1 CORINTIOS 15
15
Cristoj kausarimuynin
1Kunanqa, hermanos, yuyarichiykichej evangeliomanta willasqayta. Chaytataj qankunapis jap'erqankichej, chaypitaj qankuna sinch'ita sayashankichej. 2Chayrayku qankunachus chay willasqay palabrasta jap'ikunkichej chayqa, salvasqas kankichej. Mana jina chayqa, qhasillapaj creesqaykichejqa kanqa.
3Ñaupajta yachacherqaykichej imaynatachus noqapis jap'isqayta; Cristo juchanchejrayku wañusqanta, Escriturasman jina. 4P'ampasqa karqa, kausarimorqataj kinsa diamanta Escriturasman jina. 5Rikhurerqataj Pedroman, chaymanta chunka iskayniyoj apostolesninman. 6Chay qhepata hermanosman rikhurillarqataj phishqa pachaj kurajman tantasqa kashajtinku. Chaykunamanta ashkhasraj kausashanku, wakintaj wañurankuña. 7Chaymanta rikhurerqa Santiagoman; chay qhepatataj tukuynin apostolesman.
8Tukuypa qhepantataj, noqamampis rikhuriwarqa sullusqa wawaman jina. 9Noqaqa aswan juch'uy kani apostolesmanta, manataj apóstol sutiyoj kanaypaj jinachu kani, Diospa iglesianta qhatiykachasqayrayku. 10Chaywampis, Diospa khuyakuyninrayku imachus kani chay kani. Khuyakuynintaj noqapajqa mana qhasipajchu karqa. Chantá tukuyninkumanta astawan llank'arqani; mana noqallachu, astawanqa Diospa khuyakuynin noqapi kasqanrayku. 11Chayrayku noqapis kasaj, paykunapis kachunku. Ajinata evangeliota willararqayku, ajinallatataj qankunapis chayta uyarispa creerqankichej.
Wañusqas kausarimonqanku
12Wañusqakunamanta Cristo kausarimusqanta willakun chayqa, imaynatataj qankuna ukhumanta wakin ninku wañusqamanta kausarimoyqa mana kanchu, nispa? 13Sichus wañuymanta kausarimuy mana kanchu chayqa, nillataj ari Cristopis kausarimorqachu. 14Cristochus mana kausarimorqa chayqa, qhasi mana kaj willasqaykoqa, qhasi mana kajllataj qankunaj creesqaykichejpis. 15Cheqamantachus wañusqaspis mana kausarimunkuchu chayqa, Diosmanta llulla testigos rikhuriyku; imaraykuchus jinapeqa Diospa contranta willarqayku, pay Cristota kausarichimusqanta, pitachus mana kausarichimorqachu. 16Sichus wañusqas mana kausarimunkuchu chayqa, Cristopis manallataj kausarimorqachu. 17Cristochus mana kausarimorqa chayqa, qhasi mana kajllataj feniykichejpis. Chaywampis, juchaykichejpiraj kashankichej. 18Jina chayqa, Cristopi creespa wañojkunapis chinkasqas kanku. 19Kunan kausayllapichus Cristopi suyashanchej chayqa, tukuy runasmanta aswan khuyay wajchas jina qhawasqas kanchej.
20Kunanqa yachanchej Cristo kausarimusqanta wañusqakunamanta ñaupaj poqoy jina. 21Imaynatachus wañuy jamorqa uj runanejta, ajinallatataj wañusqakunamanta kausarimuypis jamorqa uj runanejta. 22Imaynatachus Adannejta tukuy wañorqanku, ajinallatataj Cristonejta tukuy kausarimonqanku. 23Chayrayku sapa uj maychus kanampi, qhepampi qhepampi kausarenqa, ñaupajta Cristoraj ñaupaj poqoy jina; chaymantaña Cristojta kajkunaqa kausarenqanku jamuynimpi. 24Chaypaj qhepanta tukukuy jamonqa, maypachachus Cristo tukuy kamachiyta, tukuy atiyta, tukuy kallpata ima qhechojtin, chaypacha reinota Dios Tataman jaywaponqa. 25Cristoqa Reypuni kanan tiyan, tukuynin enemigosninta chakisnin uraman churanankama. 26Qhepa kaj enemigotaj phirisqa kanqa. Chaytaj wañuy. 27Diosqa, Cristoj chakisnin uraman tukuy imata churarqa; imaynatachus nerqa paypa chakisnin uraman tukuy imata churasqanta. Chakisnin uraman churajtaj Dios. Paytaj mana chakisnin urapichu. 28Chaymanta tukuy imas payta kasonqanku chayqa, kikin Churimpis Tatanka kasonqa, pichus payta tukuy imawan kasucherqa; ajinamanta Dios tukuy ima kanampaj, tukuypitaj.
29Mana jina kanman chayqa, imata ruwanqanku wañusqasrayku bautizakojkunari, wañusqas mana imaynamanta kausarimojtinkuri? Imaraykutaj wañusqas mana imaynamanta kausarimojtinkuri? Imaraykutaj wañusqasrayku bautizakunkuri? 30Chantá, imaraykutaj noqayku sapa kuti wañuy qayllapi kashayku? 31Niykichej hermanos, sapa p'unchay wañuy patapi kasqayta, Señorninchej Jesucristopi qankunamanta kusikusqayrayku. 32Runa jina tinkorqani phiña animaleswan Efesopi. Imata tarini chaywan? Cheqamanta wañusqaschus mana kausarimunku chayqa, mikhuna ari, ujyanataj, imaraykuchus q'aya wañupusunchej.
