Lu̍o̍ma᷅ŋnda̍ 7
7
Tāāmāsi̍o̍o̍ a̍ sāwa̍ nɔ̄ɔ̍ o̍kɔ̄ɔ̄
1Chāāŋāā nīāā wa̍nāā lāāla᷄ŋnda̍, lā sīnā nyɛ᷅ ya̍ I̍ cho̍ ho̍ō hūnɔ̄ɔ̄ sūɛ̍i̍ a̍ ndu̍ o̍kɔ̄ɔ̄ wo̍ wa̍la̍ŋ wa̍la̍ŋ. Kāni̍ fo̍ndōle̍, lā sīnā i̍sɔ̍ɔ̍ a̍ sāwāla̍ŋ o̍kɔ̄ɔ̄. Lā sīnā māā bōōndi̍i̍ wāŋndo̍ wā yo̍o̍mū ve̍ ko̍ni̍ o̍ wa᷅ o̍ sāwāa̍ bɛ̄ŋgu̍ ni̍. 2Ŋ̄ chūānu᷅ŋ ndɔ̄ sāwāa̍ a̍ nɔ̄ɔ̍ o̍kɔ̄ɔ̄ māā tāāmāsi̍. Sāwāa̍ dīmi̍ māā wānā la̍nɔ̍ cho̍ ho̍ō o̍ nɔ̄ɔ̍ wo̍, tē pɔ̍nɔ̍ɔ̍ chō wɔ̄ lāchāl pɛ̍, mɛ̄ɛ̍ ō chō wɔ̄ o̍ sāwa̍ nɔ̍ ndɔ̄ɔ̍ bɛ̄ŋgu̍. Kɛ̍ ndu̍yɛ̍, tē ō lo̍ o̍ ko̍ŋ mī pɔ̍nɔ̍ɔ̍ vī pɛ̍, mɛ̄ɛ̍ ō cho̍ lɛ̍ o̍ sāwa̍ nɔ̄ ko̍ŋ bɛ̄ŋgu̍ le̍. 3Le̍la̍ŋ, tē wānā la̍nɔ̍ɔ̍ pɔ̍nɔ̍ ndɔ̄ cho̍ lāchāl pɛ̍, kɛ̍ ndu̍yɛ̍ mbō ma᷄l ndu̍ mbō cha᷄l nda̍ wānā pɔ̍nɔ̍ che᷅le̍ŋ pɛ̍, ā vēēlu̍ ndu̍ āā, wānā su̍u̍ndɛ̍i̍yo̍. Kɛ̍ tē ō wa̍ pɛ̍ mī wānā la̍nɔ̍ɔ̍ pɔ̍nɔ̍ ndɔ̄ vi᷅, mɛ̄ɛ̍ ō cho̍ lɛ̍ o̍ sāwa̍ nɔ̄ ko̍ŋ bɛ̄ŋgu̍ le̍. Ndu̍yɛ̍ ō lo̍ ni᷅ŋ bɛ̍ɛ̍ o̍ ko̍ŋ mbō cha᷄l nda̍ wānā pɔ̍nɔ̍ che᷅le̍ŋ, ā ve̍e̍lū ndu̍ āā, wānā su̍u̍ndɛ̍i̍ le̍. 4Nya̍ bɛ̍ɛ̍ le̍nde̍ ko̍ni̍ nya̍ chō ni̍, chāāŋāā nīāā wa̍nāā lāāla᷄ŋnda̍. Kāni̍ fo̍ndōle̍, ha̍a̍a̍ nya̍ bɛ̍ɛ̍ mi̍ lā wā dīāllu᷄ŋ Ki̍li̍tīo̍ŋ, ndu̍yɛ̍ mi̍ Ki̍li̍tī wu᷅, mɛ̄ɛ̍ a̍ sāwāla̍ Mɛ̄lɛ̄ka̍ ke̍ Mūu̍sē la̍ŋ o̍kɔ̄ɔ̄, lā chō māchūāā wānāa̍ vi᷅ ni᷅ŋ. Ndu̍yɛ̍ he̍ī yɔ̄nu̍ŋ le̍ mī lā wa̍ ni᷅ŋ mīāl wānā che᷅le̍ŋ, ndu̍ yɔ̍nūŋ māā wāna̍ Mɛ̄lɛ̄ka̍ mīŋgi̍ ho̍ō yōōmū wo̍ ni̍. He̍ī yɔ̄nu̍ŋ le̍ mī ŋ̄ tōsa̍ sɔ̄ɔ̍ŋ Mɛ̄lɛ̄ka̍ sɔ̄lā tɔ̍nɔ̄ɔ̍ o̍ na̍a̍ ni᷄ŋ ndo̍ŋ. 5Bōōndi̍i̍ na̍a̍ ŋ̄ wa̍ wāna̍ chi̍e̍e̍yɛ̍ī na̍a̍ ŋ̄wāŋndā chīe̍e̍ ve̍ o̍ bā bɛ̄ŋgu̍ ve̍, yēēma̍ŋ to̍sāā yɔ̄ŋ wɔ̄ɔ̍ŋndo̍ŋ ko̍ni̍ ŋ̍ wa̍ wa̍llo̍ a̍ na̍a̍ ni̍. Ndu̍yɛ̍ sāwāla̍ Mɛ̄lɛ̄ka̍ ke̍ Mūu̍sē la̍ŋ, la̍ŋ la̍ wa̍ na̍a̍ yīya᷄ŋ to̍sāā yɔ̄ŋ wɔ̄ɔ̍ŋndo̍ dɔ̄wɔ̄ɔ̍ o̍ lākɔ̄l ni̍. O̍ ko̍ŋ, mi̍ yɔ̄ŋ wɔ̄ɔ̍ŋ kōŋ ndu̍ chu̍ū na̍a̍ pīɔ̍mndo̍. 6Kɛ̍ ndu̍yɛ̍ bōōnde̍i̍ he̍ī ni᷅ŋ, na̍a̍ na̍a̍ a̍ sāwāla̍ŋ nda̍ŋ o̍kɔ̄ɔ̄, ŋ̄ cho̍ lɛ̍ o̍ la̍ŋ bɛ̍ŋgu̍ le̍. A̍ sāwāla̍ na̍a̍ ŋ̄ wa̍ la̍ŋ o̍ bā o̍ bīyɔ̄ɔ̍ ni᷄ŋ nda̍ŋ o̍kɔ̄ɔ̄, na̍a̍ na̍a̍ ŋ̄ chō ni᷅ŋ māchūāā māā wānāa̍ vi᷅ ni᷅ŋ. Ndu̍yɛ̍ he̍ī ī yɔ̄nu̍ŋ le̍ mī ŋ̄ tōsa̍ wa̍llo̍ le̍ Mɛ̄lɛ̄ka̍ o̍ nɛ̄ī sɛ̍nɛ̄ī chōo̍, ndu̍ yɔ̍nūŋ ni̍ māā nɛ̄i̍ Nyi̍na̍ Kāsi̍ Mɛ̄lɛ̄ka̍a̍ ō chɔ᷄m ndo̍. Nɛ̄ī pa̍a̍ndōo̍ ndu̍ yɔ̍nūŋ ni̍ māā nyɛ̄ sāwāla̍ŋ lā dīmi̍ wo̍ tōsāa̍, ŋ̄ to̍sā lɛ̍ wa̍llo̍ lēchōo̍ le̍.
Nyɛ̄ sāwāla̍ŋ lā tōsa̍ wo̍
7Mɛ̄ɛ̍ ɔ̍ɔ̄ nyɛ̄ na̍a̍ ŋ̄ nɔ̄ mī ŋ̄ dīmi̍ o̍ sūɛ̍i̍ he̍ī ni᷄ŋ a̍ sāwāla̍ Mɛ̄lɛ̄ka̍ la̍ŋ o̍kɔ̄ɔ̄ wo̍? Bāā dīmīo̍o̍ na̍a̍ ŋ̄ chō ni̍ māā lā chō nyɛ̄ wɔ̄ɔ̍ŋ? Sāko̍. Sāwāla̍ŋ lā wɔ̄u̍ kpo̍so̍ŋ te̍. Kɛ̍ ndu̍yɛ̍ vɛ̍lɛ̄, tē sāwāla̍ la̍ a̍a̍ ve̍ le̍, ya̍ i̍i̍ si̍nā nyɛ̍ cho̍ yɔ̄ŋ wɔ̄ɔ̍ŋndo̍ wo̍ le̍. Tē sāwāa̍ ndu̍ o̍o̍ di̍mi̍ āā, “Wānā lu̍e̍ī le̍hɔ̍l o̍ nyɛ̄ pi̍la̍ le̍” le̍, I̍ ve̍ si̍nā nyɛ̍ cho̍ hɔ̄lte̍ŋ lūɛ̄īyɔ̄ɔ̍ o̍ nyɛ̄ pi̍la̍a̍ wo̍ le̍. 