Lu̍o̍ma᷅ŋnda̍ 8
8
Tē Nyi̍na̍ Kāsi̍ Mɛ̄lɛ̄ka̍a̍ wa̍ na̍a̍ kɔ̄ɔ̄lī pɛ̍, mɛ̄ɛ̍ na̍a̍ ŋ̄ wā yɛ̍
1Le̍la̍ŋ, wānāa̍ cho̍ ha̍ā o̍ dīōm pīlɔ̍ɔ̍ ni᷄ŋ nda̍ Chi̍i̍sū Ki̍li̍tī wa̍ā wa̍, Mɛ̄lɛ̄ka̍ ki̍lūl lɛ̍ nda̍ īyāma̍ mbō tūsi̍ nda̍ nyɛ̄ pālāā chōo̍ le̍. 2Kāni̍, fo̍ndōle̍, tē I̍ wa̍ o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī pɛ̍, ko̍ŋ to̍sā mī I̍ wa̍ o̍ ba̍ Nyi̍na̍ Mɛ̄lɛ̄ka̍a̍ bɛ̄ŋgu̍, o̍ ke᷅ ya̍ yōōmōo̍ wo̍. Wāa̍ o̍ ba̍ Nyi̍na̍ Kāsi̍ Mɛ̄lɛ̄ka̍a̍ bɛ̄ŋgu̍, ō bāŋa̍ ya̍ mbo̍ sōlī ya̍ nāa̍ ya̍ I̍ wa̍ yɔ̄ŋ wɔ̄ɔ̍ŋndo̍ a̍ pīɔ̍mndo̍ o̍ bā bɛ̄ŋgu̍ wa̍. 3Sūɛ̍i̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā būmba̍ tōsā ve̍, kāni̍ fu̍u̍le̍, le̍ mɛ̄ɛ̍ wāna̍ chi̍e̍e̍yɛ̍ī na̍a̍ ŋ̄wāŋndā chīe̍e̍ ve̍ ī nɔ̍ di̍a̍llūŋ kālā le̍ yɛ̍, sūɛ̍i̍ ke̍ŋ Mɛ̄lɛ̄ka̍ ndu̍ ndu̍ to̍sa̍ ni̍. Mɛ̄lɛ̄ka̍ tōsa̍ he̍ī sa̍na̍a̍ a̍ vīōmɔ̄ɔ̄ o̍ ve᷅m Po̍ ndɔ̍ ndu̍ pi̍la̍a̍ o̍ chi̍e̍ēŋndo̍ ni᷄ŋ ndo̍. Mbo̍ hūŋ o̍ īwāna̍ chi̍e̍e̍ya̍ mɛ̄ɛ̍ wāna̍ chi̍e̍e̍yɛ̍ī yɔ̄ŋ wɔ̄ɔ̍ŋ ŋ̄wāŋndā chīe̍e̍ ve̍ ī chō yɛ̍. Mɛ̄lɛ̄ka̍ vēm māvīāmāā Po̍ ndɔ̄ɔ̍ le̍ mbō hu᷄ŋ so̍li᷄ŋ sa̍lā le̍ yɔ̄ŋndā wɔ̄ɔ̍ŋndā wāŋndā chīe̍e̍ya̍. O̍ ko̍ŋ, mbo̍ kīālū yāmɛ̍i̍ a̍ yɔ̄ŋ wɔ̄ɔ̍ŋ wāna̍ chi̍e̍e̍yɛ̍ī ŋ̄wāŋndā chīe̍e̍ ve̍ o̍kɔ̄ɔ̄. 