1 CORINTIOS 11
11
Warmis templopi
1Qhatiwaychej noqata, imaynatachus noqapis Cristota qhatini ajinata.
2Mayta kusikuni, hermanos, tukuy imapi noqamanta yuyarikusqaykichejmanta, ruwasqaykichejmantapis yachachisqayman jina. 3Munani yachanaykichejta Cristoqa tukuy qharispa uman kasqanta, qharitaj warmej uman, Diostaj Cristoj uman. 4Pi qharichus mana sombreronta lluch'ukuspa Diosmanta mañakunman, chayrí Diospa palabranta sut'inchanman chayqa, uj p'enqay kanqa umampaj. 5Pi warmillapis mana uman suk'umpasqa Diosmanta mañakunman, chayrí Diospa palabranta sut'inchanman chayqa, uj p'enqay kanqa umampaj; chujchantapis k'utuchikunman karqa jina. 6Warmichus umanta mana suk'umpanman chayqa, allin kanman chujchanta k'utuchikunan. Sichus warmipaj p'enqay kanman chujchanta k'utuchikunan, chayrí t'ojluchikunampis chayqa, suk'umpakuchun. 7Qhareqa sombreronta ama churakuchunchu. Qhareqa Diospa rijch'aynin, kusikuynintaj kasqanrayku. Warmitaj qharej kusikuynin. 8Qhareqa mana warmimantachu ruwasqa karqa, astawanqa warmi qharimanta ruwasqa karqa. 9Nillataj qhareqa warmiraykuchu ruwasqa karqa, astawanqa warmi qharirayku ruwasqa karqa. 10Chayrayku, warmeqa umanta qhatakunan tiyan, angelespaj allin qhawasqa kananrayku. 11Señorpa ñaupaqempi kay pachapi, qharipis warmipis purajmanta yanapanakuspa kananku tiyan. 12Imaynachus warmi qharimanta ruwasqa karqa, ajinallataj qhareqa warmimanta nacikun. Chaywampis, tukuy ima jamun Diosmanta.
13Qankuna kikiykichej qhawaychej. Allinchu kanman warmi Diosmanta mañakunan umanta mana suk'umpakuspa? 14Kikin kausayninchej yachachiwanchej qharipajqa uj p'enqay kasqanta chujchanta wiñachikunanqa. 15Warmipajqa allin chujchasninta wiñachinan, imaraykuchus payman chujchasqa velo jina qosqa karqa. 16Chaywampis, pipis churanakuyta munanman chayqa, noqanchejqa mana yachanchejchu churanakuyta, nitaj Diospa iglesiasnimpis.
Señorpa Cenampi mana allinta ruwajkuna
17Kayta qankunaman willamuspaqa, mana alabaykichejchu, imaraykuchus mana allimpajchu tantakunkichej, astawanqa mana allimpaj. 18Kunanqa, iglesia jina tantakojtiykichej uyarini qankuna ukhupi t'aqanakus kasqanta; uj chhikamanta yuyani ajinapuni kasqanta. 19Cheqamanta, kanampuni tiyan t'aqanakus qankuna ukhupi, yachakunampaj mayqenkunachus cheqan sonqoyoj kasqaykichejta. 20Ajinata qankunapura tantakuspa mikhunkichej chayqa, manaña Señorpa Cenantachu mikhunkichej. 21Tukuy ujllapi mikhuna kashajtin, sapa uj ñaupajta cenanta mikhun, ujtaj yarqhachikun, ujtajrí machaykun. 22Imataj chayri? Manachu wasiykichej tiyarqa mikhunaykichejpaj, ujyanaykichejpajpis? Mana imayojkunata p'enqachispa, chayrí Diospa iglesiantachu qhesachankichej? Imatataj nisqaykichej, allinta ruwankichej nisqaykichejchu? Chaymantaqa mana alabaykichejchu.
Señorpa Cenan
23Imatachus Señormanta yacharqani, chayllatataj yachachiykichej: Maypachachus Señor Jesús jap'ichisqa karqa; chay kikin tutallataj t'antata oqharerqa. 24Graciasta qospataj chay t'antata parterqa, nispa: Kayta mikhuychej; kaymin cuerpoyqa, qankunarayku qosqa kanqa, kaytataj ruwaychej noqamanta yuyarikuspa. 25Ajinallatataj cenaytawankama, copata jap'ispa nerqa: Kay copaqa mosoj tratomin, yawarniypi ruwasqa; sapa kuti ujyaspa, Señormanta yuyarikuspa ruwankichej. 26Ajina ari, sapa kuti kay t'antamanta mikhuspa kay copamanta ujyaspataj Señorpa wañuyninmanta willankichej, pay kutimunankama.
Imaynatachus Señorpa Cenanta mikhunamanta
27Ajinallatataj pillapis mana allinta unanchaspalla, kay t'antamanta mikhunman, copamantapis ujyanman chayqa, Señorpa cuerponmanta yawarninmantawan juchachasqa kanqa. 28Chayrayku, sapa ujniykichej sonqoykichejta allinta qhawarikuychej, manaraj t'antata mikhushaspa, nitaj copamanta ujyashaspa. 29Pichus mikhun, ujyantaj mana Señorpa cuerponmanta unanchaspa chayqa, juchachasqa kanampaj mikhun. 30Chayrayku, qankuna ukhumanta ashkhas onqosqas kashanku, pisi kallpastaj, ashkhastaj wañunkuña. 31Noqanchejchus allinta qhawarikusunman sonqonchejta chayqa, mana juchachasqaschu kasunman. 32Juchachasqas kanchej chayqa, Señor jasut'iwanchej, ama mundowan khuska wañuyman rinanchejpaj.
33Chayrayku, hermanosníy, mikhunapaj tantakuspaqa, suyarinakuychej ujkuna ujkunata khuska mikhunaykichejpaj. 34Mayqempis yarqhachikuspaqa, wasimpi mikhuchun, ajinamanta tantakuspa, ama juchachasqas kanaykichejpaj. Waj imastaqa noqa jamuspa cheqanman churasaj.
Currently Selected:
1 CORINTIOS 11: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.