1 CORINTIOS 3

Dioswan llank'ajkuna

1Noqataj, hermanos, mana aterqanichu qankunaman parlapayayta Espiritupi kajkunaman jina, astawanqa aychamanta kajkunaman jina parlarqaykichej, Cristopi wawasman jina. 2-3Ñuñoj wawaman jina lecheta qorqaykichej, mana khamuna mikhuytachu; imaraykuchus chaytaqa manaraj aterqankichejchu mikhuyta; kunampis manarajpuni atinkichejchu; imaraykuchus aychaman jinallaraj kausashankichej, qankuna ukhupi tiyan qhawanakuykuna, churanakuykuna, t'aqanakuykuna ima. Manachu aychaman jina kausashankichej? Manachu mana creej runas jina purishankichej? 4Qankuna ukhupi ninakunkichej: Noqa cheqamanta Pablojta kani; ujtajrí, noqa Apolospata kani, nispa. Manachu chayta nispaqa aychamanta kaj runas jina kausashankichej?

5Kunanqa, pitaj Pablori? Pitaj Apolosri? Noqayku Diospa kamachisnin kayku, qankunataj noqaykunejta creerqankichej; chaytataj sapa ujniykuman Señor atiyta qowasqaykuman jina. 6Noqa plantarqani, Apolostaj qarparqa, Diostaj wiñacherqa. 7Chayrayku plantajqa, qarpajpis, mana imachu kanku. Chaytaqa Dioslla wiñachin. 8Plantajwan qarpajwanqa ujlla kanku. Chaywampis, sapa ujninku t'inkankuta jap'ikaponqanku llank'asqankuman jina. 9Paykunapis noqaykupis Diospaj llank'ayku, qankunataj Diospa chajran kankichej, chayri Diospa ruwasqan wasi jina kankichej. 10Dios atiyta qowasqanman jina, yachayniyoj albañil jina, cimientota churarqani, wajtaj patampi wasichan. Chaywampis, sapa uj allinta qhawachun imaynatachus patampi wasichasqanta. 11Manataj pipis waj cimientota churayta atinchu churasqamantaqa; chay cimientoqa Jesucristo. 12-13Kay cimiento patapi pipis wasichanman qoriwan, qolqewan, k'acha rumiswan, chayrí k'aspiswan, ichhuswan, ch'aki laqheswan ima chayqa; sapa ujpa ruwasqan sut'inchakonqa; imaraykuchus chay juicio p'unchayqa jamonqa ninawan, ninataj rikuchenqa sapa ujpa ruwasqanta. 14Mayqempatachus, chay cimiento patapi wasi ruwasqan mana ruphanqachu chayqa, chayman jina t'inkanta jap'ikaponqa. 15Pejpatachus ruwasqan ruphaykonqa chayqa, mana jap'enqachu chinkachisqanmanta. Chaywampis, payqa salvasqa kanqa, ninamanta jina ayqekuspa.

16Manachu yachankichej Diospa templon kasqaykichejta, Diospa Espirituntaj qankunapi kashasqanta? 17Sichus pipis Diospa templonta urmachinman chayqa, Diospis chay runata urmachillanqataj, imaraykuchus Diospa templonqa llimphu, chay templotaj qankuna kankichej.

18Amataj qan kikiykita ch'aukiyakuychu; pillapis kay pachapi qankuna ukhupi yuyanman yachayniyoj kasqanta chayqa, mana yachayniyojman tukuchun, cheqamanta yachayniyoj kanampaj. 19Kay pacha yachayqa qhasi mana kaj Diospajqa. Escribisqapipis nishan: Dios urmachin yachayniyojkunata, llulla yachaynillankupitaj. 20Ujtawan nillantaj: Señorqa rejsin yachayniyojkunaj yuyayninkuta qhasi mana kaj kasqankuta. 21-22Chayrayku ama pipis runamantaqa may yuyayniyoj kasqanta yuyakuchunchu, imaraykuchus tukuy ima qankunajta: Pablo kachun, Apolos kachun, Cefas kachun, kay mundo kachun, kausay kachun, wañuy kachun, kunan p'unchaypis kachun, jamoj p'unchaypis kachun, tukuy chaykunaqa qankunajta. 23Qankunataj Cristojta kankichej, Cristotaj Diospata.

Currently Selected:

1 CORINTIOS 3: QCHSB

Highlight

Copy

Compare