4Le̍ sa̍bū Mɛ̄lɛ̄ka̍ tōsa̍ he̍ī yo̍ cho̍ ni̍ māā le̍ mī sɔ̄ɔ̍ŋ sa̍kpōŋ sāwāla̍ Mɛ̄lɛ̄ka̍la̍ŋ lā dīmi̍ māā na̍a̍ ŋ̄ tōsa̍ wo̍ŋ, mī ŋ̄ tōsa̍ŋ kpo̍u̍ o̍ na̍a̍ ni᷄ŋ. Ndu̍ yɔ̍nūŋ ni̍ māā na̍a̍ ŋ̍ cho̍ nyɛ̄ Nyi̍na̍ Kāsi̍ Mɛ̄lɛ̄ka̍a̍ ō dīmūl na̍a̍ wo̍ tōsāa̍ wa̍, ndu̍yɛ̍ ŋ̄ to̍sā lɛ̍ nyɛ̄ wāna̍ chi̍e̍e̍yɛ̍ī na̍a̍ ŋ̄wāŋndā chīe̍e̍ ve̍ ī dīmūl na̍a̍ wo̍ le̍ wa̍. 5Wānāa̍ cho̍ ha̍ā nyɛ̄ wāna̍ chi̍e̍e̍yɛ̍ī ndɛ̄i̍ ī dīmūl nda̍ le̍ tōsāa̍ wo̍, māā ndu̍ nda̍ tōsā ni̍ wa̍, wānāā wāā le̍nde̍ nyɛ̄ wāna̍ chi̍e̍e̍yɛ̍ī kēŋ ī dīmūl nda̍ wo̍, ndu̍ nda̍ lāndūŋ kɔ̍l le̍ tōsāa̍ ni̍. Kɛ̍ wānāa̍ to̍sā nyɛ᷅ Nyi̍na̍ Kāsi̍ Mɛ̄lɛ̄ka̍a̍ ō dīmūl nda̍ wo̍ wa̍, nda̍ nda̍, nyɛ̄ Mɛ̄lɛ̄ka̍ ō hɛ̄nāŋ ndo̍, ndu̍ nda̍ lāndūŋ kɔ̍l le̍ tōsāa̍ ni̍. 6Tē ō wa̍ yɛ̄ pɛ̍, māā nyɛ̄ wāna̍ chi̍e̍e̍yɛ̍ī nūmnde̍ ī hɛ̄nāŋ ndo̍ māā ndu̍ ŋ̄ lāndūŋ kɔ̍l le̍ tōsāa̍ ni̍, mɛ̄ɛ̍ ā chō pīɔ̍mndo̍ sɔ̄lā. Kɛ̍ tē ō wa̍ pɛ̍ māā nyɛ̄ Nyi̍na̍ Kāsi̍ Mɛ̄lɛ̄ka̍a̍ hɛ̄nāŋ ndo̍ māā ndu̍ ŋ̄ lāndūŋ kɔ̍l le̍ tōsāa̍ ni̍, mɛ̄ɛ̍ Mɛ̄lɛ̄ka̍ chō tōsā mā sɔ̍la̍ yōōmū kpe̍e̍kpe̍i̍yo̍ a̍ kɔ̄l nyūlōo̍. 7Kāni̍ fo̍ndōle̍, tē wāŋndo̍ ō lāndu̍ŋ kɔ̍l o̍ nyɛ̄ wāna̍ chi̍e̍e̍yɛ̍ī ndūɛ̍i̍ ī hɛ̄nāŋ ndo̍ tōsāa̍ pɛ̍, mɛ̄ɛ̍ ya̍a̍mɔ̍ɔ̍ Mɛ̄lɛ̄ka̍a̍ o̍ cho̍ ni̍. Ndu̍yɛ̍ wānā wa̍ā le̍nde̍ ō lu̍e̍ī o̍ sāwa̍ Mɛ̄lɛ̄ka̍a̍ bɛ̄ŋgu̍ le̍, ndu̍yɛ̍ ō nɔ̍lā bɛ̍ɛ̍ mbō lūɛ̄ī lēbɛ̄ŋgu̍ le̍. 8Ndu̍yɛ̍ wānāa̍ to̍sā nyɛ᷅ wāna̍ chi̍e̍e̍yɛ̍ī ndɛ̄i̍ ī dīmūl nda̍ le̍ tōsāa̍ wo̍ wa̍, wānāā kāŋ ā nɔ̍lā mā tōsa̍ nyɛ̍ hi̍nī Mɛ̍lɛ̄ka̍ kɔ̄l lo̍ le̍.