8O̍ sāwāla̍ŋ ni᷄ŋ sa̍na̍a̍ yɔ̄ŋ wɔ̄ɔ̍ŋndo̍ sɔ̄la̍ fo̍ndāa̍ ni̍. O̍ ko̍ŋ, mbo̍ tōsā mi̍ I̍ de᷅l kɔ̄l o̍ hɔ̄lte̍ŋ lūɛ̄īyɔ̄ɔ̍ o̍ nyɛ̄m pi̍la̍ŋ o̍ nɛ̄īla̍ yɛ̍ yɛ̍ ni̍ŋ. Sāwāla̍ŋ la̍ a̍a̍ ve̍ le̍, yɔ̄ŋ wɔ̄ɔ̍ŋndo̍ ndu̍ o̍o̍ wa᷅ ni̍ŋ ma̍wa̍ā māā nyɛ̄ vīlɛ̍i̍, ndu̍ o̍o̍ nɔ᷅ kpa̍a̍yā le̍. 9Bōōndi̍i̍ ya̍ i̍i̍ si̍na̍ wɔ̍ a̍ sāwāla̍ŋ o̍kɔ̄ɔ̄ le̍ ve̍, bōōndi̍i̍ ke̍ŋ I̍ wa̍nu̍ŋ yo̍o̍mū. Kɛ̍, mɛ̄ɛ̍ ya̍ si̍na̍ dɔ̍ɔ̍ a̍ la̍ŋ o̍kɔ̄ɔ̄, mi̍ yēēmɛ̍i̍ bɛ̍ndūe̍i̍ lūɛ̄ī dɔ̍ɔ̍ ya̍ o̍ kɔ̄l le̍ yɔ̄ŋ wɔ̄ɔ̍ŋndo̍ tōsāa̍. 10O̍ ko̍ŋ, mi̍ I̍ wu᷅. Mɛ̄ɛ̍ o̍ he̍ī ni᷄ŋ, mi̍ sāwāla̍ la̍ a̍a̍ nɔ̍ le̍ tōsāa̍ mī wa̍ yōōmū la̍ŋ lā mīī tōsā mi̍ sɔ̍lā pīɔ̍mndo̍. 11O̍ sāwāla̍ŋ ni᷄ŋ sa̍na̍a̍ yɔ̄ŋ wɔ̄ɔ̍ŋndo̍ sɔ̄la̍ fo̍ndāa̍ ni̍. O̍ ko̍ŋ, mi̍ yɔ̄ŋ wɔ̄ɔ̍ŋndo̍ hūī ya̍. Ndu̍yɛ̍ mi̍ yɔ̄ŋ wɔ̄ɔ̍ŋndo̍ dīī ya̍ a̍ sāwāa̍.
12Le̍la̍ŋ, sāwāla̍ŋ lā chō māchūāā nyɛ̍ fu̍la̍ o̍ Mɛ̄lɛ̄ka̍ lo̍. Ndu̍yɛ̍ sāwāla̍ŋ ō kɛ᷅ o̍ kɛ᷅ ō fūla̍ o̍ Mɛ̄lɛ̄ka̍ lo̍. Ndu̍yɛ̍ chɔ̄mndo̍ la̍ chɔ᷅m wa᷅ŋndo̍ nyɛ̍ cho̍ sa̍kpō le̍ tōsāa̍ wo̍ ni̍. Ndu̍yɛ̍ o̍ ko̍ŋ kɔ̍ɔ̍lī, lā chō nyɛ̄ kɛ̄ndɛ̄. 13Mɛ̄ɛ̍ i̍ cho̍ le̍nde̍ yɛ̍, bāā ko̍ŋ chɔ̍m māchɔ̄māā māā nyɛ̄ kɛ̄ndɔ̄ɔ̍ ndu̍ to̍sa̍ ni̍ mi̍ I̍ sɔ̍lā pīɔ̍mndo̍? Sāko̍. Ō cho̍ le̍nde̍ kpo̍so̍ŋ te̍. Yɔ̄ŋ wɔ̄ɔ̍ŋndo̍ to̍sa̍ ni̍ mi̍ I̍ sɔ̍lā pīɔ̍mndo̍. Ndu̍yɛ̍ sāwāla̍ kɛ̍ndɛ̄la̍ŋ nda᷅ŋ a̍ la̍ŋ yɔ̄ŋ wɔ̄ɔ̍ŋndo̍ tōsa̍ he̍ī ni̍. Ndu̍yɛ̍ he̍ī yɔ̄nu̍ŋ le̍ mī wāŋnda̍ sīna̍ mɛ̄ɛ̍ kpe̍e̍kpe̍i̍ yɔ̄ŋ wɔ̄ɔ̍ŋndo̍ chō yɛ̍. Mɛ̄ɛ̍ sāwāla̍ŋ la̍ to̍sa̍ ni̍ mi̍ wāŋnda̍ sīnā mɛ̄ɛ̍ yɔ̄ŋ wɔ̄ɔ̍ŋndo̍ ō wɔ̄u̍ wɔ̄ūlē bɛ̄ndūle̍ŋ yɛ̍ ni̍.
