Lu̍o̍ma᷅ŋnda̍ 9
9
Wāna̍ Mɛ̄lɛ̄ka̍ hɛ̄nāŋ le̍ hɛ̄līo̍o̍ wo̍ o̍ hɛ̍lī ni̍
1Nyɛ̄ ya̍ I̍ cho̍ ho̍ō dīmīo̍o̍ wo̍ tōnya̍a̍ o̍ cho̍ ni̍. I̍ cho̍ ndu̍ dīmīo̍o̍ māā bu̍ɛ̍i̍ Ki̍li̍tī. Ō cho̍ la̍cho̍o̍wā le̍. Kɔ̄l nūu̍ o̍ cho̍ Nyi̍na̍ Kāsi̍ Mɛ̄lɛ̄ka̍a̍ o̍ ba̍ bɛ̄ŋgu̍ wo̍ chɔ᷄m ya̍ kpe̍e̍kpe̍i̍ māā ō cho̍ la̍cho̍o̍wā le̍ ya̍ I̍ cho̍ dīmī le̍. 2Ndu̍ cho̍ ni̍ māā mɔ̍nɛ̍i̍ bɛ̍ndūe̍i̍ ī chō o̍ kɔ̄l nūu̍ ni᷄ŋ. Ndu̍yɛ̍ nyɛ̄ nɛ̄īyāa̍ cho̍ o̍ kɔ̄l nūu̍ ni᷄ŋ le̍ wānāā nīa̍a̍ wo̍, lāmɛ̄ɛ̄lu̍ bɛ̍ɛ̍ o̍ nɔ̍ le̍. 3Tē ndi̍ i̍i̍ yɔ̍nūŋ pɛ̍, wānāā nīa̍a̍ na̍a̍ ŋ̄ fūla̍ ha̍ā kāa̍le̍ pi᷅lɛ̍le̍ŋ nda̍, ya̍ i̍i̍ hɛ̍nāŋ māā tē ya̍ ni̍ mī Mɛ̄lɛ̄ka̍ ndu̍ o̍o̍ ha̍ndu̍ ya̍ nyɛ̄ nɛ̄īyāa̍ chōo̍ sɔ̍ŋgɔ̍ ndāa̍, ndu̍yɛ̍ mī ya̍ i̍i̍ wa̍ ō fāŋāā, i̍i̍ ve᷅ lɛ̍ lātūlu̍ a̍ Ki̍li̍tī le̍. 4Wānāā Mɛ̄lɛ̄ka̍ pi̍la̍ hɛ̄li̍ wa̍ nda̍ chō ni̍. Mbo̍ sīīŋgūū nda̍ chūāūwāā ndɔ̄. Ndu̍yɛ̍ mbo̍ tōsā ma̍ sɔ̄lā nāŋɔ̄ɔ̍ ndɔ̄ɔ̍. Ndu̍yɛ̍ mbo̍ yīī kpe̍ma̍la̍ŋ nda̍ nda̍ā. Mbo̍ yɔ̄ŋgū nda̍ sāwāla̍ ndɔ̄la̍ŋ. Ndu̍yɛ̍ mi̍ Mɛ̄lɛ̄ka̍ chɔ̄m nda̍ mɛ̄ɛ̍ nda̍ sōōlūū ndu̍ o̍ nɛ̄ī sa̍kpō yɛ̍. Ndu̍yɛ̍ nda̍ Mɛ̄lɛ̄ka̍ ō chūe̍l būŋga᷄ŋ ni̍. 5Ā fūla̍ o̍ pūlāle̍ fi̍nyāā nāā ma̍māā lēbɛ̄ɛ̄ya̍ chōo̍. Ndu̍yɛ̍ tē ŋ̄ nu̍a̍ a̍ wāna̍ chi̍e̍e̍yɛ̍i̍ Ki̍li̍tīe̍i̍ o̍kɔ̄ɔ̄ pɛ̍, ŋ̄ sāālu̍ŋ māā o̍ kāa̍le̍ wāŋnda̍ ha̍ā chōo̍ o̍ fu̍la̍ ni̍. Sāŋgālāa̍ wa̍ o̍ yɔ̍ŋga᷄ŋ o̍ Mɛ̄lɛ̄ka̍ lo̍ o̍ cho̍ ŋ̄wāŋndā chīe̍e̍ kpo̍u̍ cho̍o̍ wo̍ le̍ fɛ̍ɛ̍ŋ a̍ fɛ̍ɛ̍ŋ. I̍ yɔ̄nu̍ŋ le̍nde̍ fɔ̍.