9Kɛ̍ ndu̍yɛ̍ nya̍ nya̍, lā cho̍ wa᷅na̍ chi̍e̍e̍yɛ̍ī nyɛ̄i̍ o̍ bā bɛ̄ŋgu̍ le̍. Nyi̍na̍ Kāsi̍ Mɛ̄lɛ̄ka̍a̍ o̍ bā bɛ̄ŋgu̍ nya̍ chō ni̍, tē Nyi̍na̍ Kāsi̍ Mɛ̄lɛ̄ka̍ kālāa̍ ō wa̍ dɔ̍ɔ̍ nya̍ kɔ̄ɔ̄lī pɛ̍. Wānā o̍ wāna̍ Nyi̍na̍ Ki̍li̍tīo̍o̍ ō cho̍ kɔ̍ɔ̍lī le̍, mɛ̄ɛ̍ wānā ko̍ŋ ō cho̍ le̍ Ki̍li̍tī le̍. 10Mi̍ chē bɛ̍ɛ̍ mi̍ ī wā māā dīāllūŋ nya᷄ŋ mu̍ŋ mu̍ŋ nɔ̍ mī ŋ̄ vī le̍ yɔ̄ŋndā wɔ̄ɔ̍ŋndā nya̍ tōsa̍ la̍ŋ, kɛ̍ tē Ki̍li̍tī wa̍ nya̍ kɔ̄ɔ̄lī pɛ̍ mɛ̄ɛ̍ nyi̍nāā nyāa̍ chō yōōmū. Kāni̍ fu̍u̍le̍, le̍ mɛ̄ɛ̍ nya̍ sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l lɛ̍. 11Ndu̍yɛ̍ tē ō wa̍ pɛ̍, mī Nyi̍na̍ Kāsi̍ Mɛ̄lɛ̄ka̍a̍ o̍ mi̍ŋgi̍ Chi̍i̍sū Ki̍li̍tī yōōmū wo̍, mbō wa̍ nya̍ kɔ̄ɔ̄lī, mɛ̄ɛ̍ ndu̍ Mɛ̍lɛ̄ka̍ o̍ mi̍ŋgi̍ Chi̍i̍sū Ki̍li̍tī yōōmū wo̍, chō yōōmōo̍ yɔ̄ŋgū o̍ dīāllūŋ nya᷄ŋ ni᷄ŋ ŋ̍ nɔ̍ mu᷅ŋ le̍ wūo̍o̍ wo̍ŋ. Ō chō he̍ī tōsā sa̍na̍a̍ o̍ Nyi̍nā ndɔ̍ Kāsi̍ cho̍ nya̍ kɔ̄ɔ̄lī wo̍ ni᷄ŋ.
12Le̍la̍ŋ chāa̍ŋāā nīāā wa̍nāā lāāla᷄ŋnda̍, o̍ kūo̍o̍ bɛ̄ŋgu̍ na̍a̍ ŋ̄ chō ni̍. Kɛ̍ ndu̍yɛ̍ ō cho̍ ku̍e̍ē wa̍ā o̍ wāna̍ chi̍e̍e̍yɛ̍ī nɛ̄i̍ bɛ̄ŋgu̍ le̍. Ko̍ŋ cho̍ ni̍, ŋ̄ cho̍ o̍ kūēē bɛ̍ŋgu̍ le̍ nyɛ̄ wāna̍ chi̍e̍e̍yɛ̍ī kēŋ ī dīmūl na̍a̍ wo̍ tōsā le̍. 13Kāni̍ fu̍u̍le̍, tē ō wa̍ pɛ̍ māā nyɛ̄ wāna̍ chi̍e̍e̍yɛ̍ī nyɛ̄i̍ ī dīmūl nya̍ le̍ tōsāa̍ wo̍ māā ndu̍ nya̍ tōsā ni̍, mɛ̄ɛ̍ lā chō pīɔ̍mndo̍ sɔ̄lā. Kɛ̍ o̍ ko̍ŋ kɔ̍ɔ̍lī, tē ō wa̍ pɛ̍ mī Nyi̍na̍ Kāsi̍ Mɛ̄lɛ̄ka̍a̍ ō māla̍ nya̍ mī lā ma᷄l sɔ̄ɔ̍ŋ yɔ̄ŋ wɔ̄ɔ̍ŋ nya̍ wa̍ tōsāa̍ wo̍ŋ wa̍ŋ wa̍ŋ pɛ̍, mɛ̄ɛ̍ lā chō yōōmū kpe̍e̍kpe̍i̍yo̍ sɔ̄lā. 14Wānāa̍ to̍sā ha̍ā nyɛ̄ Nyi̍na̍ Kāsi̍ Mɛ̄lɛ̄ka̍a̍ ō dīmūl nda̍ wo̍ wa̍, nda̍ cho̍ chūāūwāa̍ Mɛ̄lɛ̄ka̍a̍ ni̍. 