A̍ chɔ̄ū lāba̍ cho̍ yɔ̄nɔ᷄ŋndo̍ wāna̍ chi̍o̍o̍ ni᷄ŋ ndo̍ o̍kɔ̄ɔ̄
14Ŋ̄ sīnā māā sāwāla̍ŋ nda̍ŋ nyɛ̍ fu̍la̍ o̍ Mɛ̄lɛ̄ka̍ wo̍ la̍ cho̍ ni̍. Kɛ̍ ya̍ ya̍, wāna̍ chi̍e̍e̍ yo̍o̍māa̍ ko̍ni̍ ya̍ I̍ cho̍ ni̍, ndu̍yɛ̍ mi̍ I̍ si̍mnu᷄ŋ māā chɛ̄ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍. 15I̍ si̍nā pɛ̍ŋgu̍ kpo̍so̍ŋ mɛ̄ɛ̍ ya̍ I̍ cho̍ sɔ̄ɔ̍ŋ tōsāa̍ yɛ̍ le̍. Kāni̍ fo̍ndōle̍, nyɛ̄ ya̍ I̍ hɛ̍nāŋ le̍ tōsāa̍ wo̍, I̍ nɔ̍lā mī I̍ to̍sa̍ ko̍ŋ te̍. Kɛ̍ nyɛ̄ ya̍ I̍ hɛ̍nāŋ le̍ tōsāa̍ kpo̍so̍ŋ te̍ wo̍, ndu̍ ya̍ I̍ to̍sā ni̍. 16Le̍la̍ŋ tē ō wa̍ pɛ̍ le̍nde̍ māā nyɛ̄ ya̍ I̍ hɛ̍nāŋ le̍ tōsāa̍ le̍ wo̍ māā ndu̍ ya̍ to̍sā ni̍, mɛ̄ɛ̍ ko̍ŋ chɔ̍m māā I̍ chɛ̍l ndi̍ tōnya̍ māā sāwāla̍ŋ lā na᷄ŋ. 17O̍ he̍ī ni᷄ŋ, tē ō wa̍ pɛ̍ māā nyɛ̄ ya̍ I̍ hɛ̍nāŋ le̍ tōsāa̍ le̍ wo̍ māā ndu̍ ya̍ I̍ to̍sā ni̍, mɛ̄ɛ̍ ko̍ŋ chɔ̍m ni̍ māā ō cho̍ ya̍ pi̍la̍ le̍ cho̍ sūɛ̍i̍ wɔ̍ɔ̍ŋīī kēŋ tōsāa̍ le̍. Yɔ̄ŋ wɔ̄ɔ̍ŋ cho̍ o̍ kɔ̄l nūu̍ ni᷄ŋ ndo̍, mɛ̄ɛ̍ ndu̍ cho̍ sūɛ̍i̍ wɔ̍ɔ̍ŋīī kēŋ tōsāa̍ ni̍. 18Kāni̍ fu̍u̍le̍, I̍ si̍nā māā kɔ̄l nūu̍ ho̍ō, ndu̍ yɔ̍nūŋ māā wāna̍ chi̍e̍e̍yɛ̍ī nīi̍ to̍sā he̍ī yɔ̄ŋ wɔ̄ɔ̍ŋndo̍ ve̍ ni̍, nyɛ̄ o̍ nyɛ̄ kɛ̄ndɛ̄ cho̍ le̍ni̍ŋ te̍. Kāni̍ fo̍ndōle̍, mī I̍ nɔ̍ yēēmɛ̍i̍ le̍ sūɛ̍i̍ kɛ̍ndɛ̄i̍ tōsāa̍, kɛ̍ I̍ nɔ̍lā le̍. 19Kāni̍ fo̍ndōle̍, sūɛ̍i̍ kɛ̍ndɛ̄ī ya̍ I̍ ye̍e̍mā le̍ tōsā ve̍, I̍ to̍sā ke̍ŋ te̍. O̍ ko̍ŋ kɔ̍ɔ̍lī, sūɛ̍i̍ wɔ̍ɔ̍ŋīī ya̍ I̍ hɛ̍nāŋ le̍ tōsāa̍ le̍ ve̍, ndi̍ ya̍ I̍ hi̍a̍ū la̍chi̍ a̍ tōsāā ni̍. 20Ndu̍yɛ̍ tē ō wa̍ yɛ̄ pɛ̍ māā, nyɛ̄ ya̍ I̍ hɛ̍nāŋ le̍ tōsā le̍ wo̍ māā ndu̍ ya̍ I̍ to̍sā ni̍, mɛ̄ɛ̍ ō cho̍ ya̍ pi̍la̍ le̍ cho̍ sūɛ̍i̍ wɔ̍ɔ̍ŋīī kēŋ tōsāa̍ le̍. Yɔ̄ŋ wɔ̄ɔ̍ŋ cho̍ o̍ kɔ̄l nūu̍ ni᷄ŋ ndo̍, ndu̍ cho̍ sūɛ̍i̍ wɔ̍ɔ̍ŋīī kēŋ tōsāa̍ ni̍.