6Ō cho̍ mī Mɛ̄lɛ̄ka̍ kɛ̄ɛ̍ le̍ nyɛ̄ o̍ chu̍a̍ būŋgɛ̄i̍ yo̍ tōsā le̍. Kāni̍ fo̍ndōle̍, wānāa̍ fu̍la̍ o̍ kāa̍le̍ I̍sɔ̄lūɛ̄īle̍ŋ chōo̍ wa̍ ō cho̍ nda̍ kpo̍u̍ le̍ Mɛ̄lɛ̄ka̍ hɛ̄li̍ māā wānāā ndūāā kpe̍e̍kpe̍i̍ le̍. 7Ndu̍yɛ̍ ō cho̍ wa̍nāa̍ fu̍la̍ o̍ pūlāle̍ E̍bīlāha᷅mnde̍ŋ chōo̍ wa̍ fa̍ū le̍ a̍ cho̍ chūāūwāā kpe̍e̍kpe̍i̍ya̍a̍ E̍bīlāha᷅m nda̍ le̍. Mi̍ Mɛ̄lɛ̄ka̍ dīmūl E̍bīlāha᷅m āā, “Wānāa̍ fu̍la̍ o̍ pūlāle̍ A̍ Āa̍se̍le̍ŋ chōo̍ wa̍, nda̍ cho̍ wā ā vēēlāā ni̍ āā chūāūwāā nūmnda̍.” 8Ko̍ŋ cho̍ ni̍ māā ō cho̍ chu̍a̍u̍wāā E̍bīlāha᷅mnda̍ kpo̍u̍ le̍ cho̍ ā vēēlāā māā chūāūwāa̍ Mɛ̄lɛ̄ka̍ le̍. Chūāūwāa̍ ve̍lu᷄ŋ o̍ pūlāle̍ E̍bīlāha᷅mnde̍ŋ chōo̍ le̍ būŋgɛ̄ī kpe̍e̍kpe̍i̍ Mɛ̄lɛ̄ka̍ chūe̍l E̍bīlāha᷅m nde̍ wa̍, nda̍ cho̍ chūāūwāā kpe̍e̍kpe̍i̍ya̍a̍ E̍bīlāha᷅mnda̍ ni̍. 9Kāni̍ fo̍ndōle̍, būŋgɛ̄i̍ Mɛ̄lɛ̄ka̍ chu̍a̍ ve̍ ndi̍ cho̍ he̍ī ni̍ āā, “Tē bōōndi̍i̍ kpe̍e̍kpe̍i̍ye̍ ī fūūlu̍u̍ pɛ̍, I̍ cho̍ mīīŋgū na̍nu᷄ŋ. O̍ ko̍ŋ, Se̍lūā vi̍a̍lū ni᷅ŋ pōo̍.”
10Ndu̍yɛ̍ ō fūla̍ o̍ ko̍ŋ kɔ̍ɔ̍lī, pūa̍a̍ ŋi̍ɔ̍ɔ̍ŋāa̍ Lūībɛ̍kā wa̍, fi̍nyāa̍ ō pīlɛ̍ kpe̍ ve̍lū nda̍ ni̍, ndu̍ yɔ̍nūŋ māā fi̍nyā nāā ma̍māa̍ Āa̍se̍ ni̍. 11-12Mi̍ Mɛ̄lɛ̄ka̍ dīmūl Lūībɛ̍kā āā, “Po̍ nu̍m tāso̍o̍ ō wā ni̍ŋ pɔ̍mbɔ̄ ndɔ̍ o̍ bā bɛ̄ŋgu̍.” Nda̍ a̍a̍ vi̍lu̍ŋ ndɔ̍ bɛ̍ɛ̍ le̍ mi̍ Mɛ̄lɛ̄ka̍ dīmī he̍ī, kɛ̄lɛ̄ŋgāā ni᷅ŋ te̍ mī nda̍ a̍a̍ to̍sa̍ īsɔ̄ɔ̍ o̍ īsɔ̄ɔ̍, ī kɛ̄ndɛ̄ ni̍, ī wɔ̄ɔ̍ŋ ni̍. Sa̍bū Mɛ̄lɛ̄ka̍ dīmi̍ dīōmndo̍ ho̍ō wo̍ cho̍ ni̍ māā, le̍ chɔ̄mndo̍ māā pūa̍a̍ ŋi̍ɔ̍ɔ̍ŋnda̍ ha̍ā hɛ̄lī o̍ hɛ̍li̍ pōo̍ ō pīlɔ̍ɔ̍ wo̍, māā sūɛ̍i̍ ndu̍ pi̍la̍ Mɛ̍lɛ̄ka̍ kɛ̍ɛ̍si̍a̍a̍ kpe̍e̍kpe̍i̍ye̍ i̍ cho̍ ni̍. Le̍la̍ŋ hɛ̄lī Mɛ̄lɛ̄ka̍ hɛ̄li̍ wāŋndo̍ ō pīlɔ̍ɔ̍ wo̍, nda̍ nda̍ ŋi̍ɔ̍ɔ̍ŋ ō ve̍ le̍ wa̍li̍ ndā to̍sāā le̍. Mɛ̄lɛ̄ka̍ pi̍la̍ vēēlū ndɔ̄ɔ̍ ni̍. 13Mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍ āā, “I̍ ka̍a̍la̍ Che̍kɔ̍pū, mi̍ I̍ tu᷅l I̍īsɔ̄ lēyɛ̄.”
