1 CORINTIOS 13

Munakoyqa tukuy imamanta astawan

1Sichus noqa parlayman runakunaj parlaynimpi, angelespa parlaynimpiwan, manataj munakuyniy kapuwanmanchu chayqa, jatun campanaj waqayninman rijch'akuyman; chayrí, juch'uy campanaj waqayninman rijch'akuyman. 2Diospa palabrantachus sut'ichayman, yachaymantaj tukuy pakasqa yachaykunata, tukuy kay pacha imasmantawan; feniytaj kapuwanman orqosta ithirichinaypaj jina, manataj munakuyniy kapuwanmanchu chayqa, mana imachu kani. 3Tukuy kapuyniytachus wajchasman rak'iyman, cuerpoytapis ninaman kanaykuyman, manataj munakuyniy kanmanchu chayqa, mana imapaj valenichu.

4Munakoyqa parienciayoj, k'achataj; munakoyqa mana qhawanakuychu, munakoyqa mana alabakuychu, nitaj tharamallachu. 5-6Mana ruwanchu mana allin kajtaqa, nitaj payllapajchu imatapis mask'an; mana phiñakunchu, manataj ima sajratapis kutichiyta yuyanchu; manataj kusikunchu mana cheqan kajmantaqa, astawanqa kusikun cheqa kajmanta. 7Tukuy imata aguantan, tukuy imata creen, tukuy imata suyan, tukuy imapi sinch'ita sayan.

8Munakoyqa mana jayk'ajpis tukukonqachu; chaywampis Diospa palabranta sut'inchayqa tukukaponqa, runakunaj parlayninkupis ch'inyaponqa, yachaykunapis tukukapullanqankutaj. 9Wakintaqa rejsinchej, wakintataj sut'inchanchej. 10Maypachachus allin yachay jamojtin, chaypacha pisi yachayninchej tukukaponqa.

11Noqaqa wawa kashaspa, wawa jina parlaj kani, wawa jinataj yuyaj kani; wawa jinataj imatapis unanchaj kani. Jatunña kaspataj, wawaj ruwanasninta saqeporqani. 12Kunanqa rikunchej espejopi jina chharpullata; qhepamantaj uyapura rikunakusunchej maychus kajta. Kunanqa wakillantaraj rejsini, qhepamantaj allinta rejsisaj, imaynatachus Dios noqata rejsiwan ajinata.

13Kunanqa kashan fe, suyay, munakuy; kay kinsa kajkunamanta astawan kurajqa munakuy.

Currently Selected:

1 CORINTIOS 13: QCHSB

Highlight

Copy

Compare