1 CORINTIOS 14

Waj parlaykunapi parlanamanta

1Munakuyta mask'aychej; jinallatataj Espirituman jina yachaykunata jap'iyta munaychej; astawanqa Diospa palabranta sut'inchayta. 2Pichus mana rejsisqa parlaypi parlajqa, mana runamanchu parlan, Diosman parlan, nitaj pipis entiendenchu parlasqanta, Espirituman jina pakasqa yachaykunata parlajtimpis. 3Diospa palabranta sut'inchajqa, runasman parlan cheqanta purinankupaj, k'amispa, sonqochaspataj. 4Pichus mana rejsisqa parlaypi parlan chayqa, paypa allinnillampaj parlakun. Pichus Diospa palabranta sut'inchajrí, Espirituman jina iglesiata wiñachin.

5Noqa munayman tukuyniykichej parlanaykichejta mana rejsisqa parlaykunapi, astawanqa munayman Diospa palabranta sut'inchanaykichejta; sut'inchajqa aswan kuraj waj parlaypi parlajmantaqa. Payllataj chay parlasqanta sut'inchanman chayllapuni iglesiaqa Espirituman jina wiñayta atinman. 6Kunanqa hermanos, sichus noqa qankunaman jamuyman waj parlaypi parlaspa chayqa, manachu parlayman rikuchiywan, chayrí yachaywan, Diospa palabranta sut'inchaywan, chayrí yachachiykunawantaj? Ima allintaj kanman qankunapajri?

7Ajinallataj kashan mana kausayniyoj tocanaswampis, sichus qena, guitarrapis, mana sapa ujnin waj jinata waqanman chayqa, imaynata yachasunman qenachus, chayrí guitarrachus waqasqantari? 8Pututuchus mana allinta waqanman chayqa, pitaj wakichikunman guerraman rinampajri? 9Ajinallataj qankunapis, waj parlaypi parlaspa mana sut'itachu entiendenankupaj jina ninkichej chayqa, imaynatataj yachakunman nisqaykichejri? Ajina chayqa qhasillata parlashankichej. 10Kay pachapeqa may chhika parlaykuna tiyan, manataj ujpis kanchu ni imata ninayajqa. 11Chaywampis, noqachus mana entiendeyman, pichus waj parlaykunapi parlawasqanta chayqa, chay runapaj waj llajtayoj jina kani, paypis noqapaj waj llajtayoj jinallataj. 12Ajinallatataj qankunapis, Espíritoj yachaykunasninta munankichej chayqa, ashkha imasta ruwaychej, iglesiata ñaupajman pusanaykichejpaj.

13Chayrayku mana rejsisqa parlaypi parlajqa, Diosmanta mañakuchun sut'inchayta atinampaj. 14Sichus noqa Diosmanta mañakuyman, mana rejsisqa parlaypi chayqa, espiritullay mañakun, yuyayniytaj mana imata yachaspa qhepakun. 15Imatataj ruwasaj? Espiritupi mañakusaj, jinallatataj yuyayniywampis; takisaj espiritupi, jinallataj yuyayniywampis takisaj. 16Qanchus Diosta espiritullawan yupaychawaj chayqa, mana creejqa, imaynatataj “Amén” ninman, graciasta qoshajtiyki, mana yachaspa imatachus nisqaykita? 17Cheqamanta qanqa allinta graciasta Diosman qonki; chay ujtajrí, mana ñaupajman rinchu. 18Diosman graciasta qoni waj parlaykunapi parlasqaymanta, qankunamanta astawan. 19Chayrayku noqaqa phishqa palabrasllata iglesiapi yuyaywan parlayman, wajkunaman yachachinaypaj; chunka waranqa palabrasta mana rejsisqa parlaykunapi parlanaymantaqa.