14Mɛ̄ɛ̍ ɔ̍ɔ̄ nyɛ̄ na̍a̍ ŋ̄ nɔ̄ mī ŋ̄ dīmi̍ o̍ sūɛ̍i̍ he̍ī ni᷄ŋ ndo̍? Bāā dīmīo̍o̍ na̍a̍ ŋ̄ chō ni̍ māā Mɛ̄lɛ̄ka̍ nɔ̄ ka̍fāla̍ŋ? Sāko̍. Mɛ̄lɛ̄ka̍ nɔ̍ la̍ka̍fā le̍. 15Kāni̍ fo̍ndōle̍, ndu̍ Mɛ̍lɛ̄ka̍ mbo̍ dīmūl Mūu̍sē āā, “Wāna̍ ya̍ I̍ hɛ̍na̍ŋ le̍ nyīɛ̍ɛ̍ye̍ tūīīnɔ᷄ŋndo̍ wo̍, ndu̍ ya̍ I̍ tu̍i̍i̍nūŋ īnyīɛ̍ɛ̍ ni̍. Ndu̍yɛ̍ wāna̍ ya̍ I̍ hɛ̍nāŋ le̍ kɛ̄ndɛ̄i̍ tōsāllo̍ wo̍, ndu̍ ya̍ I̍ to̍sāl kɛ̍ndɛ̄i̍ ni̍.” 16Le̍la̍ŋ hɛ̄lī Mɛ̄lɛ̄ka̍ hɛ̄lī wa᷅ŋndo̍ wo̍, ō ve᷅ le̍ wānā ko̍ŋ hɛ̄na᷄ŋ ndɔ̄, kɛ̄lɛ̄ŋgāā le̍ wa̍li̍ ndɔ̄ to̍sāā le̍. Le̍ nyīɛ̍ɛ̍yīī Mɛ̄lɛ̄ka̍ nɔ̄ le̍ wāŋndo̍ ve̍, o̍ hɛ̍lī ndu̍ ni̍. 17Kāni̍ fo̍ndōle̍, mi̍ Yāu̍ Mɛ̄lɛ̄ka̍a̍ chɔ̄m a̍ nyɛ̄ Mɛ̄lɛ̄ka̍ dīmi̍ nāa̍ māsā bɛ̍ndōo̍ le̍ lɛ̄ŋndē I̍chi̍pīle̍ŋ ndo̍ chu̍a̍ wo̍ āā, “Le̍ sa̍bōo̍ ho̍ō kpe̍e̍kpe̍i̍ ya̍ si̍i̍ŋgu̍u̍ nu̍m māsā ni̍ le̍ mī I̍ chɔ̍m kpāāya̍ nūu̍ nāa̍ wāŋnda̍ chūā, ndu̍yɛ̍ mī tɔ̍ɔ̍ nūu̍ tīu̍ chi̍e̍ēŋndo̍ kpo̍u̍.” 18Le̍la̍ŋ wāna̍ Mɛ̄lɛ̄ka̍ hɛ̄nāŋ le̍ nyīɛ̍ɛ̍ye̍ tūīīnɔ᷄ŋndo̍ wo̍, ndu̍ o̍ tu̍i̍i̍nūŋ īnyīɛ̍ɛ̍ ni̍. Ndu̍yɛ̍ wāna̍ o̍ hɛ̍nāŋ le̍ bōlle̍ŋ kīndīo̍o̍ wo̍, ndu̍ o̍ ki̍ndī bo᷅lle̍ŋ ni̍.