33Ama ch'aukiyachikuychejchu. Sajra parlajkunawan puriy allin yachasqa ruwaykunata chinkachin. 34Qankuna rijch'ariychej sumaj cheqan kausayman, amataj juchalliychejchu; imaraykuchus wakin qankunamanta Diosta mana rejsinkuchu. Kayta nini qankuna p'enqakunaykichejpaj.
Imaynata wañusqas kausarimonqanku?
35Chantá pipis tapukunman nispa: Imaynatataj wañusqas kausarimonqanku? Ima cuerpowantaj sayarimonqanku? 36Wampu, qhawariy, muju tarpusqaykeqa mana kikin mujuchu p'utumonqa, ñaupajtaqa wañonqaraj. 37Mujuta tarpuspaqa mana kikin plantatapachachu tarpunki, manachayqa mujuta; trigo kachun, chayrí waj mujupis kachun. 38Chaymantaj Dios qon imayna rijch'ayniyojchus kananta, munayninman jina. Sapa mujutataj imaynachus kasqanman tukuchin. 39Tukuy aychaqa mana uj rejllachu. Runaspa aychanqa waj laya. Uywaspa aychampis waj laya. Challwaspatapis waj laya, p'isqospatapis waj laya. 40Tiyallantaj janaj pachapi ashkha imas, jinallataj kay pachapipis imaymana rijch'ayniyoj. 41Intej lliphipiynin uj jina, killaj lliphipiynimpis waj jina, qoyllurkunaj lliphipiynimpis waj jina. Chayrayku uj qoyllorqa waj qoyllurwan mana kikinchu kanku lliphipiypeqa.
42Ajinallataj kanqa wañusqasmanta kausarimoyqa. Imatapis ismunampaj tarpunchej chayqa, mana ismuyniyoj kausarimonqa. 43Qhesachasqa tarpusqaqa, kausarimonqa may allimpi qhawasqa. Pisi kallpayoj tarpusqataj kausarimonqa may atiyniyoj. 44Aycha cuerpotachus tarpunchej chayqa, espirituman jina cuerpoyoj kausarimonqa. Tiyan aycha cuerpo, tiyallantaj espirituman jina cuerpopis.
45Jinallataj escribisqa kashan: Ñaupaj kaj runa Adanqa, kausaj almayoj ruwasqa karqa; qhepa kaj Adantaj kausachej espirituyoj ruwasqa karqa. 46Chaywampis, mana espirituman jina kajrajchu ñaupajta karqa, astawanqa aychaman jina kajraj karqa. Chaymantaraj espirituman jina kajqa karqa. 47Ñaupaj kaj runaqa jallp'amanta ruwasqa karqa, jallp'a runa; qhepan kaj runataj janaj pachamanta. 48Imaynachus jallp'a runa karqa, kikillantaj kashanku jallp'amanta kajkunapis. Imaynachus janaj pachamanta kajqa karqa, kikillantaj kanku janaj pachamanta kajkunapis.
49Imaynatachus rijch'akunchej jallp'amanta ruwasqa runaman, kikillantataj rijch'akusunchej janaj pacha runaman.
50Kayta niykichej, hermanos: Aychawan, yawarwan ima, mana atinkumanchu Diospa reinonta chayaqepaj jap'iyta, nitaj ima ismoj kajpis atinmanchu chayaqepaj jap'iyta mana ismoj kajta. 51-52Kunanqa uj pakasqa yachayta willaykichej: Mana tukuychu wañusunchej, astawanqa tukuy uj jinaman tukusunchej, ujllata, ñawi ch'ipiypi, pututoj qhapariynimpa tukukuynimpi, imaraykuchus pututoqa qhaparinan tiyan, wañusqastaj kausarimonqanku mana ismusqas, noqanchejtaj uj jinaman tukusunchej. 53Kay ismoj cuerpoqa mana ismojwan p'achallikunan tiyan. Kay wañoj cuerpotaj, p'achallikunan tiyan mana mayk'aj wañuywan. 54Maypachachus kay ismoj cuerpo p'achallikunman mana ismojwan, kay wañuytaj p'achallikunman mana jayk'aj wañojwan chayqa, chaypacha junt'akonqa escribisqaman jina: Wañuytaqa Cristoj atipaynin upiykun. 55Ya, wañuy, maypitaj kashan chay atipasqayki? Ya, wañuy, maypitaj kashan chay wach'isqayki? 56Wañuypa wach'inanqa jucha, juchaj atiynintaj ley. 57Kunanqa Diosman gracias qosqa kachun, atipayta qowasqanchejmanta, Señorninchej Jesucristonejta.
58Ajina ari, munasqa hermanosníy, sinch'ita sayaychej ama kuyurispa, wiñaspapuni Señorpa ruwaynimpi, yachaspa Señorpa sutimpi llank'asqaykichejqa, mana qhasipajchu kasqanta.
Currently Selected:
1 CORINTIOS 15: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