15Kāni̍ fo̍ndōle̍, Nyi̍nā Kāsi̍ Mɛ̄lɛ̄ka̍ o̍ to̍sa̍ mbo̍ tūāl nya̍ kɔ̄ɔ̄lī wo̍, ō si̍i̍ŋgūū lɛ̍ nya̍ lāchɛ̄ le̍. Ndu̍yɛ̍ ō to̍sā mī sīōōŋīī ī wa̍ nya̍ le̍. O̍ ko̍ŋ kɔ̍ɔ̍lī, sīīŋgūūwo̍ Nyi̍nā ndɔ̍ Kāsīo̍o̍ ho̍ō ō sīīŋgūū nya̍ chūāūwāa̍ Mɛ̄lɛ̄ka̍ ni̍. Ndu̍yɛ̍ Nyi̍na̍ Kāsi̍ Mɛ̄lɛ̄ka̍a̍ ndu̍ ma̍lā na̍a̍ ni̍ mī ŋ̄ vēēlu̍ Mɛ̄lɛ̄ka̍ āā, “Kɛ̄kɛ̍, Fi̍nyā nāa̍”. 16Nyi̍na̍ Kāsi̍ Mɛ̄lɛ̄ka̍a̍ ni̍ a̍ nyi̍nāā nāa̍ ā tɛ̄nda̍ se̍īle̍ŋ māā chūāūwāa̍ Mɛ̄lɛ̄ka̍a̍ na̍a̍ ŋ̄ chō ni̍. 17Tē ŋ̄ wa̍ yɛ̄ chūāūwāā ndūa̍a̍ pɛ̍, mɛ̄ɛ̍ ŋ̄ chō hūnɔ̄ɔ̄ nyɛ̄m o̍ kɛ̍su̍l chūāūwāā ndūa̍a̍ wo̍ŋ sɔ̄lā. Ndu̍yɛ̍ nyɛ̄m o̍ kɛ̍su̍l Ki̍li̍tī wo̍ŋ, na̍a̍ nda̍a̍ ŋ̍ cho̍ mu̍ŋ hūnɔ̄ɔ̄ nɔ̄ ni̍. Kāni̍ fu̍u̍le̍, tē ō wa̍ pɛ̍ mī ŋ̄ kēēku̍ o̍ nyɛ̄ pālāa̍ ni᷄ŋ, mɛ̄ɛ̍ ndu̍ Ki̍li̍tī ke̍e̍ku̍ o̍ nyɛ̄ pālāa̍ ni᷄ŋ yɛ̍, mɛ̄ɛ̍ na̍a̍ bɛ̍ɛ̍ ŋ̄ chō hūnɔ̄ɔ̄ wā na̍a̍ nda̍ā o̍ nāŋɔ̄ɔ̄ ndɔ̄ɔ̍ ni᷄ŋ.
A̍ nāŋɔ̄ɔ̄ na̍a̍ ŋ̄ sɔ̄lā ni̍ŋ ndo̍ o̍kɔ̄ɔ̄
18I̍ si̍nā ndi̍ wa̍la̍ŋ māā dɛ̍nɛ̍la̍ pa̍lāāla̍ cho̍ la᷅ŋ na̍a̍ chōo̍ bo̍o̍nde̍i̍ he̍ī la̍ŋ, wānā tu̍ū la̍ŋ kpo̍so̍ŋ a̍ nāŋɔ̄ɔ̄ bɛ̄ndū na̍a̍ ŋ̄ wā ni̍ŋ le̍ni̍ŋ ndo̍ le̍. 19Nyɛ̄ o̍ nyɛ̄ fe̍e̍ Mɛ̄lɛ̄ka̍ tōōsi̍a̍a̍ mu̍ŋ kpo̍u̍ ŋ̄ chō pa̍ chu᷅mndo̍, ndu̍yɛ̍ mi̍ ŋ̄ wā a̍ yēēmɛ̍i̍ ta̍u̍ le̍ bōōndi̍i̍ Mɛ̄lɛ̄ka̍ chɔ̄m ni̍ŋ chi̍e̍ēŋndo̍ wānāa̍ cho̍ wānāā ndūa̍a̍ wa̍ ve̍. 