20Hermanos, yuyaypeqa ama wawas jina kaychejchu, astawanqa sajra yuyaypaj wawas jina kaychej. Machu runas jina allinta yuyaychej. 21Escriturapi escribisqa kashan: Kay llajtata parlapayasaj waj parlaykunapi, karu llajtayojkunaj siminwan; ni ajinapipis uyarikonqankuchu, nin Señorqa. 22Chayrayku waj parlaykunapi parlayqa, uj señal mana creejkunapaj churasqachu, manachayqa mana creejkunallapaj. Diospa palabranta sut'inchayrí churasqa creejkunapaj, manataj mana creejkunapajchu. 23Sichus iglesia uj cheqallapi tantasqa kashan chayqa, tukuyninkutaj parlarinkuman waj parlaykunapi; chaymantaj yaykumunkuman mana yachajkuna, chayrí mana creejkunapis, manachu nisunkichejman locos kasqaykichejta? 24Tukuyninkutaj sut'inchashankuman Diospa nisqanta, chaymantaj yaykunman Diospi mana creej runa, chayrí mana yachaj; tukuy payta Diosman kutirichenqanku, rikuchenqankutaj juchasapa kasqanta. 25Ajinapi sonqon ukhupi ima jucha kasqantapis yachakonqa, qonqorikuspataj Diosmanta mañakonqa, cheqamantapuni Dios qankuna ukhupi kashasqa, nispa.

Tukuy imata allinta ruwaychej maychus kajta

26Kunanqa, ima nisunmantaj, hermanos? Tantakojtiykichejqa, sapa ujniykichejpata tiyapusuchun salmo, uj yachachiy, Dios imatachus rikuchisqan, waj parlaykunapi parlay, parlaykunata sut'inchay. Chay tukuy ima ruwakuchun iglesia ñaupajman rinampaj. 27Mana rejsisqa parlaypi parlaspaqa, parlachunku iskay, chayrí, kinsa qhepampi qhepampi; ujtaj sut'inchachun chay parlasqankuta. 28Mana pipis parlasqankuta sut'inchaj kajtenqa, iglesiapi ch'inlla kakuchunku. Sapa ujninku sonqonkupi Dioswan parlachunku. 29Ajinallatataj sut'inchajkunapis parlachunku, iskay, chayrí kinsa, wakinkunataj imatachus nisqankuta reparachunku. 30Wajmantajchus chaypi tiyashajman, Dios imata rikuchinman parlanampaj chayqa, ñaupajta parlajqa ch'in kakuchun. 31Tukuyniykichejtaj Diosmanta sut'inchayta atinkichej, parlayta ujmanta ujmanta, tukuy yachanankupaj, tukuytaj sonqochasqa kanankupaj. 32Sut'inchajkunaj espiritunku, waj sut'inchajkunaj nisqankupi kashanku. 33-34Diosqa mana pejtuchej Dioschu, astawanqa sonqo tiyachej Dios.

Imaynachus ajllasqaspa tukuy iglesiasninkupipis, warmisqa ch'in kakuchunku, imaraykuchus paykunaqa mana parlanankuchu; astawanqa kasukoj kananku tiyan, imaynatachus leypi nin. 35Imata yachayta munanku chayqa, wasipi tapukuchunku qosankuta; imaraykuchus mana allin qhawasqachu uj warmi iglesia ukhupi parlananqa.

36Chantá qankunamantachu llojserqa Diospa palabranqa, chayrí, qankunallamanchu chayamorqa? 37Mayqenchus yuyanman Diospa sut'inchajnin kasqanta, chayrí Espirituman jina kasqanta, allinta yachachun, kay escribimusqayqa Señorpa kamachisqasnin kasqanta. 38Pichus Señorpa kamachisqanta mana rejsejtaqa, Diospis mana payta rejsenqachu.

39Ajina hermanos, Diospa nisqanta sut'inchayta mask'aychej, amataj jark'aychejchu waj parlaykunapi parlajkunata. 40Chaywampis, tukuy imata allinta ruwaychej, maychus kajta.

Currently Selected:

1 CORINTIOS 14: QCHSB

Highlight

Copy

Compare