Mɛ̄lɛ̄ka̍ nɔ̄ di̍ mbō tōsa̍ nyɛ̄ o̍ hɛ̍na̍ŋ ndo̍
19Mī wānā nyu̍na̍ ya̍ dɔ̍ɔ̍ āā, “Tē ō wa̍ le̍nde̍ pɛ̍ Mɛ̄lɛ̄ka̍ tōsā sɔ̍ɔ̍ŋ ni̍, mɛ̄ɛ̍ vɛ̄ɛ̍nɛ̍ o̍ lo̍o̍kū yɛ̍ mbō bīī wāŋnda̍ tɛ̄ɛ̄? Nɛ̄ɛ̍nɛ̍ nɔ̍lā yɛ̍ mbō kɛ̄ɛ̍ nyɛ̄ Mɛ̄lɛ̄ka̍ hɛ̄na̍ŋ ndo̍?” 20Kɛ̍ ndu̍yɛ̍ wānā ko̍ŋ I̍ nyu̍nā wɔ̍ nu̍m, wāna̍ māāvɛ̄ɛ̍ ŋ̄ chō yɛ̄ mā sɛ̍ɛ̍ŋgi̍a̍a̍ Mɛ̄lɛ̄ka̍ dīōm. Kpɛ̍ɛ̍nɛ̍i̍ pūūlūe̍i̍ ī nɔ̄lā pa̍ mī ī nyūna̍ wāna̍ chɔ̍ū ndi̍ wo̍ āā, “Vɛ᷅ ma̍ chūāū ya̍ nu̍a̍ā?” 21Kāni̍ fo̍ndōle̍, wāna̍ chu̍a̍ū kpɛ̍ɛ̍nɔ̍ŋ ndo̍ ō nɔ̄ di̍ mbō chɔ̄ū nyɛ̄ o̍ ye̍e̍mā wo̍ a̍ pūūlu̍ o̍ chu̍ū ko̍ŋ ndo̍. Ō nɔ̄lā mbō chu̍a̍ pūūlū chu̍a̍u̍wāā pīlɛ̍ kōŋ kpe̍ mbō chɔ̄ū kpɛ̍ɛ̍nɛ̍i̍ le̍ dɛ̍nɛ̍la̍ bɛ᷅nda̍ŋ. O̍ ko̍ŋ kɔ̍ɔ̍lī, mbō chu̍a̍ pūūlū chu̍a̍u̍wāā pīlɛ̍ kōŋ mbō chɔ̄ū i̍ wa᷅ le̍ kpe̍ku̍la̍ yɔ̍ŋāā la̍ŋ nde̍. 22Sūɛ̍i̍ he̍ī ī vēla᷅ŋ a̍ nyɛ̄ Mɛ̄lɛ̄ka̍ tōsā wo̍. Tē ō wa̍ yɛ̄, māā mī Mɛ̄lɛ̄ka̍ ndu̍ o̍o̍ dɔ̍u̍nu᷄ŋ tu̍mbe̍ a̍ wāŋnda̍, ndu̍yɛ̍ mbō hɛ̍na̍ŋ le̍ mbō tūsi̍ nda̍ nyɛ̄ nɛ̄īyāa̍ chōo̍, ndu̍yɛ̍ mbō hɛ̄na̍ŋ mī wāŋnda̍ sīna̍ kpāāya̍ ndɔ̄ɔ̍. Kɛ̍ ndu̍yɛ̍ o̍ ko̍ŋ kɔ̍ɔ̍lī, mbō bi̍u̍ŋ nda̍ ta̍u̍, nda̍ yɔ̍nūŋ ni̍ māā wānāā o̍ dɔ̍u̍nu᷄ŋ tu̍mbe̍ a̍ nda̍ mbo̍ wā le̍ nda̍ nyɛ̄ pālāa̍ tūsī chōo̍ wa̍. Ko̍ŋ cho̍ ni̍ wānāā o̍ wa̍ ō bɛ̄ɛ̄ndīa̍ŋ le̍ mbō tɛ̄ɛ̄mbu̍u̍ nda̍ wa̍. Vɛ᷅ ō nɔ᷅ di̍ mbō tōsa̍ le̍nde̍ le̍? 