jesuspa p'unchaynimpi.

6Mana allinchu wapuykachanaykichejqa. Manachu yachankichej pisi levaduralla tukuy masata poqochisqanta? 7Llimphuchakuychej ari chay mauk'a levaduramanta, mosoj masa kanaykichejpaj; qankunaqa mana levadurayoj t'anta jina kankichej. Cristomin Pascuanchejqa. Pay ñak'arerqa noqanchejrayku. 8Chayrayku, kunanqa ruwaychej Pascuataqa sumaj sonqowan, cheqa kajwan. Chaykunamá mana levadurayoj t'anta jina kanku; astawanqa ruwana tukuy sonqowan, cheqan yuyaywantaj.

9Cartapi escribimorqaykichejña qhencha runaswan ama tantakunaykichejta. 10Manataj chaykamapunichu nerqaykichej ithirikunaykichejta, kay pachapi qhenchasmanta, mich'asmanta, suwasmanta, lanti yupaychajkunamanta ima. Jina kanman chayqa, llojsipunaykichejchá kanman kay mundomanta. 11Chay cartapeqa nimorqaykichej ama tantakunaykichejta ni mayqenwan, hermano sutiyoj kashaspa qhenchachakojwan, mich'akojwan, chayri lanti yupaychajwan, runa masimpaj sajrata rimajwan, chayri machaykojwan, suwakojwan; chay jina runawanqa ama mikhullaychejpischu. 12Ima allintaj kanman noqapaj, jawapi kajkunata juzganaypaj? Manachu qankuna juzgankichej iglesia ukhupi kajkunata? 13Jawapi kajkunataqa Dioslla juzganqa. Chay juchallikojtataj qankuna ukhumanta qharqoychej.

Currently Selected:

1 CORINTIOS 5: QCHSB

Highlight

Copy

Compare