20Kāni̍ fo̍ndōle̍, nyɛ̄ o̍ nyɛ̄ fe̍e̍ Mɛ̄lɛ̄ka̍ tōōsi̍a̍a̍ mi̍ nyɛ̄m mu᷅ŋ ŋ̄ būmbā le̍ nyɛ̄ ŋ̍ nɔ̍ le̍ tōsāa̍ wo̍ tōsāa̍. Kɛ̍ ndu̍yɛ̍ ō ve̍ dɛ̍nɛ̍ nyɛ̄m mu᷅ŋ mu̍ŋ pi̍la̍ le̍. Mɛ̄lɛ̄ka̍ pi̍la̍ kɛ̍ɛ̍si̍a̍a̍ ndi̍ le̍nde̍ ni̍. Kɛ̍ ndu̍yɛ̍ nyɛ̄m Mɛ̄lɛ̄ka̍ tōōsi̍a̍a̍ mu̍ŋ ndo̍ŋ ŋ̄ wa̍ lēhɔ̄l o̍ nɛ̄ī 21māā pāa̍le̍ fu̍u̍lūū ni̍ŋ mī Mɛ̄lɛ̄ka̍ sōli̍ mu̍ŋ o̍ chɛ̄le̍ŋ ni᷄ŋ, ko̍ŋ cho̍ ni̍ ŋ̄ se᷅ lɛ̍ le̍. Ndu̍yɛ̍ ŋ̄ chō vɛ̄lɛ̄ lēhɔ̄l o̍ nɛ̄ī māā mu̍ŋ bɛ̍ɛ̍ ŋ̄ chō bāŋa᷄ŋndo̍ sɔ̄lā ndu̍yɛ̍, mī ŋ̄ sɔ̄la̍ nāŋɔ̄ɔ̍ mɛ̄ɛ̍ i̍ yɔ̍nu̍ŋ a̍ chūāūwāa̍ Mɛ̄lɛ̄ka̍a̍ yɛ̍. 22Kāni̍ fo̍ndōle̍, ŋ̄ sīnā māā chɔ̍ŋ mbo̍ fūūlūū a̍ bōōnde̍i̍ he̍ī nyɛ̄ o̍ nyɛ̄ Mɛ̄lɛ̄ka̍ tōsa̍, kpo̍u̍ ŋ̄ chō kūŋnda̍ŋ a̍ nyɛ̄ nɛ̄īyāa̍, mɛ̄ɛ̍ nyɛ̄ nɛ̄īyāa̍ ō wā nu̍a̍ā wānā la̍nɔ̍ɔ̍ chōo̍ o̍ vīōlɔ̄ɔ̍ yɛ̍. 23Kɛ̍ ndu̍yɛ̍ ō cho̍ ko̍ nyɛ᷅m Mɛ̄lɛ̄ka̍ tōōsi̍a̍a̍ wo̍ŋ te̍ ŋ̍ cho̍ kūŋnda̍ŋ a̍ nyɛ̄ nɛ̄īyāa̍ le̍. Na̍a̍ Mɛ̄lɛ̄ka̍ tōsa̍ bɛ̍ɛ̍ mi̍ Nyi̍nā ndɔ̍ Kāsīo̍o̍ tūāl na̍a̍ kɔ̄ɔ̄lī, māā tɔ̄nɔ̍ tāse̍ le̍ nyɛ̄ o̍ to̍sāl na̍a̍ ni̍ŋ ndo̍ wa̍, na̍a̍ bɛ̍ɛ̍ le̍nde̍ ko̍ni̍ i̍ cho̍ a̍ na̍a̍ ni̍. Ŋ̄ chō kūŋnda̍ŋ o̍ kɔ̄lta̍ŋ ni᷄ŋ bo̍o̍ndi̍i̍ na̍a̍ ŋ̄ chō he̍ī chūmndo̍ le̍ mī Mɛ̄lɛ̄ka̍ sīīŋgu̍u̍ na̍a̍ chūāūwāā ndɔ̄, ndu̍yɛ̍ mbo̍ bāŋā na̍a̍ nyɛ̄ kɛ̄ndɛ̄ pu̍lu̍lu̍ ve̍. 24Kāni̍ fo̍ndōle̍, Mɛ̄lɛ̄ka̍ pīŋi̍ na̍a̍ le̍ mī ŋ̄ nɔ̄ hɔ̄lte̍ŋ o̍ nɛ̄ī le̍ he̍ī. Nyɛ̄ wāŋndo̍ chīi̍ ni᷅ŋ sɔ̄lā pɛ̍, ō nɔ᷅ lɛ̍ lēhɔ̄l o̍ nɛ̄ī le̍ ndu̍ le̍. Le̍la̍ŋ tē ŋ̄ wa̍ lēhɔ̄l o̍ nɛ̄ī le̍ nyɛ̄ na̍a̍ ŋ̄ chīi̍ ni᷅ŋ sɔ̄lā wo̍ pɛ̍, mɛ̄ɛ̍ ko̍ŋ ve᷅ lɛ̍ hɔ̄ltē wāā o̍ nɛ̄ī le̍. 25Kɛ̍ ndu̍yɛ̍ tē ŋ̄ wa̍ lēhɔ̄l o̍ nɛ̄ī le̍ nyɛ̄ na̍a̍ ŋ̄ sɔ̄la̍ wɔ̍ le̍ wo̍ pɛ̍, mɛ̄ɛ̍ bīūwɔ᷄ŋndo̍ na̍a̍ ŋ̄ bīūnūŋ chu᷅mndo̍ ni̍.