23Ndu̍yɛ̍ mi̍ Mɛ̄lɛ̄ka̍ bīūnu̍ŋ vɛ̍lɛ̄ wāŋnda̍ le̍ hāli̍ kpe̍ŋ mbō tōsa̍ mā sīna̍ nāŋɔ̄ɔ̄ ndɔ̄ bɛ̍ndōo̍. Nda̍ yɔ̍nūŋ ni̍ māā wānāā o̍ hɛ̍na̍ŋ mbō tūīīnu̍ŋ īnyīɛ̍ɛ̍ wa̍, wānāā o̍ bɛ̍ɛ̍ndi̍a̍a̍ sīndɛ̄ pa̍ le̍ mā sɔ̄la̍ nāŋɔ̄ɔ̄ ndɔ̄ɔ̍ wa̍. 24Mɛ̄ɛ̍ na̍a̍ ŋ̍ cho̍ wānāā kāŋ ni̍. Na̍a̍ o̍ ve̍e̍lu̍ le̍ wāā wānāā ndɔ̄ ni̍. Mbo̍ vēēlū na̍a̍ ō cho̍ ko̍ Chu̍ūwa̍ tɛ̄ɛ̄ŋ te̍, kɛ̍ wānāa̍ cho̍ a̍ Chu̍ū le̍ wa̍ bɛ̍ɛ̍ tɛ̍ɛ̄ŋ. 25Nyɛ̄ Mɛ̄lɛ̄ka̍ dīmi̍ o̍ Yāu̍ Hōōsi̍a̍ā ni᷄ŋ a̍ he̍ī o̍kɔ̄ɔ̄ wo̍ ndu̍ cho̍ ho̍ō ni̍ āā,
“Wānāa̍ ve̍ wa̍nāā nī le̍ wa̍,
I̍ cho̍ nda̍ vēēlū āā, ‘wānāā nīa̍a̍.’
Wānāā ya̍ i̍i̍ ka̍a̍la̍ le̍ wa̍,
I̍ cho̍ nda̍ vēēlū āā, ‘wānāā nīāā ka̍a̍lāa̍.’
26Ndu̍yɛ̍ fo̍ndāŋ kpe̍e̍kpe̍i̍ Mɛ̄lɛ̄ka̍ dīmu̍l nda̍ āā, ‘Lā cho̍ wa̍nāā nī le̍’ wo̍,
o̍ fo̍ndāŋ kōŋ ko̍ni̍ nda̍ chō wā ā vēēlāā ni̍ āā, ‘Mɛ̄lɛ̄ka̍ cho̍ yōōmū wo̍, chūāūwāā ndūa̍a̍.’ ”
27Ndu̍yɛ̍ mi̍ Āīsa̍a̍yā di̍mī a̍ I̍sɔ̄lūɛ̄ī o̍kɔ̄ɔ̄ āā, “Ā yɔ᷄ŋ bɛ̍ɛ̍ mī wāŋnda̍ I̍sɔ̄lūɛ̄ī a̍ wa̍ fāŋgā te̍i̍ māā si̍o̍ōŋnde̍ o̍ pēē mɛ̄ŋmā īhɛ᷄llo̍ kɔ̄ŋgɔ̍, kɛ̍ ndu̍yɛ̍ wāŋnda̍ kpɛ̍dɛ̍ ko̍ni̍ a̍ sɔ̍lā ni̍ŋ pi̍o̍ŋɔ̄ɔ̍ ni̍. 28Kāni̍ fu̍u̍le̍, Māsānɔ̄ɔ̍ Mɛ̄lɛ̄ka̍ chō wāŋnda̍ o̍ chi̍e̍ēŋndo̍ chōo̍ ya᷅mɛ̍i̍ kīlūl o̍ chɔ̍ chɔ̍ bɛ̍ndū ni᷄ŋ, ndu̍yɛ̍ mbō chīi̍ a̍ nda̍ fe̍u̍.” 29Kɛ̍ lɔ̍ɔ̍ pa̍ Āīsa̍a̍yā di̍mī he̍ī ō sōō fɛ̍ɛ̍ŋ di̍ōmnda̍ŋ nda᷅ŋ āā, “Tē ndu̍ o̍o̍ ve̍ mi̍ Māsānɔ̄ɔ̍ Mɛ̄lɛ̄ka̍ o̍ nɔ̍ kpāāyāa̍ kpo̍u̍ wo̍ ō mēl na̍a̍ bɛ̍ɛ̍ wa᷅ŋnda̍ ā ti᷄ŋ fūlāa̍ o̍ kāa̍le̍ na̍a̍le̍ŋ chōo̍ le̍, ŋ̄ wa̍ wā māā wāŋnda̍ So̍dɔ̄m chi̍e̍e̍ a̍ ha̍ā Kōmo̍o̍lūā chi̍e̍e̍.”
