1 CORINTIOS 12

Santo Espíritu atiykunata qon

1Noqa munani hermanos, Espirituman jina kaj yachaykunata yachanaykichejta.

2Qankuna yachankichej, gentilesllaraj kashaspa, chay copa lantikunaman pusachikoj kankichej. 3Chayrayku yachachiykichej, mana pipis niyta atinmanchu Diospa Espiritumpi kashaspaqa, Jesús maldicisqa kasqanta; nillataj pipis niyta atinmanchu Jesús Señor kasqanta, mana Santo Espiritupi kaspaqa.

4Imaymana yachaykuna tiyan. Chaywampis Espiritoqa pay kikillampuni. 5Evangeliopeqa imaymana llank'anas tiyan. Chaywampis, Señorqa kikillampuni. 6Imaymana ruwanas tiyan. Dios tukuy imata ruwan tukuypi. Chayampis, Diosqa kikillampuni. 7Santo Espíritu rikuchikun sapa ujman, allin kanampaj. 8Wakinmanqa Espiritunejta yachay palabras qosqa, parlayta atinampaj; wakinmantaj kikin Espiritullataj qon yachaysapa yachaykunata. 9Chay kikin Espiritullataj wakinman creeyta qon; wakinmantaj yachayta qon, onqosqasta thañichinampaj. 10Ujmanqa qon milagrosta ruwanampaj; ujmantaj Diosmanta sut'inchanampaj; ujmantaj imayna espirituchus kasqanta rejsinampaj; ujmantaj imaymana parlaykunata parlanampaj; ujmantaj qon, waj parlaykunapi parlasqankuta sut'inchanampaj. 11Kay tukuy imasta ruwan ujlla, kikin Espíritu. Paytaj rak'in imaymana yachaykunata sapa ujman munasqanman jina.

Tukuy kanchej uj cuerpolla

12Uj cuerpojta ashkha imasnin tiyan. Chay imasninwantaj ujlla cuerpoqa, ajinallataj Cristopis ujlla. 13Uj Espiritullapi tukuy bautizasqas karqanchejqa, uj cuerpolla kananchejpaj, judíos, griegos, wata kamachis, libre kajkuna ima. Tukuyninchejtaj uj Espiritullamanta ujyarqanchej.

14Chaywampis, cuerpoqa mana uj imayojllachu, ashkha imasniyoj. 15Chakichus ninman: Mana makichu kani, mana cuerpojtachu kani, nispa. Chayraykuchu mana cuerpojta kanman? 16Ningritajchus nillanmantaj mana ñawichu kasqanta, chayraykuchu mana cuerpojta kanman? 17Sichus tukuy cuerpo ñawi kanman chayqa, maypitaj ningri kanmanri? Chayrí, tukuytajchus ningri kanman chayqa, maypitaj senqa kanmanri? 18Chayrayku cuerpoj imasninta Dios churarqa cuerpoman, sapa ujninta maypichus kananman, munasqanman jina. 19Cuerpoj imasnenqa tukuyninchus uj imalla kanman chayqa, maypitaj cuerpo kanmanri? 20Kunanqa aycha cuerpo ashkha imasniyoj, chaywampis ujlla cuerpoqa.

21Ñawipis mana niyta atinchu makitaqa: Mana munaykichu, nispa; nitaj imapis niyta atinmanchu chakistaqa: Mana munaykichejchu, nispa. 22Astawanqa, cuerpoj imasnin aswan llauch'isman rijch'akojkunaraj, astawan necesitakunku. 23Cuerpoj wakin imasnin mana allimpaj qhawasqasta, astawanqa allimpaj qhawanchej; noqanchejpi mana allin rijch'akojkunatapis, aswan allinta p'achallichinchej. 24Noqanchejpi kaj allimpaj qhawasqa imasqa, mana imatapis necesitankuchu; astawanqa Dios cuerpotaqa sumajta wakicherqa, mana allimpaj qhawasqa kajkuna aswan respetasqa kanampaj. 25Ama cuerpopi tukuy imas t'aqanakunankupaj, astawanqa paykunapura qhawarinakunankupaj. 26Sichus uj ima nanasqa chayqa, tukuyninku nanachikunku paywan khuska. Sitajchus ujnin kaj ima allimpaj qhawasqa chayqa, tukuyninku paywan kusikunku.

27Qankunaqa Cristoj cuerpon kankichej; sapa ujtaj chay cuerpoj imasnin kankichej. 28Ajinata Dios churan iglesiapi sapa ujta: Ñaupajta apostolesta, qhepanta profetasta, chaymanta yachachejkunata, chaymantataj milagrosta ruwajkunata, thañichejkunata, yanapajkunata, kamachejkunata, waj parlaypi parlajkunata ima. 29Tukuychu apóstoles kanku? Tukuychu profetas kanku? Tukuychu yachachejkuna, chantá milagrosta ruwajkunapis kanku? 30Tukuyninkuchu thañichiyta yachanku? Tukuyninkuchu waj parlaykunata parlanku? Tukuyninkuchu sut'inchanku? 31Chaywampis qankunaqa, aswan sumaj yachaykunata jap'iyta munaychej; astawanqa noqa qankunaman rikuchiykichej aswan sumaj ñanta.

Currently Selected:

1 CORINTIOS 12: QCHSB

Highlight

Copy

Compare