26Ndu̍yɛ̍ o̍ ko̍ŋ kɔ̍ɔ̍lī, hūnɔ̄ɔ̍ Nyi̍na̍ Mɛ̄lɛ̄ka̍a̍ ō hūŋ ni̍ mbō māla̍ na̍a̍. Kāni̍ fo̍ndōle̍, ŋ̄ nɔ̍ kpa̍āya̍ le̍, ndu̍yɛ̍ ŋ̄ si̍nā mɛ̄ɛ̍ na̍a̍ ŋ̄ pīɛ̄ī Mɛ̍lɛ̄ka̍ yɛ̍ le̍. Le̍ he̍ī Nyi̍na̍ Mɛ̄lɛ̄ka̍a̍ chō pīɛ̄īle̍ŋ sɔ̍ŋgɔ̍ nāa̍ kpe̍e̍kpe̍i̍, sɔ̍ŋgɔ̍ ndɔ̄ bɛ̍ɛ̍ sɔ̍lāŋ te̍. 27Ndu̍yɛ̍ Mɛ̄lɛ̄ka̍ o̍ si̍nā ho̍ō nyɛ̄ o̍ nyɛ̄ fe̍e̍ na̍a̍ o̍ lākɔ̄l lo̍, ndu̍ si̍nā nyɛ᷅ Nyi̍na̍ Mɛ̄lɛ̄ka̍a̍ dīmī o̍ pīɛ̄īle̍ŋ ni᷄ŋ ndo̍ pɛ̄ŋgu̍. Kāni̍ fu̍u̍le̍, ndu̍ pi̍ɛ̍ī sɔ̍ŋgɔ̍ wānāa̍ Mɛ̄lɛ̄ka̍a̍ mɛ̄ɛ̍ Mɛ̄lɛ̄ka̍ yēēma̍ yɛ̍ ni̍.
28Ŋ̄ sīnā māā wānāa̍ ka̍a̍la̍ Mɛ̄lɛ̄ka̍ wa̍, ko̍ŋ cho̍ ni̍ wānāā o̍ ve̍e̍lu̍ le̍ mī nyɛ̄ o̍ kɛ̍ɛ̍si̍a̍a̍ wo̍ ō tōsa̍ŋ nda̍, īsɔ̄ɔ̍ o̍ īsɔ̄ɔ̍ i̍ ko̍ma̍l nda̍, tōsāa̍ Mɛ̄lɛ̄ka̍ tōsā ni̍ mī dɛ̍nɛ̍ kɛ̍ndɛ̄ fūla̍ lēni᷄ŋ. 29Wānāā Mɛ̄lɛ̄ka̍ hɛ̄li̍ ni᷅ŋ pāāndū pa̍ wa̍, nda̍ o̍ yu̍lū le̍ mā sīmnu᷄ŋ mɛ̄ɛ̍ Po̍ ndɔ̄ɔ̍ chō yɛ̍ ni̍, le̍ mbō lo̍ o̍ ko̍ŋ mī Po̍ ndɔ̄ɔ̍ ō wa̍ wāna̍ tāso̍o̍ le̍ yu̍ŋgu̍ bɛ̍ndū wānāā lāāla᷄ŋnda̍ kpo̍u̍. 30Wānāā Mɛ̄lɛ̄ka̍ yūlū wa̍, nda̍ o̍ ve̍e̍lu̍ ni̍. Ndu̍yɛ̍ wānāā o̍ ve̍e̍lu̍ wa̍, nda̍ o̍ si̍i̍ŋgu̍u̍ wānāā sa̍kpō ndu̍ pi̍la̍ o̍ hɔ̄l ni̍. Ndu̍yɛ̍ wānāā o̍ si̍i̍ŋgu̍u̍ ka̍ŋ wa̍nāā sa̍kpō ndu̍ pi̍la̍ o̍ hɔ̄l la̍, nda̍ o̍ to̍sa̍ ni̍ ma̍ sɔ̄lā nāŋɔ̄ɔ̄ ndɔ̄ɔ̍.