21Mɛ̄ɛ̍ o̍ he̍ī ni᷄ŋ, nyɛ̍ cho̍ yɔ̄nɔ᷄ŋndo̍ o̍ kɔ̄l nūu̍ ni᷄ŋ ndo̍ ndu̍ cho̍ ho̍ō ni̍ māā, te̍le̍ŋ o̍ te̍le̍ŋ ya̍ I̍ ye̍e̍ma̍ le̍ sūɛ̍i̍ kɛ̍ndɛ̄i̍ tōsāa̍, sūɛ̍i̍ wɔ̍ɔ̍ŋnde̍ ko̍ni̍ ya̍ I̍ ti̍ū ba̍ le̍ tōsāa̍ ni̍. 22I̍ cho̍ ō chɛ̄lāā a̍ nyi̍nā nūu̍ kpo̍u̍ le̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍ tōsāa̍. 23Kɛ̍ ndu̍yɛ̍ I̍ sa̍a̍lu̍ŋ māā nyɛ̄ chēle̍ŋ chō wa̍llo̍ o̍ ya̍ ni̍ŋ mbo̍ wā sɔ̍ŋgɔ̄ɔ̍ a̍ sāwa̍ Mɛ̄lɛ̄ka̍a̍ ō kɔ̄l nūu̍ chō ho̍ō ō chɛ̄lāā le̍ tōsāa̍ wo̍. Nyɛ̄ ko᷄ŋ to̍sa̍ ni̍ mi̍ I̍ wa᷅ o̍ bīyɔ̄ɔ̍ ni᷄ŋ ye̍e̍mɛ̍i̍ to̍sāā yɔ̄ŋ wɔ̄ɔ̍ŋ i̍ cho̍ o̍ ya̍ ni̍ŋ nde̍ o̍ bā bɛ̄ŋgu̍. 24Nyɛ̄ pālāa̍ ho̍ō chō ō bānā bānā ya̍ chōo̍ fɔ̍. Mī nɛ̄ɛ̍nɛ̍ fa̍ŋa̍ yɛ̄ ya̍ dīāllu᷄ŋ cho̍ mu᷅ŋ hūnɔ̄ɔ̄ wu̍ wo̍ŋ chōo̍? 25Mɛ̄lɛ̄ka̍ ndu̍ cho̍ ya̍ sōlī lēni᷄ŋ o̍ sa̍bu̍ Māsānɔ̍ nāa̍ Chi̍i̍sū Ki̍li̍tīo̍o̍ ni᷄ŋ ni̍. Ndu̍yɛ̍ I̍ me̍l Mɛ̄lɛ̄ka̍ ba̍li̍ka̍ ta̍u̍ le̍ ke̍ŋ.
Le̍la̍ŋ, bā hāvɛ̍i̍ ya̍ I̍ sa̍a̍lu̍ŋ ya̍ pi̍la̍ lēni᷄ŋ ndo̍ cho̍ ho̍ō ni̍. Ya̍ pi̍la̍ kɔ̄l nūu̍ ndu̍ cho̍ o̍ sāwa̍ Mɛ̄lɛ̄ka̍a̍ bɛ̄ŋgu̍. Kɛ̍ ndu̍yɛ̍ wāna̍ chi̍e̍e̍yɛ̍ī nīi̍ ndi̍ ndi̍ cho̍ o̍ nyɛ̄ yɔ̄ŋ wɔ̄ɔ̍ŋndo̍ dīmūl ndi̍ le̍ tōsāa̍ wo̍ bɛ̄ŋgu̍.
Kisi Bible © Bible Society in Liberia, 2015.