1 CORINTIOS 4

Apostolespa ruwayninku

1Ajina ari, Cristoj kamachisninta jina runas qhawawachuyku; imaraykuchus mayordomos kayku, Diospa pakasqa imasninta sut'inchanaykupaj. 2Kunanqa sapa uj mayordomo junt'achun ruwananta. 3Noqaqa pisipaj yuyani, qankuna juzganawaykichejmanta, nitaj runakunaj juntanmantapis; nillataj noqa kikiytapis juzgakunichu. 4Sonqoyqa mana imamantapis juchachawanchu. Chaywampis, mana cheqan runa kani nisajchu; Señorlla noqataqa juzgawanqa. 5Chaywampis, amaraj imatapis juzgaychejchu, Señor jamunankama. Paytaj sut'inchanqa laqhapi pakasqa kajta, rikuchenqataj imatachus sonqosninkupi yuyasqankuta; chaypachataj sapa ujta Dios alabanqa.

6Hermanos, qankunata munakusqayrayku kay imasta willaykichej, noqamantawan Apolosmantawan yachakunaykichejpaj. Escribisqamanta astawanqa ama yuyaychejchu; pajtataj uj runarayku qankunapura qhesachanakuspa may wapus kawajchej. 7Pitaj qanta allimpi rikuchisunki, wajkunamanta astawan? Chayrí imataj tiyapusunki mana Diospa qosusqan? Pay qosunki chayri, imaraykutaj wapuykachanki manapis Diosmanta jap'iwajchu karqa jina?

8Qankunaqa sajsasqaña kankichej, qhapajñataj kankichej, reyes jina mana noqallaykuwan kamachishankichej. Jina kanman chayqa, walej kanman cheqamanta kamachinaykichej, noqaykupis qankunawan khuska chay reinopi kanaykupaj! 9Noqaj yuyayniymantaqa, apostolesta Dios ch'ulipi churawarqayku. Wañunapaj jina churasqa kayku. Chayrayku mundoj qhawanan kayku, apostolespata, runaspata ima. 10Noqaykoqa Cristoj munakuyninrayku mana yuyayniyoj jina kayku; qankunataj may yachayniyoj Cristopi kankichej. Noqayku pisi kallpas kayku, qankunataj sinch'is kankichej. Runaspajpis may allimpaj qhawasqas kankichej, noqaykutaj qhesachasqas. 11Kunan p'unchaykama sufriyku yarqhayta, ch'akiyta, thanta p'achayojtaj kayku; maqasqas, manataj wasiykupis uj cheqapi kanchu. 12Kikin makisniykuwan llank'aspa mayta sayk'uyku; runakunataj maldiciwayku, noqaykutaj allin palabraswan kutichiyku. Qhatiykachasqas kaspapis ñak'ariyku k'umuykukuspa. 13Runakunaqa noqaykuta mana kajmanta tumpawayku; paykunapajtaj Diosmanta mañapuyku; kunankamataj kay mundoj q'opanta jina qhawawayku, runakunaj wijch'usqanta jina.

14Kayta escribimuykichej mana qankunata p'enqachinaypajchu, astawanqa k'amimuykichej munasqa wawasniyta jina. 15Chayrayku, chunka waranqa yachachejkunasniyojpis kawajchej Cristopi chayqa; mana ashkha tatasniyojchu kankichej; imaraykuchus noqa Cristo Jesuspi evangelionejta yumarqaykichej. 16Chayrayku, mañakuykichej noqa jina kanaykichejta.

17Chaypajtaj kachamorqaykichej munasqa waway Timoteota, sinch'ita Señorpi sayasajta. Payqa yuyarichisonqachej imaynachus Cristopi kausayniy kasqanta, imaynatachus tukuynejpi yachachisqayta, tukuy iglesiaspi ima. 18Qankunamanta wakin mayta wapuykachashanku, yuyaspa noqa manaña mayk'aj watukoj jamunayta. 19Señor munanqa chayqa, usqhayta watukoj jamusqaykichej. Chaypitaj rejsisaj chay wapusta; mana palabrasninkutachu, astawanqa atiyninkuta, wapuykachaspa purejkunata. 20Diospa reinonqa mana palabraspichu kashan, astawanqa atiypi. 21Imatataj munankichej? Chicotewanchu jasut'inaypaj, chayri munakuywanchu, llamp'u sonqowanchu jamunayta munankichej?

Currently Selected:

1 CORINTIOS 4: QCHSB

Highlight

Copy

Compare