1 CORINTIOS 2

Pablo, chakatasqa Cristomanta willan

1Hermanos, qankunaman jamuspaqa, mana jatuchaj yachaysapa palabraswanchu willarqani Diospa pakasqa yachayninmantaqa. 2Mana imatapis yachayta munarqanichu, qankunawan kashaspaqa; astawanqa Jesucristo chakatasqa kasqallanmanta. 3-5Qankuna ukhupeqa, pisi kallpayoj karqani, anchata manchachikuspa, kharkatitispataj; palabrasniypis, willasqaypis, mana runakunaj yachayninman jinachu karqa; astawampis Espíritoj rikuchiyninwan, atiyninwantaj karqa, amataj feniykichej runakunaj yachaynimpi kanampaj, astawanqa Diospa atiynimpi.

Dios rejsichikun Espiritunnejta

6Chaywampis parlayku yachaykunamanta yachajpura, mana kay mundoj yachayninmantachu, nitaj kamachejkunaj yachayninmantachu; imaraykuchus chay yachaykunaqa chinkananku tiyan. 7Astawanqa parlayku Diospa pakasqa yachayninmanta; chaytaj pakasqa karqa manaraj kay mundota ruwashajtin, wiñaymantapacha, janaj pachaman pusasqas kananchejpaj. 8Manataj pipis kamachejkunamanta kay pachapi rejserqachu kay imastaqa; rejsinkumanchus karqa chayqa, mana jayk'ajpis chakatankumanchu karqa janaj pacha k'anchayniyoj Señorta. 9Imaynachus escribisqapi kasqanman jina: Imatachus ñawi mana rikorqachu, nitaj ningri uyarerqachu, nillataj sonqonkupi yuyarqankuchu, chaykunatataj Dios wakicherqa payta munakojkunapaj. 10Chay imastaqa Dios rejsichiwanchej Espiritunnejta; imaraykuchus Espiritoqa allinta rejsin tukuy imata, Diospa may ukhu yachaynintapis.

11Runakunamanta, pitaj yachanman runaj sonqompi imachus kasqanta? Manachu espiritullan yachan paypa ukhumpi kashan chay? Kikillantataj Diospa Espiritullan yachan, imachus Diospi kasqanta. 12Noqanchejtaj mana kay mundoj espirituntachu jap'erqanchej. Diosmanta jamoj Espirituta jap'erqanchej, yachananchejpaj imatachus Dios khuyakuywan qowasqanchejta. 13Kay imasmantataj noqanchej parlanchej; mana runaj yachachisqanman jinachu, astawanqa Espíritu yachachiwasqanchejman jina, yachachispataj Espirituman jina, Espiritupi kajkunata.

14Pichus mana Espiritupi kajqa, mana imatapis rejsinchu Diospa Espiritunmanta, imaraykuchus paypaj qhasi mana kaj yachachiy, manataj yuyaychakuyta atinchu; imaraykuchus kay imasqa Espirituman jina rejsisqa kanqa. 15Pichus Espirituman jina kajqa, atin juzgayta tukuy imata; manataj paytaqa pipis juzgayta atinmanchu. 16Pitaj Señorpa yuyayninta rejserqa? Pitaj Diosmanta yachachiyta atinmanri? Astawanqa Cristoj yuyaynin noqanchejpi kashan.

Currently Selected:

1 CORINTIOS 2: QCHSB

Highlight

Copy

Compare