Chu̍ūwa̍ bēndū nɛ̄īyo̍ le̍ sīmnɔ᷄ŋndo̍ wānāā sa̍kpō Mɛ̄lɛ̄ka̍ o̍ hɔ̄l
30Mɛ̄ɛ̍ ɔ̍ɔ̄ nyɛ̄ na̍a̍ ŋ̄ nɔ̄ mī ŋ̄ dīmi̍ o̍ sūɛ̍i̍ he̍ī ni᷄ŋ ndo̍? Nyɛ̄ na̍a̍ ŋ̄ chō dīmīo̍o̍ wo̍ cho̍ ni̍ māā wānāa̍ cho̍ a̍ Chu̍ū le̍ wa̍, nda̍ nda̍ ā ve̍ ki̍ndī le̍ nda̍ pi̍la̍ sīīŋgūū wānāā sa̍kpō Mɛ̄lɛ̄ka̍ o̍ hɔ̄l te̍. Kɛ̍ ndu̍yɛ̍ mi̍ Mɛ̄lɛ̄ka̍ ndu̍ si̍i̍ŋgūū nda̍ wānāā sa̍kpō ndu̍ pi̍la̍ o̍ hɔ̄l le̍ mɛ̄ɛ̍ nda̍ dɔ̄ū tīīnda᷄ŋ ndāa̍ o̍ ndu̍ ni̍ŋ yɛ̍. 31Kɛ̍ ndu̍yɛ̍ wāŋnda̍ I̍sɔ̄lūɛ̄ī nda̍ wa̍ kīndīo̍o̍ le̍ nyɛ̄ sāwāa̍ dīmi̍ wo̍ tōsāa̍ le̍ mā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l. Kɛ̍ ā nɔ̄la̍ nyɛ᷅ sāwā ko̍ŋ ō dīmi̍ wo̍ tōsā le̍. 32Vɛ᷅ ā nɔ̄la̍ ndu̍ tōsā le̍? Sa̍bū nda̍ būmba̍ wo̍ cho̍ ni̍ māā ā dōu̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ mī ndu̍ o̍o̍ si̍i̍ŋgu̍u̍ nda̍ wānāā sa̍kpō le̍. Ma̍ kīndī le̍ mī nyɛ̄ nda̍ pi̍la̍ nɔ̄lā mā tōsa̍ wo̍ ō sīīŋgu̍u̍ nda̍ wānāā sa̍kpō Mɛ̄lɛ̄ka̍ o̍ hɔ̄l. Mɛ̄ɛ̍ o̍ he̍ī ni᷄ŋ, ma̍ kōōnda᷅ŋ po̍u̍ ma᷅l wa̍nā wo̍. 33Ī chō ī pōōnyīāā le̍nde̍ o̍ Yāu̍ Mɛ̄lɛ̄ka̍a̍ ni᷄ŋ āā,
“Lā ya᷄ŋ ni᷅la̍ŋ, I̍ cho̍ pōūwo̍ pūm hāndɔ̄ɔ̍ Sa̍a̍yɔ̄ŋ chi̍e̍e̍,
pōu̍ to̍sā ni̍ŋ mī wāŋnda̍ kēi̍ ndu̍ kōōnda᷅ŋ ndo̍,
pōu̍ to̍sā ni̍ŋ mā de᷄l lo̍.
Kɛ̍ wānā o̍ wāna̍ dɔ̍ū tīīnda᷄ŋndo̍ o̍ wāŋndo̍ ho̍ō ni᷄ŋ pɛ̍, ō tu̍lnūŋ la̍si̍ɔ̍mbu̍ le̍.”
Kisi Bible © Bible Society in Liberia, 2015.