Chi̍i̍sū Ki̍li̍tī chɔ̍m kāālā bɛ̄ndū Mɛ̄lɛ̄ka̍ kāāla̍ na̍a̍ wo̍
31Mɛ̄ɛ̍ sɔ̄ɔ̍ŋ mu᷅ŋ ki̍nɛ̍i̍, ɔ̍ɔ̄ bōllē ndɔ̄le̍ŋ? Bōllē ndɔ̄le̍ŋ le̍ cho̍ ni̍ māā tē Mɛ̄lɛ̄ka̍ wa̍ na̍a̍ kɔ̄ɔ̄lī pɛ̍, wānā o̍ wānā nɔ̍lā na̍a̍ le̍. 32Kāni̍ fo̍ndōle̍, ndu̍ Mɛ̍lɛ̄ka̍ ō kāka̍ŋ bɛ̍ɛ̍ Po̍ ndɔ̄ɔ̍ le̍. Mbo̍ yɔ̄ŋgū ndu̍ le̍ mbō wa̍ ō sōlīāā sa̍lā le̍ na̍a̍ kpo̍u̍. Nāa̍ o̍ yɔ̍ŋgu̍ wɔ̄ Po̍ ndɔ̄ɔ̍, bāā mbō kɛ̄ɛ̍ le̍ na̍a̍ nyɔ̄ɔ̍ŋ kpo̍u̍ ke᷅ fo̍ndo̍? Sāko̍. Ō kɛ̍ɛ̄ kpo̍so̍ŋ te̍. 33Na̍a̍ Mɛ̄lɛ̄ka̍ hɛ̄li̍ le̍ wāa̍ wānāā ndɔ̄ wa̍, ō nɛ̄ɛ̍nɛ̍ nɔ̍lā yɛ̍ mbō chɔ᷄m sūɛ̍i̍ nɛ̄i̍ le̍ yɔ̄ŋndā nāāla̍ wɔ̍ɔ̍ŋnda̍ŋ? Mɛ̄lɛ̄ka̍ chɔ᷅m su̍ɛ̍i̍ na̍a̍ le̍, kāni̍ fo̍ndōle̍, ndu̍ pi̍la̍ si̍i̍ŋgu̍u̍ na̍a̍ wānāā sa̍kpō ndu̍ pi̍la̍ o̍ hɔ̄l ni̍. 34Mī nɛ̄ɛ̍nɛ̍ ki̍lu̍l lɛ̄ na̍a̍ yāmɛ̍i̍ mbō tūsi̍ na̍a̍ nyɛ̄ pālāa̍ chōo̍ le̍ yɔ̄ŋndā nāāla̍ wɔ̍ɔ̍ŋnda̍ŋ? Wānā bɛ̍ɛ̍. Chi̍i̍sū Ki̍li̍tī bɛ̍ɛ̍ ō tu̍sī na̍a̍ nyɛ̄ pālāā chōo̍ le̍. Kāni̍ fu̍u̍le̍, ndu̍ vi᷅ ni̍, bɔ̄ɔ̍le̍, ndu̍ Mɛ̄lɛ̄ka̍ mīŋgi̍ yōōmū ni̍, mbo̍ wā īchāli̍ o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍a̍ chōo̍, mbo̍ wā Mɛ̄lɛ̄ka̍ nyɔ̄ɔ̄lōo̍ le̍ na̍a̍. 35Mī yɛ̄ɛ̍nɛ̍ so̍li̍ yɛ̄ na̍a̍ o̍ kāāla̍ Ki̍li̍tīo̍o̍ bɛ̄ŋgu̍? Nyɛ̄ o̍ nyɛ̄ bɛ̍ɛ̍ nɔ̍lā le̍. Kpūndɔ̍ɔ̍ ni̍, dɛ̍nɛ̍ pa̍lāa̍ ni̍, nyɛ̄ pālāā wāŋnda̍ hāndū na̍a̍ chōo̍ wo̍ ni̍, yīa̍a̍ŋ ni̍, tāmbe̍i̍ ni̍, kɔ̄ŋgɔ̄līa̍ŋnda̍ wāŋnda̍ kɔ̄ŋgɔ̄līāŋ na̍a̍ la̍ŋ ni̍, pīɔ̍mndo̍ ni̍, mu̍ŋ ki̍nɛ̍i̍ ŋ̄ nɔ̍lā na̍a̍ fāŋā o̍ kāāla̍ Ki̍li̍tīo̍o̍ bɛ̄ŋgu̍ le̍. 36Mɛ̄ɛ̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ yɛ̍ āā,
“Le̍ lēpāla̍ o̍ lēpāla̍ ā chō na̍a̍ kɔ̄ŋgɔ̄līa̍ŋnda̍ŋ le̍ na̍a̍ dīyɔ̄ɔ̍ le̍ sa̍bū nyāa̍.
Wāŋnda̍ ā chu̍a̍ na̍a̍ māchūāā mɛ̄ɛ̍ sāa̍ nda̍ wā kɔ᷅la̍ŋ dīyɔ̄ɔ̍ wo̍ ō wā nu̍a̍ā yɛ̍.”
37Kɛ̍ ndu̍yɛ̍ wāna̍ ka̍a̍la̍ na̍a̍ ho̍ō wo̍ chō tōsā sɔ̄ɔ̍ŋ mu᷅ŋ ki̍nɛ̍i̍ mī ŋ̄ yēm mu̍ŋ kpe̍e̍kpe̍i̍. 38Kāni̍ fo̍ndōle̍, I̍ si̍nā kpe̍nde̍ke̍le̍ māā nyɛ̄ o̍ nyɛ̄ nɔ̍lā mbō fāŋa̍ na̍a̍ o̍ kāāla̍ Mɛ̄lɛ̄ka̍a̍ bɛ̄ŋgu̍ le̍. Ŋ̄ wa̍ yo̍o̍mū, kɛ̄lɛ̄ŋgāā ŋ̄ wu̍, ko̍ŋ fe̍ŋā na̍a̍ o̍ kāālā o̍ ka̍a̍la̍ na̍a̍ wo̍ bɛ̄ŋgu̍ le̍. Ki̍i̍la̍a̍ Mɛ̄lɛ̄ka̍a̍ ni̍, ku̍ndālā cho̍ o̍ māsāle̍ŋ chōo̍ cho̍o̍ la̍ŋ ni̍, ā nɔ̍lā le̍. Sɔ̄ɔ̍ŋ cho̍ yɔ̄nɔ᷄ŋndo̍ pɛ̄ŋgo̍o̍ ho̍ō wo̍ŋ ni̍, a̍ sɔ̄ɔ̍ŋ cho̍ bɛ̍ɛ̍ hu̍nɔ̄ɔ̄ yɔ̄nɔ᷄ŋndo̍ wo̍ŋ, ŋ̄ nɔ̍lā le̍. 39Kpāāyāla̍ŋ chōo̍ cho̍o̍ ni̍ a̍ la᷅ŋ o̍ chi̍e̍ēŋndo̍ bɛ̄ŋgu̍, la̍ŋ bɛ̍ɛ̍ lā nɔ̍lā le̍. Nyɛ̄ o̍ nyɛ̄ Mɛ̄lɛ̄ka̍ tōsa̍, nyɛ̄ o̍ nyɛ̍ cho̍ o̍ mu̍ŋ ni̍ŋ mbō nɔ̄la̍ na̍a̍ fāŋā o̍ kāāla̍ Mɛ̄lɛ̄ka̍a̍ bɛ̄ŋgu̍ le̍, ndu̍ yɔ̍nūŋ ni̍ māā kāālā o̍ chɔ̍m na̍a̍ o̍ Ma̍sānɔ̄ nāa̍ Chi̍i̍sū Ki̍li̍tī ni̍ŋ ndo̍.
Kisi Bible © Bible Society in Liberia, 2015.